Pane Tus Samuela

27 Ngo öni Dravita ka hape: “Tro pala kö Saulo elany a humuthi ni. Ngo ka loi e tro ni a pane kötr koi angetre Filisiti, matre mano ju Saulo thel agö ni ngöne la nöje Isaraela, nge matre mele pi ni.” 2 Ame hnei Dravita memine lo ala 600 ka ce me angeic, hna tro ju koi Akisa nekö i Maoka, joxu ne Gatha. 3 Matre Dravita memine la 600 lao soc a lapa ju e Gatha thei Akisa. Hnei angatr hna isa traqa fë la itre fami angatr. Matre Dravita a lapa ju e cili memine la lue föi angeic, Ahinoam qa Iezerela, me Abigaila qa Karemela, lo hna mecitrij hnei Nabala. 4 Nge ame hë la Saulo a drenge laka, Dravita e Gatha, tha thele Dravita ju hi nyidrë.

5 Öni Dravita jë hi koi Akisa: “Maine loi koi nyipë, pane nue ni pi troa lapa ngöne la itre neköi hunahmi e trön. Ke tha ijijinge kö, hlue i nyipë, troa lapa me nyipë ngöne la hnanyijoxu.” 6 Matre ngöne la drai cili, Akisa a hamëne pi koi Dravita la traon ne Zikelag. Celë hi matre zi ne la joxu ne Iudra pala pë hë la traon cili.

7 Haawe, hnei Dravita hna lapa e Filisiti trön la traon, koi* ca macatre nge 4 lao treu. 8 Nge Dravita me itre atre i angeic a isi ju me angetre Gerusi, me angetre Girizi, me angetre Amaleka. Itre atre cili a lapa trootro qaan e Telam uti hë Sura, me e kolojë uti hë la ifego ne Aigupito. 9 Nge ame la Dravita a lepe la itre nöj, pëkö atre ka mele pe. Angeic a eöthe la itre mamoe me kau, me boliko, me kamela, me itre iheetr, nge angeic a bëeke hmaca jë koi Akisa. 10 Thupene lai, Akisa a hnyingë Dravita jë ka hape: “Drei la nöj hnei epuni hna lep enehila?” Nge Dravita a sa ka hape: “Iudra nge kolojë,* maine Ieramela nge kolojë, maine Keni nge kolojë.” 11 Pëkö ka mele pe, pëkö trahmanyi me föe, matre pëkö ka troa lö e Gatha, me qaja ka hape, “hnei Dravita hna kuca la, maine hna kuca tune la.” (Hane hi la aqane ujë i Dravita lo angeic a lapa ngöne la itre hlapa ne Filisiti.) 12 Haawe, mejiune hë Akisa koi Dravita, ke öni angeice pena kö ka hape: “Ma xele hë la nöje Isaraela ma wai Dravita. Tro pë hë angeice lai a nyihlueng uti hë mec.”