Salamo
Nyima ne eetr,* lo hnei Dravita hna nyiman koi Iehova göne la itre trengewekë i Kuza atre Beniamina.
7 Iehova Akötresinge fe, eni a zae thei nyipë.
Epi amele ni pi qaathene la itre ka axösisi ni, nge thepe ni pi.
2 Wanga tro angatr a hej angazo* ni tune la liona,
Me xomi ni nge pëkö atre xatua ni.
3 Ekölöhini Iehova fe, maine hnenge hna kuca la ngazo,
Nge tria la aqane ujëng,
4 Nge maine hnenge hna akötrën la atre kuca la loi koi ni,
Me thapa la itre ewekë ne la ithupëjiang, nge pëkö kepin,*
5 Loi e tro la ketre ithupëjia a weje huzu ni me xolouthi ni;
Tro angeic a kuië ni e kuhu hnadro me wajaficanyi ni*
Nge tro angeic a apatrene la lolong ngöne la xaxau. (Sela)
6 Iehova fe, mejë jë ngöne la elëhni i nyipë;
Cile jë kowe la elëhni ne la itre ithupëjiang;
Xatua ni jë hnei nyipë, nge upe jë troa amekötin cememine la meköt.
7 Epi tro la itre nöj a lapa xötreithi nyipë;
Qa koho, tro kö nyipëti a lepi angatr.
8 Tro Iehova a amekötine la itre nöj.
Ngo Iehova fe, ameköti ni jë thenge la meköting
Me thenge la aqane mele nyipicing.*
9 Epi tro nyipëti a lepetrije la itre thiina ne la itre atr ka ngazo.
Ngo acile hutine ju la itre atr ka meköt,
Ke Akötresie ka meköti nyipë, atre waipengöne la itre aliene hni me itre mekun ka jui.*
10 Akötresieti la petreng, Atre Amelene la itre ka hni ka meköt.
11 Akötresieti la Atre Amekötine ka meköt,
Nge o drai, nyidrëti a qaja la itre hnei nyidrëti hna amekötin.*
12 Maine tha ietra kö la ketre atr, tro Akötresieti a xöl la taua i nyidrë;
Tro nyidrëti a hnëkëne la pehna i nyidrë me hnan ej.
13 Tro nyidrëti a hnëkën la itre jia ne ihumuth;
Tro nyidrëti a hnëkën la itre ane pehna i nyidrë ka mel.
14 Goeëne la atre lapa xome la ngazo e kuhu hni i angeic;
Angeic a upunene la ngazo me hnahone la thoi.
15 Angeic a sine la hnaop me sin ajuin,
Ngo angeice hmaca kö a kei ngöne la hnaop hnei angeic hna sin.
16 Tro hmaca kö la ngazo i angeic a bëek hune la he i angeic;
Tro la aqane iakötrë i angeic a kei trane la inenatre i angeic.
17 Tro hë ni a atrunyi Iehova pine la meköt i nyidrë;
Tro hë ni a nyimane* la elolone la ëje i Iehova, lo Atre Ka Draië Catr.