Atre Cainöj

6 Hnenge hna öhn fene la jö la ketre ewekë ka jole catr,* nge hna majemine kuca thene la itre atr: 2 Kola hamë mani, me mo, me itre loi kowe la atr hnene la nyipi Akötresie, matre hetrenyi asë hi angeic la hnei angeic hna ajan. Ngo ame pe, tha hna aijijë angeice kö hnene la nyipi Akötresie troa madrine fë la itre ewekë cili; ngo qanyine pë hë la trenyiwa. Matre ketre ewekë lai ka gufa nge ka akötr. 3 Maine troa traqa koi 100 lao nekön ne la ketre trahmany, nge tro angeic a mel aqeany uti hë la tro angeic a qatr, ngo tha kepe thangane pe la itre loi i angeic qëmeken troa uti koi hua,* eni a mekun laka, loi ju kö la nekönatr ka mec lo kola hnahon, hui angeic. 4 Kola traqa gufa la nekönatre cili, ke patre hë nyën ngöne la itre gaa mit, nge ase hë kelem la ëje i nyën ngöne la itre gaa mit. 5 Ngacama tha öhne ju kö nyëne la jö me itre xaa ewekë, ngo ka loi ju kö nyën hune la atre* cili. 6 Ke nyine u la troa mel koi 2 000 lao macatre nge tha madrine pe së? Hapeu, tha casi kö la götran hne së hna troa tro kow?

7 Ame la nöjei huliwa asë ne la atr, ke nyine nyialiene la që i angeic; ngazo pe, tha meji kö angeic. 8 Ke eje hi, nemene la esisitriane la atr ka inamacan hune la hmo? Maine pena, nemene la eloin e tro la ka pë ewekë a atreine thupën la mele i angeic?* 9 Ka loi ju kö la troa öhnyi madrin qa ngöne la hna goeën, hune la troa nyinyape thenge la itre aja. Ke ka gufa fe lai, kösë kola nyinyape thenge la eny.

10 Hna ati ëjene hë ekö la itre ewekë ka mel, nge mama ha la nyipi pengöne la atr; thatreine kö angeic troa uti fë la atr ka catre kö hui angeic. 11 E tru la itre ithanata,* ke tro itre ej asë a gufa; nge nemene la eloin itre ej kowe la atr? 12 Ke drei la ka atre la itre ewekë ka loi nyine tro la atr a kuca ngöne la mele i angeic ka pë alien? Ceitune hi la mele i angeic memine la iahnu ka patre trootro. Ke drei la ka atre la itre ewekë ka troa traqa e patre hë angeic?