Salamo
Thatraqane la atre jumi traem. Qaathei Dravita, hlue i Iehova. Angeic a nyimane koi Iehova la nyima celë, ngöne lo Iehova a amele angeic qa ngöne la ime i Saulo me itre ithupëjia. Öni angeic:
18 Iehova fe trengecatreng, tru la ihniming koi nyipë.
2 Iehova la giting, me ecatreng, me Atre amele ni
Akötresie la giting, me hnë zaeng,
Me petreng, me jian* ne amele ni,* me hnë zae* gaa xeut.
3 Eni a thithi koi Iehova, lo nyine troa atrun,
Nge tro ha amele ni qaathene la itre ithupëjiang.
4 Hna kanothi ni hnene la itre eno ne la mec;
Itre atr ka iangazo a axouenyi ni kösë tim ka kaca.
5 Hna kanothi ni hnene la itre eno ne la Hua;*
Hna fetra qëmekeng la itre hnö ne la mec.
6 Hnenge hna thithi koi Iehova ngöne la akötreng,
Me hë draië kowe la Akötresing.
Qa ngöne la uma ne hmi i nyidrë, nyidrëti a dreng la aqane ithanatang,
Nge traqa ha kowe la lue hnangenyë i nyidrë la treijeng.
7 Ame hna enienij me hmengöhmengöne la ihnadro;
Hna kötrekötr la itre trepene la itre wetr
Nge hna enienij, ke hna aelëhni nyidrë.
8 Hna so draië la haj qa ngöne la hnafij i nyidrë,
Nge hna lö pi la eë ka catr qa ngöne la që i nyidrë;
Hna sesë la itre wanalep ka melemel qaathei nyidrë.
9 Ame lo nyidrëti a ut, hnei nyidrëti hna aipiëne la hnengödrai,
Nge hna mit fene la lue ca i nyidrë.
10 Hnei nyidrëti hna tithe la kerubi me sesë kolemi.
Hune la iape ne la ketre u,* hnei nyidrëti hna aca tro sesë me ut.
11 Hnei nyidrëti hna juetrë nyidrë hnei melöhlem,
Tune la ketre titaxapo xötreithi nyidrë,
Hna kuca hnei itre tim ka mit me itre iaw ka hmekön.
12 Qa ngöne la lai qëmekei nyidrë
Hna thupa la itre iaw hnei wene mani ka catr* me wanalep ka mel.
13 Ame hnei Iehova hna ulil qa hnengödrai tune la hedreng;
Hna mexeme la nine ithanata ne la Ka Draië Catr
Jëne la mani ka catr memine la wanalep ka mel.
14 Hnei nyidrëti hna huji pehna me isa ijene la itre ithupëjiang;
Hnei nyidrëti hna hna la itre sameke i nyidrë matre amenumenu angatr.
15 Mama ha la itre jë i tim;
Iehova fe, pine la ihaji i nyipë,
Me enyi ka tro qa ngöne la hnafij i nyipë, hna amamane la itre trepene la ihnadro.
16 Qa koho, hnei nyidrëti hna li im;
Hnei nyidrëti hna ee ni, me huli ni qa ngöne la gaa jui.
17 Hnei nyidrëti hna amele ni qaathene la ithupëjiang ka catr,
Me qaathene la itre ka methinë ni, nge ka catre kö hung.
18 Hnei angatr hna cile koi ni ngöne lo eni a akötr,
Ngo hnei Iehova pala hi hna xatua ni.
19 Hnei nyidrëti hna tro sai ni ngöne la gaa lolo;*
Hnei nyidrëti hna amele ni, ke tru la ihnim i nyidrëti koi ni.
20 Iehova a nyithupene koi ni thenge la thiinang ka meköt;
Nyidrëti a të koi ni thenge la lue imeng ka pë ethan.*
21 Ke hnenge pala hi hna drengethenge Iehova,
Nge tha hnenge kö hna kuca la ngazo, ene la troa trotrije la Akötresing.
22 Eni a lapa mekune la itre iameköti i nyidrë;
Tha tro kö ni a wangacon la itre hna amekötin hnei nyidrë.
23 Tro pala hi ni a mele nyipici koi nyidrë,
Me thupën matre tha tro kö ni a kuca la ngazo.
24 Epi tro Iehova a nyithupene koi ni thenge la thiinang ka meköt,
Me thenge la lue imeng ka pë ethan qëmeke i nyidrë.
25 Ame kowe la atr ka mele nyipici, tro nyipëti a mele nyipici koi angeic;
Ame kowe la atr ka meköt, tro nyipëti a thiina ka meköt koi angeic;
26 Ame la atr ka pë ethan, tro angeic a öhne laka, ka pë ethane nyipë,
Ngo ame kowe la atr ka qali thiina, tro nyipëti a waipengöi angeic.
28 Ke Iehova fe, nyipëti la atre amelene la laameng,
Me Akötresing atre thinane la itre gaa jidring.
29 Jëne la ixatua i nyipë, ijijinge troa isi me itre atrekënö;
Jëne la mene i Akötresie, ijijinge hi troa elëne la hag atraqatr.
30 Pexeje la aqane ujë ne la nyipi Akötresie;
Ame la trengewekë i Iehova, ke kola alolone trongën.
Nyidrëti la petr kowe la angetre zae thei nyidrë.
31 Ke drei la Akötresie e tha Iehova kö?
Nge drei la git e tha Akötresi së kö?
32 Ame la nyipi Akötresie, ke ene lo atre heetrë ni hnei men,
Nge tro kö nyidrëti a amekötine la jëng.
33 Nyidrëti a kuca matre maca la lue cang tune la drube föe;
Nyidrëti a acilë ni hune la itre gaa draië.
34 Nyidrëti a amacane la lue imeng kowe la isi;
Atreine hi la lue imeng troa wenë la tane pehna kopa.
35 Nyipëti a hamë ni la petre i nyipë matre thupë ni,
Nge kola sajuë ni hnene la ime maca i nyipë,
Nge kola adraië ni hnene la ipië i nyipë.
36 Nyipëti a atrune la gojeny kowe la lue cang;
Tha tro kö a ucic la lue cang.
37 Tro ni a wej la itre ithupëjiang me ee angatr;
Tha tro kö ni a bëek, e tha hnenge kö hna pane lep apatrenyi angatr.
38 Tro ni a waja fici angatr uti hë la thatreine hmaca kö angatre mejë;
Tro hë angatr a kei fene la lue cang.
39 Tro nyipëti a thue trengecatreng troa isi;
Tro nyipëti a akeine la itre ithupëjiang fene la lue cang.
41 Angatr a sue troa sipo ixatua, ngo pëkö ka amele angatr;
Angatre fe a hë Iehova, ngo tha sa kö nyidrë.
42 Ngo tro hë ni a anyilanyilanyi angatr tune la xaxau hna ufe hnei eny;
Tro ni a triji angatr tune la trëtr ne gojeny.
43 Tro nyipëti a amele ni qaathene la itre ka qeje ni ngöne la nöjeng.
Tro nyipëti a acili ni nyine tan ne la itre nöj.
Tro la nöj hnenge hna thatre a huliwa koi ni.
44 Tro hë angatr a drei ni, pine hi la hnei angatr hna drenge göi ni;
Tro ha traqa la itre trenyiwa troa qaja aloinyi ni.
45 Tro la itre trenyiwa a pë trengecatr;*
Tro angatr a tro qa ngöne la itre traon hna eköhagen* me hmengöhmengön.
46 Ka mele Iehova! Atrune jë la Giting!
Epi atrune la Akötresie atre amele ni.
47 Tro la nyipi Akötresie a të la ngazo hna kuca koi ni;
Nyidrëti a amë la itre nöj fene la musing.
48 Nyidrëti a amele ni qaathene la itre ithupëjia ka elëhni;
Nyipëti a adraië ni hune la itre atr ka isi me eni;
Nyipëti a amele ni qa ngöne la itre atr ka isi.
49 Celë hi matre, Iehova fe, tro ni a atrunyi nyipë nyipine la itre nöj,
Nge tro ni a nyimane la itre nyima* nyine atrune la ëje i nyipë.
50 Tro nyidrëti a eatrëne la itre huliwa nyine hain matre amelene la joxu i nyidrë;
Nyidrëti a amamane la ihnimi nyipici i nyidrë kowe la hnei nyidrëti hna iën,*
Me koi Dravita me itre matra i angeic epine palua.