Isaia
6 Ame ngöne la macatre ne meci Uzia Joxu, hnenge hna öhnyi Iehova kola lapa hune la therone ka draië catr,* nge tiqa ha la Uma Ne Hmi hnene la itre ipune iheetre i nyidrë. 2 Nge itre serafi a icileny hui nyidrë, nge isa 6 lao iape i angatr. Lue iape nyine heetrëne la itre iqëmeke i angatr, lue iap nyine heetrëne la itre waca i angatr, nge lue iap nyine sesë.
3 Angatr a iqajakeun me cainöjën ka hape:
“Hmitrötr, hmitrötr, hmitrötre Iehova joxu ne la itre trongene isi e hnengödrai.
Tiqa ha la fene hnengödrai hnene la lolo i nyidrë.”
4 Nge kola enienij la itre hune qëhnelö hnene la mejene cainöje* i angatr, nge tiqa ha la Uma Ne Hmi* hnei haj.
5 Ame hnenge hna qaja ka hape: “Ekölö pë hë ni!
Ka tro hë ni la a mec,*
Ke eni la ketre atr ka ngazo nge ka puingazo la itre trengewekëng,
Nge eni a lapa nyipine la ketre nöj ka qaja la itre trengewekë ka puingazo;
Ke hnenge hna öhne la Joxu, Iehova joxu ne la itre trongene isi!”
6 Ngo hnene la ketre serafi hna sesë fë koi ni la ketre wanalepe ka mel, lo hnei angeic hna xome memine la akof qa hune la ita ne huuj. 7 Nge hnei angeic hna ketr la qëng me hape:
“Ase hë ketr la ukeineqë i ö,
Asë hë apatrene la menu i ö,
Nge ase hë nue la ngazo i ö.”*
8 Thupene lai, hnenge hna dreng la nine i Iehova, kola hnyingën ka hape: “Drei la hnenge hna troa up? Nge drei la ka troa tro thatraqai së?” Ame hnenge hna sa ka hape: “Eni hi la! Upi ni jë!”
9 Ame hnei nyidrëti hna qaja ka hape: “Tro jë qaja kowe la nöje ce ka hape,
‘Tro pala hi epuni a dreng,
Ngo tha tro kö epuni a trotrohnin;
Tro pala hi epuni a goeën,
Ngo tha tro kö epuni a xomi ini.’
10 Axetine ju la hni ne la nöje celë,
Asimine ju* la lue hnangenyë i angatr,
Atimekë angatre ju,
Matre tha tro kö angatr a öhn me itre luemeke i angatr
Me dreng hnene la itre hnangenyë i angatr,
Matre tha tro kö la hni i angatr a trotrohnin
Nge matre tha tro kö angatr a bëeke koi ni, me loi hmaca.”
11 Hnenge hna hnying koi nyidrëti ka hape: “Iehova fe, uti hë eu?” Ame hnei nyidrëti hna sa ka hape:
“Uti hë la troa kei la itre traon nge pëkö atre lapan
Nge troa pë atrene la itre uma
Me thëtrij me apatrene trij la nöj;
12 Uti hë la tro Iehova a ananyine la itre trahmany
Nge tro ha nuetrij la nöj.
13 “Ngo tro pe hi a lapa la hna 10 qa ngöne la nöje Isaraela, nge tro hmaca a dreuthetriji angatr. Nge tro hë angatr a tune la sinöe ka draië, me tune la alona, laka hna thupa nge lapa ju pe hi la iwaan, nge troa xöle qa ngöne la iwaan cili la ketre ziin* ka hmitrötr.”