Malaki

3 “Eni hë la a upe la ka tro fë macang, nge tro angeic a amamai gojenyi qëmekeng. Nge tro hë la nyipi joxu, lo hnei epuni hna thel, a traqa kowe la uma ne hmi i nyidrë; nge tro la atre tro fë la maca ne isisinyikeu a traqa, lo hnei epuni hna treqen cememine la madrin. Goeën! Tro kö angeic a traqa,” öni Iehova joxu ne la itre trongene isi e hnengödrai.

2 “Ngo drei la ka troa atreine xomihnine la drai ne traqa i nyidrë? Nge drei la ka troa atreine cile ngöne la nyidrëti a troa mama? Ke tro nyidrëti a tune la eë ne la atre ahmu fao, me tune la trepe soop ne la atre wasi maano. 3 Nge tro nyidrëti a lapa tune la atre ahmu sileva matre nyidrawan. Tro nyidrëti a nyidrawan la itre nekö i Levi; nge tro nyidrëti a aporopë angatr kösë gool me sileva. Nge tro hë Iehova a goeë angatr tune la itre atr ka tro fë huuj ka meköt. 4 Nge tro hë Iehova a madrine la itre huuje i Iudra me Ierusalema, tune ekö, tune lo itre drai hnapan.

5 “Tro ni a traqa troa ameköti epun, me canga upezöne la itre trene iöni, me itre ka nyixetë, me itre ka sisinyi thoi, me itre ka atrekënö la atr ka huliwa, memine la sine föe, memine la nekön hna mecitrij hnei kem, me itre ka xele ma xatuan la trenyiwa.* Tha hnei angatre kö hna xoue ni,” öni Iehova joxu ne la itre trongene isi e hnengödrai.

6 “Ke Iehova ni; tha saze kö ni.* Nge itre nekö i Iakobo epun; tha hna apatrenyi epuni pala kö. 7 Qaane lo ijine la itre qaaqaa i epun, nanyi hë epuni qa ngöne la itre wathebong, nge tha metrötrëne hë epun. Haawe, bëeke jë koi ni nge tro hë ni a bëeke koi epun,” öni Iehova joxu ne la itre trongene isi e hnengödrai.

Ngo öni epuni pe: “Nemene la nyine tro huni a kuca matre troa bëek?”

8 “Ijije kö tro la atr a atrekënö Akötresie? Ngo epuni pe a atrekënö ni.”

Nge öni epun: “Hne huni hna atrekënö nyipë tune kaa?”

“Ngöne la epuni a tro fë la hna 10 ne la itre ewekë i epun me itre ahnahna. 9 Nyipici, hnëjine hë epun, ke epuni a atrekënö ni. Eje hi, kola atrekënö ni hnene la nöj asë. 10 Tro fë jë kowe la hnë ami xen la hna 10 ne la itre ewekë i epun,* matre hetre xeni jë ngöne la umang. Nge pane tupathi ni ju,” öni Iehova joxu ne la itre trongene isi e hnengödrai, “matre öhne jë epun la tro ni a fe la hnengödrai, me nenge koi epuni la itre manathith uti hë la tro epuni a hetrenyi asë.”

11 “Eje hi, tro ni a wesitrën la ka xeni* asë la nöjei feja i epun, matre tha tro kö angeic a apatrene la itre xeni ne la nöje i epun. Nge tro pala hi a wa la itre ivine i epun,” öni Iehova joxu ne la itre trongene isi e hnengödrai.

12 “Tro hë la nöjei nöj a hë epun ka hape, nöje ka madrin, ke tro ha tiqa la nöje i epun hnei ewekë ka lolo,” öni Iehova joxu ne la itre trongene isi e hnengödrai.

13 “Ngazo catr la aqane qeje ni hnei epun,” öni Iehova.

Ngo öni epuni pe: “Hne huni hna qeje nyipëti tune kaa?”

14 “Öni epun: ‘Nyine u la troa nyihlue i Akötresie, me metrötrëne la itre hnei nyidrëti hna amekötin, me nyi ka hleuhleu qëmekei Iehova joxu ne la itre trongene isi e hnengödrai? 15 Ame koi hun, ka madrine la itre ka pi tru. Nge kola tro loi la mele ne la itre ka kuca la ngazo. Tha xou angatre kö troa tupathi Akötresie, nge pëkö jol ka traqa koi angatr.’”

16 Ngöne la ijine cili, hnene la itre ka xoue Iehova hna porotrik, ketre me ketre, nge Iehova a drenge hnyawan me wangatrun. Nge hna cinyanyine la ketre tusi ne amekunëne qëmekei nyidrë thatraqane la itre ka xoue Iehova, me itre ka lapa mekune* la ëje i nyidrë.

17 “Ame ngöne la drai ne tro ni a hnëkën la atu ka cong,”* öni Iehova joxu ne la itre trongene isi e hnengödrai, “ke ewekënge hë angatr. Tro ni a utipi angatr tune la kem a utipine la kuku ka huliwa koi nyidrë. 18 Nge tro hmaca epuni a öhne la eisapengönene la atr ka meköt me ka ngazo, memine la eisapengönene la atr ka nyihlue i Akötresie me ka tha nyihlue i nyidrëti kö.”