Iosua
3 Ame hnei Iosua hna canga ilë; hnei angeic me angetre Isaraela* asë hna tro qa Sitima uti hë la hneopegejë Ioridrano, nge hnei angatr hna meköl e cili qëmekene troa sasaithe la hneopegejë.
2 Thupene la köni drai, hnene la itre tane la nöj hna tro nyipine la lapa, 3 me amekötin kowe la nöj ka hape: “E öhne hë epuni la angetre Levi a xututhe* la Pua ne isisinyikeu i Iehova Akötresi epun, tro epun a tro qa cili me xötrethengen ej. 4 Ngo tro epuni a tro ananyine la pua koi 2 000 kubit,* nge tha tro kö epuni a easenyin ej, matre tro epuni a atre la gojenyi hnei epuni hna troa trongën, ke tha ase pala kö epuni trongëne la gojenyi cili.”
5 Matre öni Iosua jë hi kowe la nöj: “Ahmitrötrë epuni ju, ke ame elany, tro Iehova a kuca koi epun la itre ewekë nyine hain.”
6 Thupene lai, öni Iosua jë hi kowe la itre atre huuj: “Xututhe* jë la pua ne isisinyikeu, nge tro jë qëmekene la nöj.” Ame hnei angatr hna xututhe la pua ne isisinyikeu, me tro pa qëmekene la nöj.
7 Matre öni Iehova jë hi koi Iosua ka hape: “Ame enehila, tro ni a nyiqaane atrunyi ö qëmekene la nöje Isaraela asë, matre tro angatr a atre laka, tro ni a ce me eö tune lo eni a ce me Mose. 8 Hane hi la hnenge hna amekötin nyine tro eö a ahnithe kowe la itre atre huuj ka xututhe la pua ne isisinyikeu: ‘Ame ngöne la epuni a traqa ngöne la hneopegejë Ioridrano, tro jë ngöne la tim, nge pane cile ju e cili.’”
9 Matre öni Iosua jë hi kowe la angetre Isaraela: “Trohemi koi ni, nge drenge ju la itre trengewekë i Iehova Akötresi epun.” 10 Thupene lai, öni Iosua hmaca jë hi koi angatr ka hape: “Tro hë epuni a atre laka, hetre nyipi Akötresie thei epun, nge tro nyidrëti a helëne qa ngöne la nöj la angetre Kanana, me angetre Heth, me angetre Hivi, me angetre Perizi, me angetre Girigasa, me angetre Amora, me angetre Iebuzi. 11 Goeën! Tro la pua ne isisinyikeu ne la Joxu ne la fene hnengödrai asë, a tro pa qëmekei epun ngöne la hneopegejë Ioridrano. 12 Haawe, ame enehila, iëne jë la 12 lao trahmanyi qa ngöne la itre tribu ne Isaraela, ene la ca atr qa ngöne la isa ca tribu. 13 Ame hë la kola ketr la tim ne la hneopegejë Ioridrano hnene la waca ne la itre atre huuj ka xututhe* la Pua i Iehova, lo Joxu ne la fen asë, tha tro kö a neni la tim; tro ej a cil meköt tune la ketre ihag.”*
14 Matre ame hë la kola mejë me tro hnene la nöj, hnene la itre atre huuj hna tro pa qëmekei angatr memine la Pua Ne Isisinyikeu qëmekene troa sasaithe la Ioridrano. 15 Ame hë la itre atre huuj ka xututhe* la pua a traqa kowe la hneopegejë Ioridrano, nge angatr a ketr la tim qëmekei angatr (eje hi, ngöne la ijine menu, kola elë la hneopegejë Ioridrano uti hë la itre ölin ej), 16 ke tha neni pi hi la tim, nge ej a cil meköt kösë ihag ka nanyi qaathene la angetre Isaraela, hmekun e Adramu, ketre traon ezin e Zaretana. Ngo ame kö la tim ka uti kowe la hnagejë ne la Araba, lo Hnagejë Sotr,* ke eje pala hi a neni. Ngo tha neni hë la hneopegejë, matre hnene pë hë la nöj hna tro sasaith ej hmekun e Ieriko. 17 Hnene la nöje Isaraela asë hna trongë iwaca uti hë la angatr a ase sasaith la hneopegejë, ke itre atre huuj ka xututhe la pua ne isisinyikeu i Iehova a cil nyipine la hneopegejë hna aqaqacilën.