Levitiko

¹³ Öni Iehova hmaca jë hi koi Mose me Arona: 2 Maine kola cipa la ngönetrei ne la atr ngöne la ketre götran, maine kuthony, maine ka si ikutr nge kösë lepera,* tro ha tro sai angeic kowe la atre huuj, ene Arona, maine kowe la ketre nekö i angeic, ene la itre atre huuj. 3 Nge qa ne la atre huuj troa wange la mec ka ej ngöne la ikupein ne la itrei. Nge maine kola wië la itre pen hmekune lai mec, nge hna xeni la ikupein nge jui hë, lepera hi lai. Nge tro la atre huuj a goeëne lai mec, me jele pui ngazo angeic. 4 Nge maine wië hë la ikutr, nge tha jui kö la mec, nge tha wië kö la itre pen, qa ne la atre huuj troa ami angeice cas ngöne la ketre götran koi 7 lao drai. 5 Nge ame ngöne la hna 7 ne drai, qa ne la atre huuj troa wai angeice hmaca, nge maine tha kökötre kö nge tha xötre kö la mec ngöne la ikupein, tro hmaca ha ami angeice cas koi 7 lao drai.

6 “Nge ame ngöne la hna 7 ne drai, tro la atre huuj a wai angeice hmaca, nge maine meu trootro hë la mec, nge tha xötre kö ngöne la ikupein, tro hë la atre huuj a jele pui loi angeic, ke kuthonyi hi lai. Nge tro hë angeic a wasine la itre iheetre i angeic, nge pui loi hë angeic. 7 Ngo maine thupene la hna wai angeic hnene la atre huuj troa apuiloinyi angeic, nge kola kökötre la gaa kuthony* ngöne la ikupein, qa i angeic troa wange hmaca* la atre huuj. 8 Nge qa ne la atre huuj troa wange la gaa kuthony, nge maine kola kökötre ngöne la ikupein, tro hë la atre huuj a jele pui ngazo angeic, ke lepera hi lai.

9 “Nge maine kola tithe la ketre atr hnene la lepera, tro ha tro sai angeic kowe la atre huuj, 10 nge qa ne la atre huuj troa wang, maine kola wië la gaa cipa ne la kupeine la ngönetrei, nge kola ha wië la itre pen, nge kola xen la ijön hmekune la gaa cipa, 11 celë hi lepera ka lapa hut ngöne la ikupeine i angeic; nge qa ne la atre huuj troa jele pui ngazo angeic. Nge tha tro kö a ami angeice cas ngöne la ketre götran, ke pui ngazo hë angeic. 12 Ngo maine kola xötre la lepera ngöne la ngönetrei ne la atr, qane ju hi la he uti hë la lue waca, thenge la hna öhn hnene la atre huuj, 13 nge kola goeëne hnene la atre huuj lai atr, nge angeic a öhne laka, ase hë lapan asë la ngönetrei hnene la lepera, tro hë la atre huuj a jele pui loi* angeic. Nge pine laka, wië asë hë la ngönetrei angeic, pui loi hë angeic. 14 Ngo maine ka xeni la ijön, tro hë angeic a pui ngazo. 15 Nge maine kola öhn hnene la atre huuj laka, ka xeni la ijön, tro hë la atre huuj a jele pui ngazo angeic. Nge ame la ijön ka xen, ke ka pui ngazo. Celë hi lepera. 16 Ngo maine wië hmaca ha la ijön hna xen, qa i angeic troa wange la atre huuj. 17 Nge qa ne la atre huuj troa wange la atr. Maine wië hë la mec, tro hë la atre huuj a jele pui loi angeic.

18 “Maine kola cia la ketre thewek ngöne la kupeine ne la atr, nge meu hë ej, 19 nge maine hmekun la hna cia lai thewek, kola cipa me wië, maine hetre ketre ikutr ka wië waxamadra, tro angeic a amamane kowe la atre huuj. 20 Nge qa ne la atre huuj troa wange la ikutr. Nge maine hna xeni la ikupein nge jui hë, nge kola wië la itre pen, tro hë la atre huuj a jele pui ngazo angeic. Celë hi lepera ka cia qa ngöne la ithewek. 21 Ngo maine tro la atre huuj a goeën me öhne laka, pëkö pen ka wië, nge tha jui kö la mec, nge ej a xome hmaca la hane ngönetrei, qa ne la atre huuj troa ami angeice cas ngöne la ketre götran koi 7 lao drai. 22 Nge maine ej a kökötre trootro ngöne la kupein, tro hë la atre huuj a jele pui ngazo angeic, ke lepera hi lai. 23 Ngo maine tha kökötre kö la ikutr, ke itheweke lai ka idreuth, tro hë la atre huuj a jele pui loi angeic.

24 “Nge maine hna dreuthe la ketre atr hnei eë, nge kola mama la ijön, nge hmekune la hna dreuth, kola mama la ikutr, nge ej a wië waxamadra maine wië, 25 qa ne la atre huuj troa wange la ikutr. Nge maine kola wië la itre pen, nge hna xeni la ikupein nge jui hë, celë hi lepera ka fetra qa ngöne la thupen hna dreuth. Nge tro hë la atre huuj a jele pui ngazo angeic, ke lepera hi lai. 26 Ngo maine tro la atre huuj a goeën la ikutr, me öhne laka, pëkö pen ka wië, nge tha jui kö la mec, nge ej a xome hmaca la hane ngönetrei, qa ne la atre huuj troa ami angeice cas ngöne la ketre götran koi 7 lao drai. 27 Nge ame ngöne la hna 7 ne drai, qa ne la atre huuj troa wang maine hna kökötre la ikutr ngöne la ikupein ne lai atr, nge e cili, tro la atre huuj a jele pui ngazo angeic, ke lepera hi lai. 28 Ngo maine ame la ikutr, ej pala hi a lapa ngöne la hnen, nge tha kökötre kö, nge ej a wië qatresi, celë hi gaa cipa qa ngöne la thupen hna dreuth. Nge tro hë la atre huuj a jele pui loi angeic, ke ej a keu hmekune la hna dreuth.

29 “Nge maine hetre mec ne la ketre trahmany maine föe ngöne la he, maine ienaj, 30 tro la atre huuj a goeën la mec, nge maine hna xeni la ikupein nge jui hë, nge kola hmedr la itre pen nge tha tru kö, tro hë la atre huuj a jele pui ngazo angeic. Celë hi mec ngöne ienaj, maine watu ngöne he. Celë hi lepera ngöne la he maine ienaj. 31 Ngo maine tro la atre huuj a goeën la mec, laka, tha hna xeni kö la ikupein nge tha jui kö, nge pëkö pen ka wetrewetr, qa ne la atre huuj troa ami angeice cas ngöne la ketre götran koi 7 lao drai. 32 Nge ame ngöne la hna 7 ne drai, qa ne la atre huuj troa wange la mec, nge maine tha kökötre kö la mec, nge pëkö pen ka hmedr, nge tha hna xeni kö la ikupein, nge tha jui kö, 33 tro hë la atr a cinyi angeic, ngo tha tro kö angeic a cin hmekune lai mec. Nge qa ne la atre huuj troa ami angeice cas ngöne la ketre götran koi 7 lao drai.

34 “Nge ame ngöne la hna 7 ne drai, qa ne la atre huuj troa wange hmaca la mec, nge maine tha kökötre kö la mec ngöne ienaj maine watu ngöne he, nge tha hna xeni kö la ikupein nge tha jui kö, tro hë la atre huuj a jele pui loi angeic. Nge tro hë angeic a wasine la itre iheetre i angeic, nge pui loi hë angeic. 35 Ngo maine kola kökötre trootro lai mec ngöne la ngönetrei ne la atr, thupene la hna apuiloinyi angeic, 36 qa ne la atre huuj troa wange la atr. Nge maine kola kökötre la mec ngöne la kupeine i angeic, tha tro kö la atre huuj a thele la itre pen ka hmedr, ke pui ngazo hë angeic. 37 Ngo maine kola mama laka, tha kökötre kö ej, nge kola cia la itre pen ka wetrewetr, kolo lai a hape, meu hë la meci angeic nge pui loi hë, nge tro hë la atre huuj a jele pui loi angeic.

38 “Nge maine kola mama la ikutr ngöne la kupeine la ketre trahmany maine föe, nge itre ej a wië, 39 qa ne la atre huuj troa wang, nge maine kola wië qatresi la ikutr ngöne la kupeine la atr, kolo hi lai a hape, tha hna mecine kö. Ame la atre cili, ka pui loi angeic.

40 “Maine kola malamala la pene he ne la ketre atr, nge kola pa la he i angeic, ka pui loi angeic. 41 Maine kola malamala la itre pene he i angeic hune la göbadri, nge pa ha ngöne la götrane cili, ka pui loi angeic. 42 Ngo maine ngöne la gaa pa ne la he i angeic, maine göbadri angeic kola fetra la ketre kakötr ka wië waxamadra, ke lepera lai ka cia ngöne la gaa pa ne la he i angeic, maine göbadri angeic. 43 Qa ne la atre huuj troa wange lai atr, nge maine kola cipa la kakötr, nge ej a wië waxamadra hmekune la he ka pa, maine hune la göbadri, nge kösë lepera ngöne ikupein, 44 lepera ha angeic. Pui ngazo hë angeic, nge tro hë la atre huuj a jele pui ngazo angeic, pine la lepera ka ej hune la he i angeic. 45 Ngo ame la atre lepera, tro ha kuie zezenyi la itre iheetre i angeic, nge tha tro kö a nyinyawane la itre pene he i angeic, nge tro angeic a heetrëne la pene enaj i angeic, me sue ka hape: “Pui ngazo hë ni, Pui ngazo hë ni!” 46 Maine eje pala hi thei angeic la mec, ke tro pala hi angeic a pui ngazo. Nge pine laka, ka pui ngazo angeic, tro hë angeic a lapa cas tröne la lapa.

47 “Maine tro la lepera* a lapa ngöne la ketre iheetr hna kuca hnei pene mamoe maine lino, 48 maine ngöne la theiny ka cil, maine ngöne la theiny ka agö ne la imaano lino, maine ngöne la pene mamoe, maine ikupeine öni, maine nöjei ewekë hna kuca hnei kupeine öni, 49 nge maine tro la ikutr a hatr me hmedr, maine waxamadra, nge ej a lapane la iheetr, maine la ikupeine öni, maine la theiny ka cil, maine la theiny ka agö, maine nöjei ewekë hna kuca hnei kupeine öni, ke lepera hi lai, nge tro ha amaman kowe la atre huuj. 50 Nge qa ne la atre huuj troa goeëne la ikutr, me xome la ewekë hna lapan hnene lai mec, me amë acon koi 7 lao drai. 51 Nge maine angeic a goeëne la mec ngöne la hna 7 ne drai, nge angeic a öhne laka, kökötre hë ej hune la iheetr, maine ngöne la theiny ka cil, maine ngöne la theiny ka agö, maine ngöne la ikupeine öni, (maine nöjei aqane huliwane la kupeine öni), haawe, ame hi lai mec, ke lepera ka ixötrekeu. Tro hë la ewekë a pui ngazo. 52 Nge tro hë angeic a dreuthetrije la iheetr, maine theiny ka cil, maine theiny ka agö ngöne la pene mamoe, maine ngöne lino, maine nöjei ewekë hna kuca hnei kupeine öni ka si mec, ke celë hi lepera ka ixötrekeu. Tro ha dreuthetrij ej.

53 “Nge maine tro la atre huuj a goeëne lai mec, ngo tha hna lapan asë kö la iheetr, maine la theiny ka cil, maine la theiny ka agö, maine nöjei ewekë hna kuca hnei kupeine öni, 54 tro hë la atre huuj a upe troa wasine la ewekë hna lapan hnene lai mec, me amë acon ej koi 7 hmaca kö lao drai. 55 Nge qa ne la atre huuj troa goeëne lai mec ka ej ngöne la ewekë, thupene la hna wasin ej, nge maine tune pala hi lai mec nge tha kökötre kö, tro hë la ewekë a pui ngazo. Tro hë eö a dreuthetrij ej, ke hna xen e kuhu hnin me e kuhu trön.

56 Ngo maine tro la atre huuj a goeëne lai mec, nge ej a wië qatresi thupene la hna wasin, tro hë angeic a kuie zezene la götrane la iheetr hna lapan hnene lai mec, maine ngöne la kupeine öni, maine ngöne la theiny ka cil, maine ngöne la theiny ka agö. 57 Nge maine ej a mama ngöne la ketre götrane la iheetr, maine ngöne la theiny ka cil, maine ngöne la theiny ka agö, maine ngöne la nöjei ewekë hna kuca hnei kupeine öni, kolo hi lai a hape, ej a kökötr. Tro hë eö a dreuthetrije la nöjei ewekë hna lapan hnene lai mec. 58 Nge ame lai iheetr, memine la theiny ka cil, memine la theiny ka agö, maine nöjei ewekë hna kuca hnei kupeine öni, lo hnei ö hna wasin nge patre hë lai mec, qa i ö troa wasin ej hmaca, nge tro hë ej a pui loi.

59 “Celë hi wathebo kowe la lepera ka ej ngöne la iheetr hna kuca hnei pene mamoe, maine lino, maine ngöne la theiny ka cil, maine ngöne la theiny ka agö, maine ngöne la nöjei ewekë hna kuca hnei kupeine öni, matre troa jele pui loi maine pui ngazon.”