Esodro

22 “E tro la ketre trahmany a atrekënö kau maine mamoe, nge e tro angeic a humuth maine salemën, qa i angeic troa nyihnan hnei 5 lao kau, me 4 lao mamoe nyine nyihnane lo ca mamoe.

2 (“E hna ea la ketre atrekënö, nge maine hna lepi angeic nge meci pi hi, tha tro kö a upe zö së la meci angeic. 3 Ngo e hna traqa lai thupene la kola mejë la jö, easë la atrekë zöne la mec i angeic.)

“Tro hë angeic a kuiëne la thupen, nge maine pëkö ewekë i angeic, tro ha salemë angeic nyine thupene lai hna atrekënö. 4 Nge e mele pala kö thei angeice la hna atrekënö, ngacama kau maine boliko, maine mamoe, tro angeic a bëeke fë la öni hna atrekënö me nyixane hmaca hnene la ketre.

5 “Nge maine tro ketre a nue la itre si angeic ngöne la ketre hlapa, maine itre hlapa vin,* nge maine tro angeic a nue la itre si angeice troa xeni ngöne la hlapa ne la ketre atr, tro hë angeic a nyithupen hnene la hlapa i angeic ka cia hlöeë, maine hnene la hlapa vine i angeic ka cia hlöeë.

6 “Nge maine troa sesë la eë, me manith la itre sinöe ka ithiny ka lapalapa, me dreuthe la qitre hna akein, me itre qitr ka cil memine la hlapa, tro ha nyithupen hnene la atre man.

7 “Maine tro la ketre atr a amë thei ketre la trenge mani, maine itre ewekë nyine troa thupën, nge atrekënö pi hi qa ngöne la hnalapa i angeic, nge maine troa ea la atrekënö, tro angeic a bëeke fë la hna atrekënö me nyixane hmaca. 8 Ngo e tha öhne pala kö lai atrekënö, tro ha tro fë la atrekë hnalapan kowe la nyipi Akötresie, matre atre jë ka hape, angeice kö la ka xome* la ewekë ne la atre lapa ezi angeic. 9 Ame göi itre hna amekötin göne la troa xome menun la ifekë ewekën, tune la kau, maine boliko, maine mamoe, maine iheetr, maine nöjei ewekë ka patr, nge kola qaja ka hape, ‘Ewekënge la!’ Tro hë nyidro a ce tro fë la jol kowe la nyipi Akötresie. Nge ame la atre hnei Akötresie hna troa amaman, tro angeic a bëeke fë la hna atrekënö me nyixane hmaca.

10 “E tro la ketre atr a ahnithe la si angeic kowe la atre lapa ezi angeic, boliko, maine kau, maine mamoe, maine ketre si angeice pena nyine troa thupën, nge meci ju hi, maine thatreine tro, maine hna xome juetrën, 11 tro la atre thupë öni a sisiny qëmeke i Iehova laka, tha hnei angeice kö hna atrekënö la si ne la atre lapa ezi angeic, nge tro la atrekë sin a kapa. Tha tro kö la ka thupë öni a kuië thupen. 12 Ngo e hna atrekënö la öni, tro hë angeic a kuië thupen kowe la atrekë sin. 13 Nge e troa heje thaitrëne la öni hnene la ketre öni wael, tro angeic a tro fë ej nyine anyipicin. Tha tro kö angeic a kuië thupen la öni hna heje thaitrëne hnei öni wael.

14 “Ngo maine tro la ketre atr a sipone la öni ne la atre lapa ezi angeic, nge thatreine pi tro maine mec la öni, nge patre kö lai atrekë sin, tro hë la atre sipo a nyithupen. 15 Ngo maine cememine hi la atrekë sin, tha nyipiewekë kö troa nyithupen. Ke maine ase hë nyithupene la öni, tha nyipiewekë hmaca kö troa nyithupen.

16 “Nge maine tro la ketre trahmany a wesiwesi kowe la ketre jajiny ka tha iatre petre kö me trahmany, nge e tro angeic a ce meköle memin, tro hë angeic a kuië june hmala matre tro nyën a föi angeic. 17 Ngo maine xele kö la keme ma nue nyën, tro la trahmany a kuiëne la thupene ka ihmeku memine la june hmala.

18 “Tha tro kö eö a nuamelene la föe ka trene iöni.

19 “Ame la atre ce meköl me öni, tro ha humuth.

20 “Ame la atre huuje kowe la ketre haze, ngo tha koi Iehova hmekuje hi, tro ha humuthi* angeic.

21 “The tro kö eö a qanangazone la trenyiwa, me akötrë angeic, ke hnei epuni lo hna lapa trenyiwa e Aigupito.

22 “The tro kö epuni a akötrëne la sine föe, memine la nekön hna mecitrij hnei kem. 23 Nge maine tro eö a akötrë angatr, nge e tro angatr a treije koi ni, tro hë ni a dreng la itre treije i angatr, 24 tro ha tru la elëhning, nge tro ni a humuthi epuni hnei taua. Nge tro la itre föe i epuni a sine föe, nge tro ha pë kemen la itre nekö i epun.

25 “Nge e tro eö a hamë mani kowe la ka pë ewekë,* atre lapa ezi eö, ngöne la nöjeng, the tro kö eö a tune la itre ka ham göi thupen, nge the hë thupene kö koi angeic.

26 “Nge e tro eö a xome nyine anyipicin* la iheetre ne la atre lapa easenyi eö, tro hmaca eö a hamën ej qëmekene troa lö la jö. 27 Ke celë hi sipu balaiketre i angeic, iheetr ka atuthe la ngönetrei* angeic. Nge tro pë hë angeic a meköl ngöne nemen? Nge e tro angeic a treije koi ni, tro ni a dreng, ke ame ni, ka atreine itrotrohni.

28 “The tro kö eö a eji* Akötresie, me ejine la ketre tane hnine la nöje i eö.

29 “The tro kö eö a hmitre troa hamën la sine la hnei eö hna menuën atrun, me zane wene sinöe i eö qa ngöne la hnë weje wene sinöe* i eö. Nge tro eö a hamë ni la pane nekö i eö trahmany. 30 Hane hi la nyine tro eö a kuca kowe la kau i eö, me mamoe i eö, tro nyën a lapa koi 7 lao drai memine la thine i nyën, nge ngöne la hna 8 ne drai, tro eö a hamë ni.

31 “Qa i epuni troa hmitrötre koi ni. The tro kö epuni a öni la mitr hna heje thaitrëne hnene la öni wael ngöne la itre hlapa. Ngo tro pe epuni a kuiën kowe la itre kuli.