Ieremia
15 Ame hnei Iehova hna qaja koi ni ka hape: “Ngacama tro ju hë Mose me Samuela a cil qëmekeng, ngo tha tro kö ni a hnime la nöje ce. Helë angatre pi qëmekeng, loi e tro angatr a patr! 2 Nge maine tro angatr a hnying ka hape: ‘Tro huni a tro ië?’ Tro hë eö a sa ka hape: ‘Hane hi la hna qaja hnei Iehova:
“Ame la itre ka troa mec hnene la meci ka ixötrekeu, nue angatre pi kowe la meci ka ixötrekeu!
Ame la itre ka troa meci hnei taua, nue angatre pi kowe la taua!
Ame la itre ka troa meci hnei mecijiin, nue angatre pi kowe la jiin!
Nge ame la itre ka troa mec ngöne la nöje trenyiwa, nue pi troa xomi angatr a tro cili!”’
3 “‘Eje hi, tro ni a upe koi angatr la 4 lao akötr,’* öni Iehova, ‘ene la taua troa ihumuth, me itre kuli matre hule zozon, me itre waco me itre öni wael matre troa öni me apatren. 4 Eje hi, tro ni a kuca matre tro la nöjei baselaia ne la fen a xouene la ka traqa koi angatr, pi Manase nekö i Hezekia joxu ne Iudra, nge pine la hnei angeic hna kuca e Ierusalema.
5 Ierusalema fe, drei la ka troa utipi ö?
Drei la ka troa treije pi ö?
Nge drei la ka troa cil matre troa pane hnyingë pengö i ö?’
6 ‘Ase hë eö nuetriji ni,’ öni Iehova.
‘Hnei ö hna hutrö* koi ni.
Celë hi matre, tro ni a xejë la imeng troa haji ö me apatrenyi ö.
Hmanono hë ni hna utipi ö.*
7 Tro ni a jume draië angatr memine la ifurc, ngöne la qëhnelö ne la itre traon ne la nöj.
Tro ni a cipa nekönatr koi angatr.
Tro ni a lep apatrene la nöjeng,
Ke xele kö angatr ma nue la itre huliwa ka ngazo i angatr.
8 Troa tiqa catre kö la itre sine föe thei angatr qëmekeng, hune la itre wene ngöni ne hnagejë.
Tro ni a upe la atre apatren e midi troa lepi angatr, itre thin me itre nekö trahmany.
Tro hë ni a aca tro lepi angatr hnei xou me hmengöhmengön.
9 Kucakuca ha la föe ka hnahone la 7 lao nekönatr;
Thatreine hë eahlo mano hnyawa.
Meköle hë la jö i eahlo, ngacama lai pala kö,
Matre traqa pi la hmahma me ithaipië.’*
‘Nge ame pë hë la munën thei angatr
Tro ni a nue angatr kowe la taua ne la itre ithupëjia,’ öni Iehova.”
10 Ekölöhini nenë, hnauëne laka, hnaho ni pi hnei eapo?
Meci hë ni hna lapaa wesitrën me elëhni kow hnene la nöj asë.
Pëkö ewekë hnenge hna hamën me sipon,
Ngo angatr asë hi a eji ni.
11 Öni Iehova jë hi: “Eje hi, tro ni a xatua eö;
Eje hi, tro ni a isigöli ö qëmekene la ithupëjia,
Ngöne la ijine ngazo, me ngöne la ijin akötr.
12 Hapeu, atreine kö la atr troa hutra la fao,
Lo fao ka xulu qa kolopi, maine hutra la kopa?
13 Tro ni a nue la itre ewekë me itre mo i ö matre troa atrekënö,
Ngo tha göi thupene kö, ngo matre troa të la itre ngazo hnei ö hna kuca ngöne la nöj asë.
14 Nge tro pë hë ni a hamën kowe la itre ithupëjia
Matre tro angatr a xom kowe la nöj hnei ö hna thatre.
Ke hnene la elëhning hna amelene la ketre eë,
Ka mel matre dreuthetriji epun.”
15 Iehova fe, atre hi nyipëti la ka traqa koi ni,
Meku ni kö nge wai ni ju.
Të jë kowe la itre ka axösisi ni.
The hmitre kö troa elëhni, wanga tro angatr a humuthi ni.*
The thëthëhmine kö laka, eni a xomihnine la hmahma pine la ëje i nyipë.
16 Ame lo eni a öhne la itre trengewekë i nyipë, ke hnenge hna xen;
Nge hnene la trengewekë i nyipë matre elitrauje pi la madrin e kuhu hning,
Ke ëje i nyipë la hnenge hna xom, Iehova Akötresi ne la itre trongene isi e hnengödrai.
17 Tha eni kö a ce lapa me itre ka madri feet.
Eni a lapa cas, ke ej e hung la ime i nyipë,
Eje hi, hnei nyipëti hna atiqanyi ni hnei elëhni.*
18 Hnauëne laka, tha patre kö la akötreng, nge tha meu kö la eatreng?
Xele kö eje ma meu.
Hapeu, tro kö nyipëti a tune la hnë tha tim ka iaö ni
Nge tha nyine tro kö a mejiune kow?
19 Matre hane hi la hna qaja hnei Iehova:
“Maine tro eö a bëeke hmaca, tro hë ni a aloinyi ö,
Nge tro hë eö a cil qëmekeng.
Maine tro eö a isa amë la ka sisitria memine la ka pë eloin,
Tro hë eö lai a qeneqajang.
Tro angatr a thel eö,
Ngo tha qanyi ö kö troa thele angatr.”
20 “Eni a kuca matre tro eö a tune la hage kopa ka catr nyipine la nöje ce.
Tro angatr a isi me eö,
Ngo tha tro kö angatr a hun,*
Ke ce eni me eö matre thupë eö me amele eö,” öni Iehova.
21 “Eje hi, tro ni a thepe eö qa ngöne la ime ne la itre atr ka ngazo
Nge tro hmaca kö ni a itö eö qa ngöne la hnatrapaime ne la itre atr ka pë utipin.”