Hnaaluene Tus i Aqane Lapa Itre Joxu

20 Thupene lai, hnei angetre Moaba me Amona, memine la sine la angetre Amoni* hna traqa troa isi me Iehosafata. 2 Nge hna thuemacanyi Iehosafata ka hape: “Kola traqa troa isi me nyipë hnene la ka ala nyim. Angatr a elë qa ngöne la itre götrane Edoma ezine la hnagejë,* hmekun e Hazazotamara, ene Eni-gedi.” 3 Ame hnei Iehosafata hna xou, nge nyidrëti a thele* Iehova jë, me amekötin tro Iudra asë a tha xen. 4 Matre hnene la angetre Iudra hna icasikeu troa hnyinge koi Iehova. Angatr a traqa qa ngöne la nöjei traon ne Iudra troa hnyinge koi Iehova.

5 Ame hnei Iehosafata hna cil qëmekene la icasikeu ne Iudra me Ierusalema, hnine la uma ne hmi Iehova, qëmekene la götrane gaa pë ihakun ka hnyipixe. 6 Nge öni nyidrë:

“Iehova fe Akötresi ne la itre qaaqaa hun, hapeu, tha Akötresieti kö nyipë e koho hnengödrai? Tha nyipëti kö la ka mus hune la nöjei baselaia e cailo fen? Ngöne la ime i nyipë la trengecatre me men, pëkö ka atreine cile koi nyipë. 7 Akötresi huni fe, hapeu, tha nyipëti kö lo ka helëne la itre atrene la nöje celë, lo kola lö hnene la nöje i nyipë Isaraela? Thupene lai, hnei nyipëti hna hamëne la nöj, nyine edrö kowe la itre matran ne la sinee i nyipë, Aberahama. 8 Hnei angatre hna lapa e cili, me xupe la uma ne hmi thatraqane la ëje i nyipë, me hape: 9 ‘E traqa pi hë akötrë hun, maine hnei taua, maine hnei ieji, maine hnei meci ka ixötrekeu, maine hnei jiinë xen, tro hë huni a cil qëmekene la uma celë, me qëmeke i nyipë. (Ke hnine la uma celë la ëje i nyipë.) Ngöne la akötre hun, tro huni a sipo ixatua koi nyipë, nge ame nyipë, epi tro nyipëti a dreng me amele hun.’ 10 Ngo enehila, camijë hë la angetre Amona, me Moaba me itre atrene la itre wetr ne Seira, lo hnei nyipëti hna sewe Isaraela troa thapa la itre nöj i angatr, thupene lo Isaraela a tro qa Aigupito. Hnei angetre Isaraela hna jea, me nuamelene la itre nöje cili. 11 Ngo enehila, itre atre cili a traqa troa helë huni qa ngöne la hnepadro i nyipë, lo hnei nyipëti hna hamën nyine edrö hun. 12 Haawe, Akötresi huni fe, tha tro kö nyipëti a të koi angatr? Pëkö hne huni hna atrein qëmekene la ka ala nyimu celë, itre ka traqa troa isi me eahun. Pëkö hne huni hna atreine kuca, ngo casi hi, itre luemeke hun a ujë koi nyipë.”

13 Ngöne la ijine cili, angetre Iudra asë a cil qëmeke i Iehova, ce angatr me itre föi angatr me itre neköi angatr,* nge uti fe hë la itre ka co.

14 Ame hna huliwa la ua i Iehova hui Iaziela nyipine la icasikeu. Angeice la nekö i Zakaria, nekö i Benaia, nekö i Ieiela, nekö i Matania qa Levi, ketre nekö i Asafa. 15 Öni Iaziela: “Drenge hnyawa ju epun, angetre Iudra asë, me itre ka lapa e Ierusalema, me nyipëti fe Iehosafata joxu. Hane hi la hna qaja hnei Iehova: ‘The xou kö, nge the hmengöhmengöne kö, pine la ka ala nyimu celë, ke tha isi epuni kö, ngo isi Akötresieti pe. 16 Elany, uti pi koi angatr, ke tro angatr a elë qa ngöne la gojenyi ne Ziz. Tro hë epuni a öhnyi angatr ngöne la pune la hnathup, qëmekene la hnapapa e Ieruela. 17 Tha tro kö epuni a isi, cile ju hi e cili, nge the enije kö, nge goeëne jë la aqane tro Iehova a amele* epun. Iudra fe me Ierusalema, the xou kö nge the hmengöhmengöne kö. Elany, uti pi koi angatr, nge tro Iehova a ce me epun.’”

18 Ame hnei Iehosafata hna canga thil ipië, nge hnei Iudra asë me itre atrene Ierusalema, hna sa iwatingöneca qëmeke i Iehova, matre atrunyi Iehova. 19 Thupene lai, hnene la angetre Levi, itre matra i Kohatha me Kora, hna mejë troa sue me atrunyi Iehova Akötresi Isaraela.

20 Ngöne la drai thupen, hnei angatr hna canga ilë me tro kowe la hnapapa e Tekoa. Nge ame la angatr a tro, hnei Iehosafata hna cile qëmeke i angatr me hape: “Pane drei ni ju angetre Iudra me itre ka lapa e Ierusalema! Lapaune ju koi Iehova Akötresi epun, matre atreine jë epun cile catr.* Lapaune ju kowe la itre perofeta i nyidrë, nge tro ha tro loi koi epun.”

21 Thupene la hna pane hnying kowe la nöj, nyidrëti a iëne jë la itre xa trahmanyi ka troa tro qëmekene la itre ka cile fë jia ne isi. Tro angatr a heetrë iheetr ka hmitrötr, me nyima koi Iehova, me atrunyi nyidrë me hape: “Olene jë koi Iehova, ke ka cile hut la ihnimi nyipici i nyidrë.”

22 Ame ju hi la angatr a nyiqaane nyimane la itre nyima nyine iatruny, hnei Iehova hna asesëkötrëne la angetre Amona, me Moaba, me itre atrene la itre wetr ne Seira, lo itre ka thele troa thepe Iudra, matre angatr a itö ihumuthi jë. 23 Hnene la angetre Amona me Moaba, hna cile kowe la itre atrene la itre wetr ne Seira, troa lep me humuthi angatr. Ase jë hi, hnei angatr hna itö ihumuth.

24 Matre ame hë la angetre Iudra a traqa kowe la ita ne thup ngöne la hnapapa, me goeëne la ka ala nyim, öhne ju hi angatre la itre ngönetrei ka mec a kola imeköleny, pëkö ca ka mel. 25 Ame hnei Iehosafata me nöje i nyidrë, hna tro troa thapa la itre mo i angatr. Nyimutre la itre mo hnei angatre hna öhn, me itre iheetr, me itre ewekë ka tru thupen, nge thatreine hmaca kö angatre xom. Köni drai hnei angatre hna pane eöth me bëeke fë la itre mo, ke nyimutre catre pala ha. 26 Nge ame hë la hna 4 ne drai, hnei angatr hna icasikeu ngöne la hnathup ne Beraka, me atrunyi* Iehova. Celë hi matre hëne jë la hnathupe cili ka hape, Beraka. Nge uti pala hi enehila, hna hëne tune la hnathupe cili.

27 Ame hnene la nöjei trahmanyi ne Iudra me Ierusalema, hna xötrethenge Iehosafata a tro Ierusalema, nge angatr a madrin. Eje hi, hnei Iehova hna amadrinëne la hni angatr, ke hnei nyidrëti hna aijijë angatr troa ngaane la itre ithupëjia me angatr. 28 Angatr a lö ju e Ierusalema memine la itre nyine elo miuzik ka hetre filen, me itre arp, me itre trutru. Nge angatr a tro ju kowe la uma ne hmi Iehova. 29 Nge ame hë la itre nöje xötreith a drenge laka, hnei Iehova hna isi memine la itre ithupëjia me Isaraela, angatr a xoue Akötresieti ju. 30 Qa ngöne lai, hna mele tingeting fene la mus i Iehosafata, nge hnene pala hi la Akötresi nyidrë hna hamë tingeting xötreithi Iehosafata.

31 Hnei Iehosafata hna musi hui Iudra. Traqa koi 35 lao macatre i Iehosafata lo kola acili joxu nyidrë. Nge hnei nyidrëti hna musi koi 25 lao macatre e Ierusalema. Azuba la ëjene la thine i nyidrë, nge eahlo la nekö i Silehi. 32 Hnei Iehosafata hna tui Asa keme i nyidrë, nge tha hna jea kö qa ngöne la tulu ne la keme i nyidrë, hnei nyidrëti hna kuca la loi qëmeke i Iehova. 33 Ngo tha hna apatrene kö la itre hnë hmi gaa hmitrötr, nge tha hnëkëne hnyawa kö la nöj la hni angatr troa thele la Akötresi ne la itre qaaqaa i angatr.

34 Nge ame la mele i Iehosafata, hna fejan asë qane la qan uti hë la pun, hnine la itre tus i Iehu nekö i Hanani, lo amë hnine la itusi ne la mele ne la itre joxu ne Isaraela. 35 Thupene lai, hnei Iehosafata joxu ne Iudra hna isisinyikeu me Ahazia joxu ne Isaraela, lo joxu ka ngazo thiina. 36 Matre hnei nyidro hna ce huliwa troa cane la itre he ne tro Tasesa. Hnei nyidro hna ca ihe e Eziona-gebera. 37 Ame hnei Eliezera nekö i Dodava qa Maresa hna perofetane koi Iehosafata, ka hape: “Pine nyipë sisinyi me Ahazia, tro hë Iehova a apatrene la hnei nyipëti hna can.” Qa ngöne lai, hna lö la itre he, matre tha traqa ju kö angatr e Tasesa.