Isaia
8 Öni Iehova koi ni: “Xome jë la lue etë ka tru, nge cinyianyine jë memine la ketre peen* ka hape, ‘Mahera-Salala-Hasa-Baza.’* 2 Nge loi e troa anyipicine lai hnene la lue temoë ka mele nyipici, ene Uria atre huuj, me Zakaria nekö i Ieberekia.”
3 Thupene lai, hnenge hna ce meköl* memine la perofeta föe,* nge hnei angeic hna upune me hnaho nekö trahmany. Matre öni Iehova koi ni: “Ati ëje i nyëne jë, Mahera-Salala-Hasa-Baza, 4 ke qëmeken tro la nekönatr a atreine qaja ka hape, ‘kaka’ me ‘nenë,’ tro ha thapa la itre mo qa Damaseko me Samaria, me tro fë kowe la joxu ne Asuria.”
5 Nge öni Iehova hmaca koi ni:
6 “Pine laka, hnene la nöje ce hna xelene la tim ka neni hmidra ne Siloa*
Me madri Rezina memine la nekö i Remalia,
7 Haawe, tro hë Iehova a axulune koi angatre la itre tim
Ka catr nge ka ihul ne la Hneopegejë,*
Ene la joxu ne Asuria memine la lolo i angeic.
Tro ha elë la hneopegejë
Me sasaithe la itre ölin ej
8 Me heti Iudra.
Nyipici, tro ha di me heetrëne la nöj, me elë draië uti hë la nyinawa;
Tune la ketre waco, tro ej a seluthe la lue iape ne ej, me hakuth asë la nöje i ö,
Emanuela!”*
9 Itre nöje fe, akötrëne jë, ngo tro ha lep anyilanyilanyi epun.
Drenge ju, epun itre ka traqa qa ngöne la itre götran gaa nanyi ne la fen!
Hnëkë jë troa isi, ngo tro ha lep anyilanyilanyi epun!
Hnëkë jë troa isi, ngo tro ha lep anyilanyilanyi epun!
10 Hnëkëne jë la aqane tro epuni a isi, ngo tha tro kö lai a eatr!
Qaja jë la mekuna i epun, ngo tha tro kö lai a traqa,
Ke ce Akötresieti me eahun!*
11 Pine laka, eje hung la ime ka catr i Iehova, hane hi la hnei nyidrëti hna qaja, matre tha tro kö ni a xome la thiina ne la nöje ce:
12 “Tha tro kö epuni a hën ka hape, nyinyithiina la hna jele nyinyithiinan hnene la nöje ce!
The xouene kö la hnei angatre hna xouen;
Epi tha tro kö lai a ahmengöhmengönë epun.
13 Tha tro kö epuni a thëthëhmin laka, Iehova joxu ne la itre trongene isi e hnengödrai la ka hmitrötr,
Nyidrëti la nyine tro epuni a xouen,
Nge tro epuni a hmengöhmengön qëmekei nyidrë.”
14 Ame kowe la lue Baselaia* ne Isaraela,
Tro nyidrëti a tune la ketre hnë hmi
Me tune la etë ka iakeiny
Me tune la git hna kei kow,
Nge ame kowe la itre atrene Ierusalema
Tro hë nyidrëti a tune la ifile me itheth.
15 Ala nyimu thei angatr la ka troa kei me mala, me eatr;
Tro ha tra thethi angatr me ee angatr.
17 Tro pala kö ni a treqe* Iehova, lo ka tha semesinene* la itre matra i Iakobo. Nyipici, tro ni a mejiune koi nyidrë.
18 Goeën! Ame ni me itre neköng qaathei Iehova, ke eahuni la itre hatren e Isaraela, me itre iamamanyikeu qaathei Iehova joxu ne la itre trongene isi e hnengödrai, lo atre lapan la wetre Ziona.
19 Nge maine troa upi epun ka hape: “Hnyinge jë kowe la itre ka ithanata me itre ka mec, maine itre ka qajaqaja la drai elany, ene la itre ka iulili me trehmutrehmu” ... Ngo hapeu, tha qa ne la nöje kö troa hnying kowe la Akötresi angeic? Tro kö a hnying kowe la itre ka mec thatraqane la itre ka mel? 20 Loi pe tro angatr a thel ngöne la itre wathebo me itre hna cinyianyin!
Maine tha ka ihmeku kö la hne së hna qaja memine la trengewekë celë, ke tro ha patre la lai* the së. 21 Tro hë angatr a isa trongëne la nöj, me hleuhleu, me mecijin; nge e mecijine hë angatr me hleuhleu, tro hë angatr a gala draië me ejine la joxu i angatr, memine la Akötresi angatr. 22 Nge ame la angatr a troa goeëne la ihnadro, ke tro pe hi angatr a öhne la akötr, me mehlöhlem, me jidr, me itre ijine jol, me mit, nge patre hë la lai.