Salamo
Thatraqane la atre jumi traem;* nyine nyiman cememine la itre nyine elo miuzik ka hetre filen. Salamo i Dravita.
4 Akötresinge fe ka meköt, pane sa jë koi ni la eni a hë koi nyipë.
Hnëkëne jë la jë ne kötreng* ngöne la eni a akötr.
Epi kepe ni hnei nyipë me drenge la thithing.
2 Itre nekö i atre fe, uti hë eu la tro epuni a nyihnan la lolong hnei hmahma?
Uti hë eu la tro epuni a ajane la ka pë alien me thele la thoi? (Sela)
3 Atre ju laka, hetre aqane* tro Iehova a nyipine la ka mele nyipici koi nyidrë;
Tro kö Iehova a dreng la eni a hë koi nyidrë.
4 Wesitre jë, ngo the kuca kö la ngazo.
Ithanata jë e kuhu hni i epun, ngöne la hnë meköle i epun, nge lapa thaupu ju. (Sela)
5 Tro fë jë la itre huuj ka meköt,
Nge mejiune ju koi Iehova.
6 Ala nyimu la itre atr ka qaja ka hape: “Drei la ka troa amamai së la ewekë ka loi?”
Iehova fe, epi troa thina hun hnene la lai ne la qëmeke i nyipë.
7 Hnei nyipëti hna amë e kuhu hning la madrin ka sisitria kö
Hune la itre ka menuën atrun la qitr me waina ka hnyipixe.
8 Tro hë ni a saaju me meköle tingeting,
Ke Iehova fe, nyipëti hmekuje hi la atre alapa ni ngöne la gaa tingeting.