Salamo
Thatraqane la atre jumi traem. Salamo i Dravita.
31 Iehova fe, eni a zae thei nyipë.
Epi tha tro kö ni a hmahma.
Amele ni jë thenge la meköt i nyipë.
2 Alemine jë* la hnangenyë i nyipëti koi ni.
Canga amele ni jë.
Epi tro nyipëti a tune la wetr thatraqai ni, kösë hunapo ka catr,
Ketre götran hna ekögölith matre thupëne la meleng.
3 Eje hi, nyipëti la giting me hunapong;
Pine la ëje i nyipë, tro nyipëti a eatrongë ni me xometrongë ni.
4 Tro kö nyipëti a amele ni qa ngöne la ifile hna seluthe juetrëne koi ni,
Ke nyipë la traoneng hna eköhagen.
5 Eni hë la a nue la meleng koi nyipë.
Hnei nyipëti hna itö ni Iehova fe, Akötresie ka nyipici.
6 Cane methinge la itre ka nyihluene la itre idrola ka pë alien,
Ngo ame ni, eni kö a mejiun koi Iehova.
7 Tro hë ni a madrin atrun kowe la ihnimi nyipici i nyipë,
Ke hnei nyipë hna öhne la aqane hleuhleung;
Drenge hi nyipë la etrune la akötreng.
8 Tha hnei nyipëti kö hna nue ni kowe la ithupëjia,
Ngo nyipëti a acili ni ngöne la gaa xeut.*
9 Iehova fe, pane kepe ni ju, ke eni a akötr.
Genyi hë la luemekeng me ngönetreing hna seseu.
10 Kucakuca ha la meleng hnei akötr
Me itre macatreng hna awe.
Ae trootro hë la trengecatreng pine la ngazong;
Hnyiqetre trootro hë la itre juneng.
11 Kola methinë ni hnene la itre ithupëjiang asë,
Ene la itre ka lapa ezing.
Nge kola xoue ni hnene la itre ka atre ni;
Ame la angatr a öhnyi ni ngöne la gaa tru atr, angatr a kötre ni.
12 Hna thëthëhmi ni nge patre hë ni e kuhu hni i angatr, kösë meci hë ni;
Eni a tune la trengene tim hna thë akaqan.
13 Drenge hë ni la itre ixöjetrij ka nyimutre;
Kola kanothi ni hnene la xou atraqatr.
Ke ame la angatr a cas matre cile koi ni,
Angatr a thele la aqane troa humuthi ni.
14 Ngo eni kö a mejiune koi nyipë, Iehova fe.
Öning: “Nyipëti la Akötresing.”
15 Thei nyipëti hë la itre drai ne la meleng.*
Amele ni jë qa ngöne la imene la itre ithupëjiang me itre ka axösisi ni.
16 Ahudrumene jë la qëmeke i nyipë hune la hlue i nyipë.
Amele ni jë hnene la ihnimi nyipici i nyipë.
17 Iehova fe, epi tha tro kö ni a hmahma la eni a hë koi nyipë.
Loi e tro pe la itre atr ka ngazo a hmahma;
Loi e tro angatr a lapa thaup ngöne la Hua.*
18 Loi e tro la itre ukeineqë ka thoi a hum,
Lo itre ukeineqë ka qaja angazone la atr ka meköt cememine la pi tru, me pi draië.
19 Tha nyine qaja kö la etrune la lolo i nyipë!
Hnei nyipëti hna hnëkën ej thatraqane la itre ka xoue nyipë,
Nge hnei nyipëti hna amaman ej kowe la nöjei atr asë, ene lo itre ka zae thei nyipë.
20 Tro kö nyipëti a juetrë angatr ngöne la gaa sihngödr qëmeke i nyipë
Matre nanyi pi angatr qa ngöne la nyinyithiina ne la itre atr;
Tro nyipëti a pane ami angatr ngöne la hnë zae nyipë
Matre nanyi pi angatr qa ngöne la itre iwesitrë.*
21 Loi e troa atrunyi Iehova,
Ke hnei nyidrëti hna amamane koi ni la elolone la ihnimi nyipici i nyidrë, ngöne la traon hna cile xötreith hnene la itre ithupëjia.
22 Ngo ame ni, hnenge hna meci hnei xou me hape:
“Tro hë ni a mec qëmeke i nyipë.”
Ngo ame ju hi la eni a hë nyipë, hnei nyipëti hna drenge la itre xëweng.
23 Hnimi Iehova jë epun itre ka mele nyipici!
Iehova a thupëne la itre ka mele nyipici,
Ngo hace catre la aqane nyithupene nyidrë kowe la itre ka pi tru.
24 Catre pi, nge hni ne trahmanyi jë,
Epuni asë angetre treqe Iehova.