Salamo
Thatraqane la atre jumi traem; ngöne la nin: “The apatrene kö.” Mikitam* i Dravita. Ngöne la ijine Saulo a upe la itre atr troa thupëne la uma i Dravita,* matre humuthi angeic.
59 Akötresinge fe, amele ni pi qaathene la itre ithupëjiang;
Thupë ni ju qa ngöne la itre atr ka cile koi ni.
2 Thepe ni pi qaathene la itre ka iakötrë,
Nge amele ni pi qaathene la itre atr ka isi.*
3 Goeën! Angatr a tra thethi ni;
Iehova fe, itre atr ka catr a uti koi ni
Ngo tha hnene kö laka, hnenge hna icilekeu me kuca la ngazo.
4 Ngacama pëkö ngazo hnenge hna kuca, ngo angatr a nyinyap me hnëkë troa lepi ni.
Cile jë ngöne la eni a hë nyipë, nge goeëne jë.
5 Ke ame nyipë Iehova, Joxu ne la itre trongene isi e hnengödrai, nyipëti la Akötresi Isaraela.
Hlë jë troa xatuane la nöjei nöj.
The utipine kö la itre atre celë ka iaö. (Sela)
6 Angatr a bëek e nöjei jidr;
Angatr a ho* tune la itre kuli, me tro kanothe la traon.
7 Goeëne la ka cua qa ngöne la që i angatr;
Kola tune la itre taua la ukeineqë i angatr,
Ke öni angatr: “Drei la ka dreng?”
8 Ngo ame nyipë Iehova fe, tro nyipëti a hnyimasai angatr;
Tro nyipëti a hnyima fë la nöjei nöj asë.
9 Trengecatrenge fe, tro ni a thele nyipë;
Ke Akötresieti la hnë zaeng* ka catr.
10 Tro kö a xatua ni hnene la Akötresie ka amaman la ihnimi nyipici i nyidrëti koi ni;
Tro Akötresieti a aijijë ni troa goeën la kola kei la itre ithupëjiang.
11 The humuthi angatre kö, wanga thëthëhmine pi la nöjeng.
Iehova fe petre hun, epi tro nyipëti a isa ije angatr hnene la mene i nyipë;
Epi tro nyipëti a akeinyi angatr.
12 Pine la itre tria ne la që i angatr, me itre trengewekë ne la ukeineqë i angatr,
Loi e tro angatr a jötr hnene la pi tru i angatr,
Ke hnei angatr hna ieji me qaja trongëne la thoi.
13 Humuthi angatre pi ngöne la elëhni i nyipë;
Humuthi angatre pi matre patre pi angatr;
Amamane jë koi angatr ka hape, Akötresieti la ka mus nyipi Iakobo, nge uti hë la itre cane la fene hnengödrai. (Sela)
14 Epi tro angatr a bëeke hmaca e jidr;
Epi tro angatr a ho tune la itre kuli, me tro kanothe la traon.
15 Epi tro angatr a kano agö me thele xen;
Epi tha tro kö angatr a xeni mej, me öhnyi hnë lapa.
16 Ngo ame ni, tro ni a nyimane la ecatre i nyipë;
E hmakany, tro ni a madrine troa porotrikëne la ihnimi nyipici i nyipë.
Ke nyipëti la hnë zaeng ka catr
Me ketre hnë zae ngöne la ijin akötr.
17 Trengecatrenge fe, tro ni a nyimane la itre nyine iatrun* koi nyipë,
Ke Akötresieti la hnë zaeng ka catr, lo Akötresieti ka amamane la ihnimi nyipici i nyidrëti koi ni.