Salamo
91 Ame la atre lapa ngöne la gaa sihngödr ne la Ka Draië Catr
Ke tro ha lapa fene la iahnue ne la Ka Tru Trenge Men.
2 Eni a pi qaja koi Iehova ka hape: “Nyipëti la hnë zaeng me trengecatreng,
Me Akötresing, lo hnenge hna mejiune kow.”
3 Ke tro nyidrëti a amele eö qa ngöne la hnö ne la atre trathethi waco,
Memine la meci ka ixötrekeu.
4 Tro nyidrëti a hakuthi* eö fene la lue iape i nyidrë,
Nge tro eö a zae fene la lue iape i nyidrë.
Tro la nyipici i nyidrë a tune la petr ka tru me ihag ka draië.
5 Tha tro kö eö a xouene la itre ka iaxoueny e jidr,
Memine la ane pehna ka sesë e lai,
6 Memine la meci ka ixötrekeu ka tro agö ngöne la gaa mit,
Memine la meci ka xötr e hnaipajö.
7 Tro ha kei la ala 1 000 ezi ö
Me 10 000 ngöne la götrane maca i ö,
Ngo tha tro kö itre ej a easenyi ö.
8 Tro hi eö a öhn hnei luemek
Me goeëne la kola nyithupene la itre atr ka ngazo.
9 Ke öni ö: “Iehova la hnë zaeng,”
Nge ase hë eö xome la Ka Draië Catr nyine hnalapa* i ö;
10 Haawe, tha tro kö a traqa la ketre ngazo koi ö,
Nge tha tro kö la ketre mec a easenyine la itate i ö.
11 Ke tro nyidrëti a upe thatraqai ö la itre angela i nyidrë,
Matre troa thupë eö ngöne la nöjei jë i ö.
12 Tro angatr a kapa trongë eö hune la lue iwanakoime i angatr,
Matre tha tro kö a thë la waca i ö hnei etë.
13 Tro eö a tro hune la neköi liona memine la asip;*
Tro eö a tro waja la liona memine la un atraqatr.
14 Öni Akötresie: “Pine laka, tru catre la ihnimi* angeic koi ni, tro hë ni a amele angeic.
Tro ni a thupë angeic, ke atre* hi angeic la ëjeng.
15 Tro angeic a hë ni me sipo ixatua, nge tro ni a sa koi angeic.
Tro ni a ce me angeic ngöne la ijin akötr.
Tro ni a amele angeic me atrunyi angeic.
16 Tro ni a aqean la itre drai ne mele angeic,
Nge tro ni a amamai angeic la itre huliwa ne iameleng.”