Nehemia

9 Ngöne la hna 24 ne drai ne la treu cili, hnene la angetre Isaraela hna icasikeu. Hnei angatr hna heetrë ibëek ka tru thenyin, me jumi drone la itre he i angatr, me tha xen. 2 Hnene la itre nekö i Isaraela hna ananyine la itre trenyiwa, me icileny, me qajaqaja la itre ngazo i angatr, me itre tria ne la itre qaaqaa i angatr. 3 Thupene lai, hnei angatr hna ilapany ngöne la itre göhne i angatr, nge hna e catrëne koi köni hawa la tusi Wathebo i Iehova Akötresi angatr. Nge ngöne la köni xa hawa, hnei angatr hna qajaqaja la itre ngazo i angatr, me thil qëmeke i Iehova Akötresi angatr.

4 Nge hune la ita ne la angetre Levi, kola cil hnei Iesua, me Bani, me Kademiel, me Sebania, me Buni, me Serebia, me Bani, me Kenani. Angatr a xëwe catre draië koi Iehova Akötresi angatr. 5 Nge önine la angetre Levi, ene Iesua, me Kademiel, me Bani, me Hasabenia, me Serebia, me Hodia, me Sebania, me Pethaia, ka hape: “Mejë jë, nge atrunyi Iehova jë Akötresi epun, uti hë epine palua.* Akötresieti fe, epi tro angatr a atrune la ëje i nyipë, ka lolo nge ka draië, laka, pëkö ka ijije troa amanathithin me atrun.

6 “Nyipëti hmekuje hi lae Iehova, nyipëti hi la ka xupe la hnengödrai*, ene la hnengödrai asë me itre ewekë e cili, me ihnadro me nöjei ewekë e cili, me itre hnagejë me nöjei ewekë e kuhu hnagejë, nge nöjei ewekë asë hnei nyipëti hna thupë melen. Nge itre trongene isi e hnengödrai a thili koi nyipë. 7 Nyipëti hi Iehova la nyipi Akötresie, atre ië Aberama me xomi angeic qa Ure e Kaledaia, me ati ëje i angeic Aberahama. 8 Nge öhne kö nyipëti laka, ka nyipici la hni angeic koi nyipë. Celë hi matre hnei nyipëti hna isisinyikeu me angeic, me sisinyi troa hamëne koi angeic me itre matra i angeic, la nöj i angetre Kanana, me Heth, me Amora, me Perizi, me Iebusi, me Girigasa. Nge hnei nyipëti hna eatrëne la hnei nyipëti hna sisiny, ke ka meköti nyipë.

9 “Thupene lai, hnei nyipëti hna öhne la akötr ne la itre qaaqaa huni e Aigupito, nge hnei nyipëti hna drenge la itre treije i angatr, ezine la Hnagejë Ka Palulu. 10 Ame hnei nyipëti hna kuca la itre hatren, me itre iamamanyikeu nyine isi me Farao, me nöjei hlue i angeic, me itre atrene la nöje i angeic asë, ke atre hi nyipë laka, hnei angatre hna pi tru kowe la nöje i nyipë. Hnei nyipëti hna kuca matre hlemu jë la ëje i nyipë, uti pala hi enehila. 11 Nge hnei nyipëti hna thawaluëne la hnagejë qëmeke i angatr, matre hnei angatr hna tro sasaithe la hnagejë ngöne la gaa weliwel. Ngo ame la itre ka huzu angatr, hnei nyipëti hna trij ngöne la gaa jui, tune la aqane trij la ketre etë ngöne la hnagejë ka enienij. 12 Hnei nyipëti hna tro sai angatr e lai, hnene la ketre iaw ka cile meköt, nge e jidr, hnene la ketre eë ka cile meköt, hna thinane la gojeny nyine tro angatr a trongën. 13 Hnei nyipëti hna uti ngöne la Wetre Sinai, me ithanata koi angatr qa hnengödrai. Nge hnei nyipëti hna hamë angatr la itre iameköti ka meköt, me itre wathebo ka nyipici,* me itre wathebo me hna amekötine ka lolo. 14 Hnei nyipëti hna amamane koi angatre la Sabath ka hmitrötr i nyipë, me hamë angatr la itre hna amekötin, me nöjei wathebo asë jëne Mose hlue i nyipë. 15 Qa hnengödrai, hnei nyipëti hna thue falawa i angatr lo angatr a pi xen, nge qa ngöne la ietë atraqatr, hnei nyipëti hna thue tim i angatr lo angatr a pi ij. Nge hnei nyipëti hna upi angatr troa lö hnine la nöj hnei nyipëti hna sisinyi* troa hamë angatr, matre tro angatr a thapa.

16 “Ngo ame la itre qaaqaa hun, hnei angatr hna pi tru, me catre që,* nge xele kö angatr ma drenge la itre hnei nyipëti hna amekötin. 17 Tha drenge kö angatr, nge thëthëhmine hë angatre lo itre huliwa ka tru hnei nyipëti hna kuca nyipi angatr. Nge hnei angatre hna catre fë* troa acili tane i angatr, matre bëeke hmaca kowe la ithaluë e Aigupito. Ngo ame nyipë, nyipëti la Akötresieti ka ajane troa nue la ngazo*, nge ka itrotrohni, nge ka utipin, nge ka hmitre troa elëhni, nge ka tru trenge ihnimi nyipici,* matre tha hnei nyipëti kö hna trotriji angatr. 18 Nge hnei angatre fe hna xupe la neköi kau, ketre idrola, me hape: “Hane hi la Akötresi ö, atre thepe eö qa Aigupito.” Nge ngöne la aqane ujë i angatr, tru la hnei angatre hna methinë nyipë. 19 Ngo hnene pe la etrune la utipine i nyipë, matre tha hnei nyipëti kö hna nuetriji angatr ngöne la hnapapa. E lai, tha patre kö qaathei angatre la iaw ka cile meköt, nyine iuji angatr. Nge e jidr, tha pi kö la eë ka cile meköt, lo ka thina gojenyi angatr. 20 Hnei nyipëti hna hamëne la ua ka lolo i nyipë, matre ainamacanë angatr. Nge tha hnei nyipëti kö hna cipan la mana i nyipë, nge hnei nyipëti hna thue ime i angatre tim, lo angatr a pi ij. 21 Ngöne la 40 lao macatre ngöne la hnapapa, hnei nyipëti pala hi hna thue a i angatr, nge pëkö ka pë thei angatr, nge tha hnyiqetre kö la itre iheetre i angatr, nge tha cipa kö la itre waca i angatr.

22 “Hnei nyipëti hna hamë baselaia me itre nöj koi angatr, lo hnei nyipëti hna thawa koi angatr, thenge la isa götran. Matre hnei angatre hna thapa la nöje Sihona, ene la nöj ne la joxu ne Hesebona, memine la nöj i Oga joxu ne Basana. 23 Hnei nyipëti hna kuca matre ala nyimu la itre nekö i angatr, kösë itre wëtresij ne hnengödrai. Thupene lai, hnei nyipëti hna lö sai angatr ngöne la nöj hnei nyipëti hna sisiny koi itre qaaqaa i angatr ka hape, tro angatr a lö hnin, me thapa la nöj. 24 Matre hnei angatr hna lö hnine la nöj, me thapa. Nge hnei nyipëti hna nue la angetre Kanana koi angatr, lo itre ka lapane la nöj. Nge hnei nyipëti hna nue kowe la ime i angatre la joxu i angetre Kanana me itre atrene la nöj, matre tro angatr a kuca la aja i angatr koi nyudren. 25 Hnei angatr hna thapa la itre traon hna eköhagen, me nöj gaa cia hlöeë.* Nge hnei angatr hna thapa la itre uma ka tiqa hnei nöjei ewekë ka lolo, me itre sima hna kuj, me itre hlapa vin,* me itre hlapa oliv,* me nyimu pengöne sinöe nyine xen. Hnei angatre hna xeni mej, me mel ngöne la gaa mana, me madrine la itre manathithi ka tru qaathei nyipë.*

26 “Ngo ame pe, hnei angatre hna tha idrei, me icilekeu me nyipë, me trotrije* la Wathebo i nyipë. Hnei angatre fe hna humuthe la itre perofeta i nyipë, lo itre ka hmekë angatr matre bëeke koi nyipë. Nge ngöne la aqane ujë i angatr, tru la hnei angatr hna methinë nyipë. 27 Pine lai, hnei nyipëti hna nue angatr kowe la itre ithupëjia me angatr, itre ka akötrë angatr. Ngo e jol mina ha angatr, angatr a treije koi nyipë, nge nyipëti a dreng qa hnengödrai. Nge pine laka, tru la utipine i nyipë, hnei nyipëti hna upe la itre ka iamele, nyine amele angatr qaathene la ime ne la itre ithupëjia.

28 “Ngo thupene la kola ase amele angatr, hnei angatre hmaca hna kuca la ngazo koi nyipë, nge hnei nyipëti hna nue angatre hmaca pi kowe la itre ithupëjia, itre ka imusinë.* Matre angatr a bëeke hmaca ju koi nyipë, me treije koi nyipë, nge nyipëti a drenge qa hnengödrai. Nge anyimua amele angatr hnei nyipë, pine la etrune la utipine i nyipë. 29 Hnei nyipëti pala hi hna hmekë angatr, matre abëekë angatr kowe la Wathebo i nyipë. Ngo hnei angatre pe hna pi tru, me xele ma drenge la hna amekötine hnei nyipë. Hnei angatre hna ngazo, ke tha trongëne kö angatre la itre hna amekötin hnei nyipë, lo ka thue mel kowe la atre trongën. Hnei angatre pala hi hna hutrö koi nyipë, me catre që,* me xele ma idrei. 30 Hnei nyipëti pala hi hna xomihni* angatr koi nyimu macatre, nge tha mano kö nyipë hmekë angatr hnene la ua i nyipë, me jëne la itre perofeta i nyipë, ngo xele pala hi angatre ma dreng. Ame hë la pun, hnei nyipëti hna nue angatr kowe la itre nöj. 31 Nge ngöne la trenge utipine i nyipë, tha hnei nyipëti kö hna apatrenyi angatr, maine nuaxöji angatr, ke Akötresie ka itrotrohni nyipë, nge ka utipin.

32 “Nge enehila Akötresi hun, Akötresie ka draië, nge ka catr, nge nyine xouen,* nge ka metrötrëne la isisinyikeu, nge ka ihnimi nyipici, epi the wangacone kö la itre itupath hne huni hna melën, eahun, me itre joxu hun, me itre he ne nöj, me itre atre huuj, me itre perofeta, me itre qaaqaa hun, me nöje i nyipë, qaane lo ijin ne la itre joxu ne Asuria uti hë enehila. 33 Ngöne la nöjei ewekë ka traqa koi hun, hnei nyipëti pala hi hna meköt, ke hnei nyipëti hna nyipici koi hun, ngo hne huni pe hna ngazo thiina. 34 Tha metrötrëne kö la Wathebo i nyipë hnene la itre joxu hun, me itre he ne nöj, me itre atre huuj, me itre qaaqaa hun. Nge tha nyipiewekëne kö angatre la hnei nyipëti hna amekötin, me itre aqane hmekë* angatr hnei nyipë. 35 Nge ame fe la angatr a lapa hnine la baselaia i angatr, me madrine la itre ewekë ka lolo qaathei nyipë, me lapane la nöj ka tru nge gaa cia hlöeë* hnei nyipëti hna hamë angatr, ke tha hnei angatre kö hna nyihlue i nyipë, nge tha hnei angatre kö hna nuetrije la itre thiina ka ngazo i angatr. 36 Matre ame enehila, eahuni pë hë la itre hlu, eje hi, itre hlu ngöne la nöj hnei nyipëti hna hamën koi itre qaaqaa hun, matre tro angatr a xen la itre wen me itre ewekë ka lolo. 37 Pine la itre ngazo hun, ame la nöjei wen ka mana ngöne la nöj, ke ewekë ne la itre joxu hnei nyipëti hna acil troa musi koi hun. Matre ame eahun,* me itre öni hun, hna musinë huni hnei angatr, nge atraqatre la akötre hun.

38 “Haawe, pine la itre ewekë cili, eahuni a fejane la ketre isisinyikeu ka catr, nge hna anyipicin jëne la hna pele hatren hnene la itre he ne nöj me angetre Levi, me itre atre huuj thei eahun.”