Salamo
Thatraqane la atre jumi traem. Salamo i Dravita.
41 Madrine la atre wangatrune la ka co;
Tro Iehova a amele angeic ngöne la drai ne akötr.
2 Tro Iehova a thupë angeic me thupëne la mele i angeic.
Tro ha qaja ka hape, ka madrin angeic e celë fen;
Tha tro kö nyipëti a nue angeic kowe la aja ne la itre ithupëjia me angeic.
3 Tro Iehova a xatua angeic ngöne la göhnë ne akötre i angeic;
Ngöne la angeic a wezipo, tro nyipëti a nyihnyawane la hnë meköle i angeic.
4 Ke öning: “Iehova fe, epi kepe ni hnei nyipë.
Ameunyi ni jë, ke hnenge hna tria qëmekei nyipë.”
5 Ngo kola qaja angazo ni hnene la itre ithupëjiang, öni angatr:
“Eu la tro angeic a mec? Nge eu la troa patre la ëje i angeic?”
6 E kola traqa la ketre troa wai ni, ke hni i angeic a qeje trengathoi.
Angeic a pane mekun la ketre trengewekë ka akötr matre qaja koi ni;
Thupene lai, angeic a lö pi troa kötre fë ithanata.
7 Ame asë la itre ka methinë ni, angatr a iulili;
Angatr a hnëkëne la ketre ewekë ka ngazo nyine tra thethi ni. Nge öni angatr:
8 “Ase hë tithi angeic hnene la ketre mec* ka ngazo;
Pine laka kei hë angeic, tha tro hmaca kö angeic a mejë.”
9 Goi ame fe lo atr ka mele tingeting me eni, lo hnenge hna mejiune kow,
Nge ka xeni la falawang, hnei angeic hna xejë la tidöca i angeic koi ni.*
10 Ngo ame nyipë Iehova, epi kepe ni me amejë ni hnei nyipë,
Matre tro ni a të koi angatr.
11 Tro hë ni a atre laka, nyipëti a hnimi ni:
E thatreine hë la ithupëjiang sue madrine me ngaa ni.
12 Ngo nyipëti a sajuë ni pine la hnenge hna mele nyipici;
Tro nyipëti a acilë ni qëmeke i nyipë epine palua.
13 Epi atrunyi Iehova Akötresi Isaraela
Uti hë epine palua.
Amen nge Amen.