Hnaaluene Tus i Samuela
4 Ame hë la Ieseboseth nekö i Saulo a drenge laka, meci hë Abinera e Heberona, kucakuca* ju hi angeic, nge hace ju hi la hni ne la angetre Isaraela asë. 2 Nge ngöne la trongene isi i Ieseboseth, hetre itre gurup ne atrekënö hna elemeken hnene la lue atr, Baana me Rekaba. Lue nekö i Rimona lai, atre Berotha qa ngöne la tribu i Beniamina. (Ke Berotha fe la ketre traon ne la tribu i Beniamina. 3 Hnei angetre Berotha hna kötr a tro Gitaim, me mele trenyiwa e cili uti hë enehila.)
4 Nge hetre nekö i Ionathana, lo nekö i Saulo. Ka peje ca* angeic, ke ame lo angeic a 5 lao macatre, hna traqa la ketre atr qa Iezerela troa ithuemacanyine la meci Saulo me Ionathana. Nge hnene la föe ka thupë angeic hna canga xepi angeic me kötr, ngo ame la eahlo a nyinyape hmohmo, mala pi hi lai nekönatr. Matre qaane ju hi lai, peje ca ju pë hë nyën, nge Mefiboseth la ëjen.
5 Hnei Rekaba me Baana, lue nekö i Rimona atre Berotha, hna tro koi Ieseboseth ngöne la ijine kola catrehnine la hedredrei, nge Ieseboseth a nango midi. 6 Rekaba me Baana a lö ju hnine la uma, me thoi ka hape, nyidroti a troa xomi qitr. Nge nyidroti a kuluhmathi Iesebosethe ju, me kötre juetrë. 7 Ame lo nyidroti e hnine la uma, Ieseboseth a meköl hune la ili hnine la hnahage i angeic. Matre hnei nyidroti hna kuluhmathi angeic, me thupa la he i angeic. Nge nyidroti a xometrongëne jë la he i angeic, me xötrën la gojenyi ne la Araba, ngöne la jidri ka pexej. 8 Nge ame hë la nyidroti a traqa e Heberona, nyidroti a hamëne ju la he i Ieseboseth koi Dravita, me hape: “Hane hi la he i Ieseboseth, nekö i Saulo, lo ithupëjia me nyipë, nge atre thele troa humuthi nyipë. Joxu fe, enehila Iehova a të koi Saulo me itre matra i angeic.”
9 Ngo sa jë hi Dravita koi Rekaba me Baana, lue nekö i Rimona atre Berotha, ka hape: “Qëmeke i Iehova Akötresie ka mel, me atre thepe ni qa ngöne la nöjei hna mecin, 10 ame lo ketre atr a traqa troa thuemacanyi ni ka hape, ‘Meci hë Saulo,’ mekuna i angeic ka hape, maca ka loi lai koi ni, ngo hnenge hna xolouthe catrë angeic, me humuthi angeic e Zikelag. 11 Ngo the qaja pala ha la pun kowe la lue atre ka ngazo, nge ka humuthe la atre ka pë engazon, me humuthi angeic hnine la hnalapa i angeic, me hune la ili i angeic! Hapeu, tha tro kö ni a të la aqane ihumuth i epon, matre patre pi epon qa la fen?” 12 Nge Dravita a upe jë la itre thupëtresij i angeice troa humuthi nyidro. Angatr a thupa pi la lue im me lue ca i nyidro, me athipe la ngönetrei i nyidro ezine la sima e Heberona. Nge ame la he i Ieseboseth, angatr a amë ju hnine la hua i Abinera, e Heberona.