Hnaaluene Tus i Samuela
8 Thupene lai, hnei Dravita hna ngaane la angetre Filisiti, me lepi angatr asë. Nge hnei angeic hna thapa la traon ne Metheg-Ama.
2 Nge hnei angeice fe hna ngaa angetre Moaba. Dravita a upe pi la itre soc i Moaba troa meköl e kuhu hnadro, nge nyidrëti a xome pi la ketre eno nyine tuluthe la xötre soc. Nge hna thawa könine* la itre soc. Lue gurup nyine troa humuth, nge ketre nyine nuamelen. Qa ngöne lai, hnene la angetre Moaba hna nyihlue i Dravita, me kuië mani koi nyidrë.
3 Hnei Dravita fe hna ngaa Hadadeza, nekö i Rehoba joxu ne Zoba. Ngöne la ijine cili, hnei Hadadeza hna tro troa acatrene la musi angeic ngöne la Hneopegejë Euferata. 4 Matre Dravita a thapa pi la 1 700 lao soc ka ti hos, me 20 000 lao soc ka trongë ihnadro. Thupene lai, angeic a sa pi la itre wacane la itre hos ka huli ikatr, ngo hna nue pe hi la 100 lao hos.
5 Nge hnene la angetre Suria e Damaseko, hna traqa troa xatua Hadadeza, joxu ne Zoba. Ngo hnei Dravita hna humuthe la 22 000 lao soc i angetre Suria. 6 Thupene lai, Dravita a acile jë la itre soc thene la angetre Suria e Damaseko, nge angatr a nyihlue i Dravita jë, me kuië mani koi nyidrë. Nge ngöne la nöjei jë i Dravita, Iehova pala hi a xatua Dravita, matre hune* jë Dravita. 7 Nge Dravita a xome pi la itre ipetre gool ka raon ne la itre soc i Hadadeza, me bëeke fë a tro Ierusalema. 8 Nge nyimutre la itre kopa hnei Dravita hna bëeke fë qa Beta, me Berothai, lue traon i Hadadeza.
9 Nge drenge hë Toi, joxu ne Hamath laka, ase hë Dravita ngaane la trongene isi i Hadadeza. 10 Hnei Hadadeza hna majemine isi me Toi, matre hnei Toi hna upi Iorama, nekö i angeic koi Dravita joxu. Hna upi Iorama troa hnyingë pengöi Dravita, me qaja aloine la hnei nyidrë hna ngaa Hadadeza. Iorama a traqa fë pi koi Dravita la itre ewekë sileva, me gool, me kopa. 11 Nge Dravita joxu a amë acone ju la itre mo cili thatraqane la hmi Iehova, tune lo aqane kuca i nyidrë memine la sileva me gool, hna kapa qaathene lo itre nöj hnei nyidrë hna ngaan: 12 qaathei angetre Suria me Moaba, me angetre Amona, me Filisiti, me Amaleka, me qaathei Hadadeza, nekö i Rehoba joxu ne Zoba. 13 Nge hlemu pi hë Dravita lo nyidrëti a bëeke qa hna humuthe la 18 000 lao atre Edoma ngöne la Hnathupe Sotr. 14 Nyidrëti a acile ju la itre soc e Edoma, me ngöne la nöj asë, matre itre hlue i nyidrëti pë hë la nöjei atre Edoma. Haawe, ngöne la nöjei jë i Dravita, Iehova pala hi a xatua Dravita, matre hune* jë Dravita.
15 Dravita pala hi a mus e Isaraela asë, me amekötine la nöje i nyidrë, me isigöline la meköt kowe la nöjei atrene la nöj. 16 Ioaba nekö i Zeruia la tane soc, nge Iehosafata nekö i Ahiluda la atre feja tus, 17 nge Zadoka nekö i Ahituba, me Ahimelek nekö i Abiathara la lue atre huuj, nge Seraia la sekreter. 18 Nge Benaia nekö i Iehoiada la tane la angetre Kerethi me Pelethi, nge itre nekö i Dravita la itre he ne nöj.*