Esodro
15 Ngöne la ijine cili, hnei Mose me angetre Isaraela hna thinge la nyima celë koi Iehova:
“Tro ni a nyima koi Iehova, ke atraqatre la lolo i nyidrë.
Ase hë nyidrë kuiën e kuhu hnagejë la hos, memine la atre tith.
2 Ia* la trengecatreng me meneng, ke nyidrëti la atre amele ni.
Nyidrëti la Akötresing, tro ni a atrun la Akötresi kaka, me qaja atrunyi nyidrë.
3 Iehova la ka catre ngöne isi, Iehova la ëje i nyidrë.
4 Itre ikatr me trongene isi Farao, ase hë nyidrë kuiën ngöne la hnagejë,
Itre sooce ka catr i angeic, ase hë ulum hnene la Hnagejë Ka Palulu.
5 Hna heti angatr hnene la itre gejë ka tru, nge lö hë angatr ngöne la gaa jui tune la etë.
6 Iehova fe, nyine haine la mene ne la ime maca i nyipë.
Iehova fe, atreine hi la ime maca i nyipë lep anyilanyilane la itre ithupëjia.
7 Nge hnene laka, ka sisitria catre kö nyipë, hnei nyipë hna ukapiën la itre ka cile koi nyipë.
Nyipëti a upe la elëhni i nyipë, nge kola dreuthi angatr kösë jez.
8 Aca mano hi la lue hnafiji nyipë nge kola icacaxenyi la tim,
Cile meköti ju hi, ke hna xom acone itre ej.
Hnene la itre gejë ka tru hna cile meköt nyipine la hnagejë.
9 Önine la ithupëjia: ‘Tro ni a huzu angatr! Me traqa koi angatr!
Tro ni a thewe mo uti hë la tro ni a mej!
Tro ni a uthe la tauang! Nge tro la imeng a musinë angatr!’
10 Hnei nyipëti hna upe la enyi nyipë, ame hna kaca tranyi angatr hnene la hnagejë.
Hnei angatr hna lö e kuhu hnagejë kösë wene fao.
11 Iehova fe, drei la haze ka tui nyipë?
Drei la ka tui nyipë, lo atre ka nyipi hmitrötr?
Nyipë, lo nyine xouen me atrun jëne la nyima, nyipëti lo atre kuca la itre huliwa nyine hain.
12 Hnei nyipëti hna saathe la ime maca i nyipë, nge hna ulumi angatr hnene la ihnadro.
13 Ngöne la ihnimi nyipici i nyipë, hnei nyipëti hna eatrongëne la nöj hnei nyipëti hna itön;
Jëne la ime ka catre i nyipë, tro nyipëti a tro sai angatr kowe la hnalapa ka hmitrötr i nyipë.
14 Tro ha dreng hnene la itre nöj, nge tro hë angatr a hmengöhmengön.
Tro ha traqa la xou* kowe la angetre Filisiti.
15 Ngöne la ijine cili, tro la itre tan* e Edoma a meci hnei xou,
Nge troa hmengöhmengöne la itre tan* ka catr i Moaba.
Tro la nöjei atrene Kanana a pë trengecatr.
16 Tro ha traqa koi angatr la xou me hmengöhmengön.
Tro angatr a tha enij tune la etë, ke catr la ime i nyipë.
Uti hë la tro la nöje i nyipë, Iehova fe, a ase sasaithe la zi angatr,
Uti hë la tro la nöj hnei nyipëti hna eköth a ase sasaithe la zi angatr.
17 Iehova fe, tro nyipëti a tro sai angatr, me acili* angatr hune la wetre* i nyipë,
Lo göhnë ka hut hnei nyipëti hna hnëkëne troa lapan.
Lo uma ne hmi hna acil hnene la lue ime i nyipë, Iehova fe.
18 Tro Iehova a mus epine palua.
19 Asa hetine la itre hos i Farao, me itre ikatr i angeic me itre ka tith.
Nge hnei Iehova hna akacane la hnagejë hui angatr.
Ngo hnene la nöje Isaraela hna tro ngöne la gaa qaqacil* akawane la lue gejë”
20 Ame hnei Miriama, perofeta föe nge xa i Arona, hna ea la itrapë. Nge hnene la itre föe asë hna xötrethenge angeic, me lepelepe la itrapë, me fiafia. 21 Miriama a nyima me sa kowe la itre trahmany, me hape:
“Nyimane jë koi Iehova, ke sisitria la lolo i nyidrë.
Ase hë nyidrëti kuiën la hos memine la ka tith kowe la hnagejë.”
22 E thupen, hnei angetre Isaraela ka xötrethenge Mose, hna tro qa ngöne la Hnagejë Ka Palulu, uti hë la hnapapa ne Sura. Köni drai ne tro angatr ngöne la hnapapa, ngo pëkö tim hnei angatr hna öhn. 23 Nge traqa ha angatr e Mara,* ngo thatreine kö angatr iji la timi e Mara, ke ka haitr. Celë hi matre hna ati ëjene ka hape, Mara. 24 Ame hnene la nöj hna nyiqane nyiulil koi Mose, me hape: “Tro së a iji nemen?” 25 Matre hnei Mose hna xëwe koi Iehova, ame hnei Iehova hna amamane koi angeice la ketre sinöe. Matre ame hë la angeic a kuiën ej hnine la tim, hnyapa pi hi la tim.
E cili, hnei Akötresieti hna acile la ketre wathebo me trepen nyine iameköti, nge hnei nyidrëti hna tupathi angatr. 26 Öni nyidrë: “E tro eö a drenge hnyawane la trengewekë i Iehova Akötresi eö, me kuca la ka meköti koi nyidrë, me thupëne la itre hnei nyidrëti hna amekötin, me drengethenge la nöjei wathebo i nyidrë, tha tro jë kö ni a axulune koi eö la ketre mec, lo hnenge hna up koi angetre Aigupito, ke Iehova ni la atre aloinyi eö.”
27 Thupene lai, angatr a traqa ju e Elima. Nge e cili hi la 12 lao qeqe ne tim, me 70 lao pama. Matre angatr a lapa ju e cili, ezine la tim.