Esodro

28 “Tro eö a hë Arona mama i eö me itre nekö i angeic qaathene la angetre Isaraela, matre tro angatr a atre huuje koi ni ene Arona, me Nadaba, me Abiu, me Eleazara, me Ithamara, itre nekö i Arona. 2 Nge tro eö a cane thatraqai Arona mama i eö la itre iheetre ka hmitrötr, göne la elolon me emingömingön. 3 Nge tro eö a qaja kowe la nöjei atr ka maca troa huliwa,* ene lo itre hnenge hna atiqan hnene la u ka inamacan, laka, tro angatr a cane la itre iheetre i Arona, matre ahmitrötrë angeic, nge tro hë angeic a atre huuj koi ni.

4 “Hane hi la itre iheetr hnei angatr hna troa kuca: ca nyine he imano, me ca iefoda, me ca iheetr ka qea nge ka pë imen, me ca iheetr ka lailai,* me ca nyine atu he, me ca otrene hni. Tro angatr a cane la itre iheetre cili koi Arona mama i eö me itre nekö i angeic, matre tro angeic a atre huuje koi ni. 5 Tro la itre ka maca troa huliwa, a huliwane la gool, me theny ka bulu, me drela ka madra, me theny ka madra palulu, me nyipi lino.

6 “Nge tro angatr a cane la iefoda hnei gool, me theny ka bulu, me drela ka madra, me theny ka madra palulu, me nyipi lino hna el. Nge tro angatr a can hun ej. 7 Nge tro ha othe la lue xötre ezine la iefoda hnene la lue nyine he hna iap. 8 Nge ame la otren hna el nge hna can hune la iefoda, lo ka acatren ej, casi hi la aqane can: gool, me theny ka bulu, me drela ka madra, me theny ka madra palulu, me nyipi lino hna el.

9 “Tro eö a xome la lue etë soama, nge tro eö a sija hune la lue etë la ëjene la itre nekö i Isaraela, 10 troa sija la 6 lao ëje i angatr hune la ketre etë, nge 6 hune la ketre, qaane la ka tru uti hë la ka co. 11 Tro la atre ka siji etë, a sija la itre ëjene la itre nekö i Isaraela hune la lue etë, tune la aqane sija angeic la nyine pelehatren. Nge tro eö a acatrene lu ej hnine la lue hnepe gool. 12 Nge tro eö a acatrene la lue etë hune la lue nyine he hna iap ne la iefoda, nyine nyi etë ne amekunën kowe la itre nekö i Isaraela. Nge tro Arona a tro fë la itre ëje i angatr qëmeke i Iehova, ngöne la lue nyine he hna iape i angeic, nyine amekunën. 13 Nge tro eö a kuca la itre hnepe gool, 14 me lue ceine gool hna ele wanën. Nge tro eö a acatren la lue cein hna ele wanën hune la lue hnepe gool.

15 “Tro eö a upe la atre can, troa cane la nyine he imano ne iameköti, nge troa kuca tune la iefoda, troa kuca hnei gool, me theny ka bulu, me drela ka madra, me theny ka madra palulu, me nyipi lino hna el. 16 Nge e troa sa luën, troa caas la eqeane la 4 lao götran, nge tro ej a ca iwanakoime* la eqean ej, nge ca iwanakoime la eisaisan ej. 17 Nge tro eö a amë la itre etë, 4 lao xötre etë. Ame la pane xötr, ke, sadio, me topazio, me bereketh. 18 Ame la hnaaluene xötr, ke, semerado, me safairo, me aloma. 19 Nge ame la hnaakönine xötr, ke, lesema,* me sevo me amethusa. 20 Nge ame ngöne la hna 4 ne xötr, ke, berulo, me soama, me iasepi. Nge troa ami angatr ngöne itre trepene gool. 21 Nge tro la itre etë a xome la ëjene la 12 lao nekö i Isaraela. Nge troa sija la itre ëj, tune la aqane sija la nyine pelehatren. Troa ati ëjene la itre etë cili, la ëjene la 12 lao tribu.

22 “Tro eö a kuca kowe la nyine he imano, la itre cein hna kuca hnei nyipi gool, hna el tune la itre eno. 23 Tro eö a kuca la lue otru gool göne la nyine he imano, nge tro eö a acatrene la lue otru ngöne la lue koona ne la nyine he imano. 24 Nge tro eö a aline la lue eno gool, e hnine la lue otru, ngöne la lue koona ne la nyine he imano. 25 Tro eö a aline la lue pune la lue eno ngöne la lue hnepe gool, nge tro eö a acatren hune la lue nyine he hna iape ne la iefoda ngöne la qëmeken. 26 Nge tro eö a kuca la lue otru gool, me acatren ngöne la lue ezine la nyine he imano, e kuhu fen me e hnine la iefoda. 27 Nge tro eö a kuca la lue xa otru gool qëmekene la iefoda, fene la lue nyine he hna iap, ezine la hna itronyi la otren me iefoda, hune la otren hna el ne la iefoda. 28 Troa acatrene la nyine he imano hnene la ketre eno ka bulu, nyine iothekeune la itre otrun’ej, memine la itre otru ne la iefoda. Celë hi ka troa cilaxom la nyine he imano hune la iefoda, me hune la otren hna el.

29 “Nge tro Arona a fena la ëje ne la itre nekö i Isaraela hune la nyine he imano ne iameköti, hmekune la wenethëhmi angeic, ngöne la angeic a lö ngöne la Gaa Hmitrötr, matre nyine amekunëne pala hi qëmeke i Iehova. 30 Tro eö a amë la Urim me Tumim* e hnine la nyine he imano ne iameköti, nge tro itre ej a lapa hmekune la wenethëhmi Arona, ngöne la angeic a lö qëmeke i Iehova. Nge tro pala hi Arona a amë hmekune la wenethëhmi angeic, la itre ewekë nyine amekötine la angetre Isaraela qëmeke i Iehova.

31 “Nge ame la iheetre ka qea nge ka pë imen ne lai iefoda, tro eö a can asë hnei theny ka bulu. 32 Nge tro eö a kuci ulan* e koho hun nge nyipin ej. Nge troa can xötreithe la ulan, hnene la ketre atr ka cai imaano. Tro ej a tune la ulan ne la nyine he imano ne isi, matre tha tro kö ej a zezeny. 33 Ngöne la pune la iheetr, tro eö a kuci grenad hnei theny ka bulu, me drela ka madra, me theny ka madra palulu. Nge nyipine la itre grenad, tro eö a amë la itre neköi paate gool. 34 Troa amë la ca neköi paate gool, nge thupene lai ca grenad, ca neköi paate gool, thupene lai ca grenad, uti hë la kola lapan asë la pune la iheetre ka qea nge ka pë imen. 35 Tro Arona a heetrëne la iheetre cili la angeic a troa huliwa. Nge loi e troa momo la angeic a lö e hnine la uma ne hmi qëmeke i Iehova, memine la angeic a tro hmaca qa lai, matre tha tro kö angeic a mec.

36 “Tro eö a kuca la ketre sine gool ka melemel, hna kuca hnei nyipi gool, nge tro eö a sija hun ej, tune la aqane sija la nyine pelehatren, ka hape: ‘Thatraqai Iehova la ehmitrötren.’ 37 Tro eö a acatren ej hnei eno ka bulu, hune la nyine atu he. Nge tro ej a lapa qëmekene la nyine atu he. 38 Nge tro ej a lapa hune la göbadri i Arona, nge zö i Arona e tro ketre a kuca la ngazo kowe la itre ewekë ka hmitrötr, lo hnei angetre Isaraela hna ahmitrötrën me hamën nyine ahnahna ka hmitrötr. Tro pala hi ej a lapa hune la göbadri angeic, matre troa kepe angatr hnei Iehova.

39 “Tro eö a cane la iheetr ka lailai, hnei nyipi lino. Nge tro eö a kuca la nyine atu he hnei nyipi lino, me ca otrene hni hna sil.

40 “Tro fe eö a cane la itre iheetre ka qea, me itre otren, me itre nyine petrëne la he ne la itre nekö i Arona, göne la elolon me emingömingön. 41 Tro eö a heetrë Arona mama i eö, me itre nekö i angeic, nge tro eö a ië angatr, me acili angatr ngöne la hnëqa i angatr, nge tro eö a ahmitrötrë angatr. Nge tro angatr a itre atre huuje koi ni. 42 Nge tro fe eö a kuca la itre sine trauziz lino, nyine juetrëne la ngönetrei angatr, tro itre ej a he qa ngöne la gö uti hë la lue itrepë. 43 Tro Arona me itre nekö i angeic a xeetrëne la itre sine trauziz, ngöne la angatr a lö hnine la itat ne icasikeu, me ngöne la angatr a easenyine la ita ne huuj, matre eatrën la huliwa ngöne la götrane gaa hmitrötr, wanga hetre zö i angatre jë, nge meci pi angatr. Ketre wathebo lai nyine tro pala hi angeic, me itre matra i angeic a trongën.