Atre Cainöj

10 Tune la kola pui hmëz la oel ka pui loi hnene la itre neng ka mec, tro fe a hane luzi la inamacan memine la lolo, hnene hi la hna nango huliwa menu.

2 Kola eatrongëne la atr ngöne la nyipi gojeny* hnene la hni i angeic ka inamacan. Ngo tro la hni ne la atr ka hmo a eatrongë angeic ngöne la gojeny ka ngazo.* 3 Ame ngöne la nöjei gojenyi hna trongën hnene la hmo, ke pëkö wangatrehmekun i angeic. Nge mama hi koi nöjei atr la aqane menu i angeic.

4 Maine troa elëhni* koi ö hnene la ketre tan, the trotrije kö la göhne i ö, ke troa thahe la itre ngazo ka tru hnene la hnei ö hna lapa hnyawa.

5 Hnenge hna öhn fene la jö la jole celë hna kuca hnene la itre ka mus: 6 Kola huliwa menu la itre atr hna acil ngöne la itre hnëqa ka tru, nge hna acile pë hë la itre atr ka atrein* ngöne la itre hnëqa ka co.

7 Hnenge hna öhn la kola ti hos la itre hlu, nge itre nekö i joxu a trongë ihnadro tune la itre hlu.

8 Ijije hi tro la ka si hnaop a kei e kuhu hnin; nge ijije hi troa heje hnei un la atr ka fe tra etë.

9 Ijije hi troa eatr la ka thi etë, nge hetre ethanyine* kowe la ka sa sinöe.

10 Maine tha ka idrei kö la ze nge tha hna xöle hnyawane kö, ke tro hë së lai a aluzi trengecatr. Ngo tro ha hetre thangan ka loi e troa inamacan.

11 Gufa kö kowe la atre afia un,* e tro la un a ihej qëmekene troa afian.

12 Hna wangatrune la atr ka inamacan hnene la itre trengewekë ne la që i angeic, ngo luzi hë la atr ka hmo hnene kö la ukeineqë i angeic. 13 Ka hmo la itre pane trengewekë ka tro qa ngöne la që i angeic, nge hna mecin la itre ka traqa e thupen. 14 Ngo tha mano kö ithanata hnene la atr ka hmo.

Thatre kö la atr la ewekë ka troa traqa; nge drei la ka atreine qaja koi angeic la itre ewekë ka troa traqa thupei angeic?

15 Kucakuca ha la atr ka hmo hna huliwa catr, nge goi tha wangatrehmekune fe angeice la gojenyine tro kowe la traon.

16 Ekölöhini la nöj ka acili joxun la nekönatr, me itre nekö i joxu ka madri feet qaan e hmakany! 17 Madrine ka tru kowe la nöj ka acili joxun la nekön ne la itre he ne nöj, me itre nekö i joxu ka xen ngöne la nyipi ijin matre xomi trengecatr, ngo tha göi hnaitö kö!

18 Kola trotro ipië la itre agö ne la uma hnene la aqane genyine la atr, nge kola di la uma hnene la lue ime ka thatreine huliwa.

19 Hna kuca la falawa* nyine madrin, nge kola lolo la mel hnei waina; ngo mani la ka eatrëne la nöjei aja asë.

20 The ejine kö la joxu ngöne la mekuna* i ö, nge the ejine kö la trenamo ngöne la hnahage i ö; wanga tro la ketre waco* a qajaqaja la maca i ö, maine tro la ketre öni ka sesë a kötre fë ithanata.