Pane Tus Samuela
21 E thupen, Dravita a traqa pi e Nob thei Ahimelek, lo atre huuj. Matre ame hë la Ahimelek a öhnyi Dravita, angeic a hmengöhmengön hnei xou, nge öni angeic: “Hnauëne laka, eö casi hi? Hnauëne laka, pëkö ka ce me eö?” 2 Matre öni Dravita: “Hnei joxu hna upi ni troa kuca la ketre huliwa. Ngo öni nyidrë, ‘The qaja pi kö koi ketre la huliwa hnenge hna upi eö troa kuca, me itre hna amekötine koi eö.’ Ase hë ni isapui memine la itre atreng ngöne la ketre götran. 3 Haawe, maine thei eö la 5 lao falawa, nga hamë ni pi. Ngo e pëkö, hamëne pi hö la hnei eö hna hetreny.” 4 Ngo önine lai atre huuj koi Dravita: “Pëkö falawa menu la, ngo kolo hi lo falawa ka hmitrötr. Tro la itre atre i eö a xen, e nango qea ha la hnei angatr hna tha ce meköle me föe.” 5 Dravita a sa jë kowe la atre huuj ka hape: “Tune lo itre xa tronge ne isi hun, tha hne huni kö hna ce meköl me föe. Eni me itre atreng a thupëne troa hmitrötr, ngöne la eahuni a kuca la itre xa pengöne huliwa, ngo the qaja pala ha kowe la drai ka ketre pengöne celë.” 6 Matre hnene la atre huuj hna hamë Dravita la falawa ka hmitrötr, ke pëkö ketre falawa. Kolo falawa* nyine amamane koi Akötresie, lo hna xome qaathei Iehova la drai cili, me nyihnan hnei falawa hna hnyipi san.
7 Ngo e cili fe la ketre hlue i Saulo, hna cipa* angeic qëmeke i Iehova. Doega la ëjen, atre Edoma. Angeice hi la tane la itre ka thupë öni i Saulo.
8 Thupene lai, öni Dravita koi Ahimelek: “Hetre jo maine taua e celë? Tha xome ju kö ni la tauang, maine ketre jia ne isi pena, ke nyine canga kuca la huliwa i joxu.” 9 Önine jë hi lai atre huuj ka hape: “Hane hi la taua i Goliatha qa Filisiti, lo hnei eö hna humuth ngöne la hnathup* e Ela. Hna atuth hnei imaano ezine lai iefoda.* Nge maine eö a pi xom, xome jë, ke eje pe hi la hne huni hna hetreny.” Matre öni Dravita: “Pëkö taua ka tune la taua cili, matre awe jë.”
10 Nge ngöne la drai cili, Dravita a kötre Saulo hmaca pi, me traqa thei Akisa, joxu ne Gatha. 11 Matre önine la itre hlue i Akisa kowe la joxu ka hape: “A tha Dravita kö la, lo joxu ne la nöje i angeic? Hnene la nöje i angeic hna fia me nyimane ka hape,
‘Ase hë Saulo lepe la ala 1 000,
nge Dravita la ala 10 000.’”
12 Ame hnei Dravita hna lapa mekune la itre trengewekë celë, matre xou i angeice ju hi e Akisa, joxu ne Gatha. 13 Qa ngöne lai, ame hë la Dravita a ce* me angatr, angeic a thë ju troa ujë tune la ketre hmo. Angeic a siji hatrene la itre hune qëhnelö, me aneni iaz hune la ienaj i angeic. 14 Ame hnei Akisa hna qaja kowe la itre hlue ka hape: “Öhne hi epuni laka, ka hmo la atre ce! Epuni a traqa sai angeice fë nemen? 15 Tha ijije kö la itre hmo e celë matre tro hmaca kö epuni a nyixan? Xomi angeice pi la qatheng!”