Deuteronomi

2 “Thupene lai, hne së hna bëeke hmaca, me tro kowe la hnapapa qa ngöne la gojenyi ne la Hnagejë Ka Palulu, tune lo hnei Iehova hna qaja koi ni. Nge hne së hna tro koi nyimu drai xötreithe la wetre Seira. 2 Matre öni Iehova jë hi koi ni: 3 ‘Loi ju hë hnei epuni hna tro ezine la wetre celë. Ngo ame enehila, tro jë pena a tro kolopi. 4 Qaja jë kowe la nöj ka hape: “Tro hë epuni a tro ezine la ifegone la itre trejin me epun, ene la itre matra i Esau, itre ka lapa e Seira. Nge tro angatr a xoue epun, matre wai epuni kö. 5 The thele isi kö me angatr, ke tha tro kö ni a hamë epun la nöje i angatr, nge goi tha tro fe ni a hamë epun la ca thupaca, ke ase hë ni hamëne la wetre Seira nyine zi i Esau. 6 Qa i epun troa hamë mani koi angatr matre troa itö xen me tim koi epun. 7 Ke hnei Iehova Akötresi epun hna amanathithi epun ngöne la nöjei huliwa i epun. Hnei nyidrëti hna thupë epun lo epuni a tro ngöne la hnapapa ka tru celë. Nge ngöne la 40 lao macatre, hnei Iehova Akötresi epun hna ce me epun, nge hnei nyidrëti pala hi hna hamë epuni la ka ijij.’” 8 Matre hne së hna tro ezine la itre trejin me easë, ene la itre nekö i Esau ka lapa e Seira, nge hne së hna tro ananyine la gojenyine la Araba, me Elath, me Eziona-Gebera.

“Thupene lai, hne së hna kano ngöne la gojenyine tro kowe la hnapapa ne Moaba. 9 Öni Iehova hmaca jë hi koi ni: ‘The thele iwesitrë kö, nge the thele isi kö memine la angetre Moaba, ke tha tro kö ni a hamëne la ketre götrane la nöje i angatr nyine zi i ö. Ke ase hë ni hamë Aro nyine zi ne la itre matra i Lota. 10 (Ame ekö, hna mel e cili hnene la angetre Emi, ketre nöj ka tru nge ka ala nyimu, nge itre ka tru matran tune la angetre Anaka. 11 Pine laka ceitui angetre Refai hi me angetre Anaka, matre hnene la angetre Moaba hna ati ëje i angatr ka hape, Emi. 12 Ame ekö, angetre Hora la ka lapa e Seira. Ngo hnene la itre matra i Esau hna thapa la itre ewekë i angatr, me lep apatrenyi angatr, matre lapane la zi i angatr, tune la hna troa kuca hnene la angetre Isaraela kowe la nöje i angatr, ene la nöj hnei Iehova hna troa hamë angatr.) 13 Ame enehila, sasaithe pi la hnathup e Zereda.” Ame hne së hna sasaithe la hnathup e Zereda. 14 Matre traqa koi 38 lao macatre hne së hna pane tro qa Kadesi-Banea kowe la hnathup e Zereda, uti hë la kola patr asë la xötr ne la itre trahmany ka qa hna isi, tune lo hnei Iehova hna sisinyi koi angatr. 15 Nge hnei Iehova hna saathe la ime i nyidrë matre lep apatrenyi angatr asë qa ngöne la lapa.

16 “Thupene la kola meci asë la itre atrene la nöj ka qa hna isi, 17 öni Iehova koi ni ka hape: 18 ‘Enehila, tro eö a tro ezine la nöje Moaba, ene la götran e Aro. 19 Ame la eö a troa easenyi kowe la angetre Amona, the thele iwesitrë kö nge the thele isi kö me angatr. Ke tha tro kö ni a hamëne la nöje i angatr nyine zi i ö. Eje hi, ase hë ni hamën la noje cili kowe la itre matra i Lota. 20 Nge kola mekune laka, nöje Refai fe la nöje cili. (Hna lapan ekö hnene la angetre Refai, matre hnene la angetre Amona hna ati ëje i angatr, angetre Zamezumi. 21 Ketre nöje lai ka tru nge ka ala nyim, nge itre ka qea hmae tune la angetre Anaka. Ngo hnei Iehova hna lepi angatr qëmekene la angetre Amona, nge hnene la angetre Amona hna helë angatr, me lapane la zi i angatr. 22 Celë hi hnei nyidrëti hna kuca kowe la itre matra i Esau, ka lapa e Seira: hnei nyidrëti hna apatrene la angetre Hori qëmekei angatr, matre tro angatr a thapa la itre ewekë ne la angetre Hori, me lapane la zi i angatr uti hë la drai ce. 23 Nge ame la angetre Avi, hnei angatr hna lapane la itre neköi traon ngöne la nöje Gaza, uti hë la kola apatrenyi angatr hnene la angetre Kafetori, me lapane la zi i angatr.)

24 “‘Mejë jë, nge sasaithe pi la hnathup e Arenona. Goeën: ase hë ni nue Sihona atre Amora, joxu ne Hesebona kowe la ime i epun. Nyiqaane lapane jë hë la nöje i angeic, nge isi jë me angeic. 25 Nge qaane la drai celë, tro ni a axulune la xou me hmengöhmengön, kowe la nöjei nöj fene la hnengödrai asë ka troa drei meje i epun. Nge tro angatr a xou me hmengöhmengön* hnei epun.’

26 “Qa ngöne la hnapapa ne Kademotha, hnenge hna upe la itre ka tro fë maca koi Sihona joxu ne Hesebona, memine la itre trengewekë ne tingeting, ka hape: 27 ‘Nue ni pi troa tro nyipine la nöje i nyipë. Nge tro hi ni a lapa ngöne la gojeny. Tha tro kö ni a jea ngöne la götrane maca me ngöne la götrane mi. 28 Tro hi ni a xen me ije la tim hnei nyipëti hna troa salemëne koi ni. Ngo pane nue ni pi troa trongëne la gojenying, 29 (Tune la hna kuca koi ni hnene la itre matra i Esau ka lapa e Seira, memine la angetre Moaba ka lapa e Aro) uti hë la tro ni a sasaithe la hneopegejë Ioridrano, me tro kowe la nöj hna troa hamë hun hnei Iehova Akötresi hun.’ 30 Ngo tha hnei Sihona kö joxu ne Hesebona, hna nue së troa sasaith ej, ke hnei Iehova Akötresi epun hna nue troa axetine la mekuna i angeic me hni i angeic, matre troa nue angeic kowe la ime i epun, tune lo hnei nyidrëti hna kuca.

31 “Matre hnei Iehova hna qaja koi ni ka hape: ‘Goeën: ase hë ni nue Sihona memine la nöje i angeic koi ö. Nyiqaane lapane jë la nöje i angeic.’ 32 Matre, ame hë lo Sihona a traqa me itre sine tronge i angeic troa isi me easë e Iahaza, 33 hnei Iehova Akötresi së, hna nue angeic koi së. Nge hne së hna lepi angeic, me itre nekö i angeic, memin asë la itre sine tronge i angeic. 34 Ame ngöne la ijine cili, hne së hë hna thapa me lep apatren la nöjei traone i angatr, memine la itre trahmany, me itre föe, me itre nekönatr. Nge pëkö ca atr hne së hna nuamelen. 35 Ngo hne së hi hna xome la itre öni, me itre ewekë ne la itre traon hne së hë hna thapa. 36 Qaane Aroera, ngöne la xötr ezin ne la hnathup e Arenona (memine la traon ngöne la hnathup), uti hë e Gileada, pëkö ca traon hna nu. Hnei Iehova Akötresi së hna hamën itre eje koi së. 37 Ngo tha hnei epuni kö hna easeny kowe la nöj ne la angetre Amona, memine la hnathup e Iaboka, memine la itre traon ngöne la itre wetr, memine la nöjei götran hnei Iehova Akötresi së hna wathebo epuni troa easenyi kow.