Pane Tus Samuela
22 Dravita a kötre pi qa lai, me zae ngöne la ngönemenyi e Adulama. Nge ame hë la kola dreng hnei itre mama i angeic, me fami ne la keme i angeic, angatr a tro ju troa itronyi me Dravita e cili. 2 Nge ame fe la nöjei atr ka cil kowe la itre jol, nge ka trene gufa, nge ka wepel,* angatr a tro ju fe koi Dravita. Ala 400 angatr, nge Dravita la ka weje mekene la tronge i angatr.
3 E thupen, hnei Dravita hna tro qa Adulama a tro Mizepa e Moaba. Nge öni angeic kowe la joxu ne Moaba: “Pane nue kaka pi me nenë troa lapa e celë, uti hë la tro ni a atre la hnei Akötresie hna troa kuca koi ni.” 4 Angeic a nue nyidroti pi thene la joxu ne Moaba. Nge ngöne la ijine Dravita a zae, nyidroti a lapa ju thene lai joxu.
5 Ngo e thupen, hnei Gada perofeta hna qaja koi Dravita ka hape: “The zae hmaca kö e celë. Bëeke jë hë kowe la nöje Iudra.” Haawe, Dravita a tro ju kowe la hnaxulu e Hareth.
6 Ngo drenge hë Saulo laka, öhnyi Dravita ha me itre sinexöle i angeic. Nge Saulo pala kö e Gibea, nyidrëti a lapa fene la itamaris* ka cia hune la ketre sasala. Nyidrë a lapa xome la jo i nyidrë, nge itre soc a cile xötreithi nyidrë. 7 Öni Saulo jë hi: “Angetre Beniamina fe, tro fe kö la nekö i Iese a hane hamë hlapa me hlapa vin* koi nyipunie? Tro kö angeic a acili nyipunieti asë troa tane la ala 1 000, maine tane la ala 100? 8 Ase petre hi nyipunie juetrë ewekë, ke tha qajaqaja kö nyipunie laka, hnene la sipu neköng hna sisiny memine la nekö i Iese. Pëkö ca ka hnimi ni. Nge tha qaja kö nyipunie laka, hnene la sipu neköng hna ukune la hlueng troa isi me eni, tun enehila.”
9 Nge Doega fe e cili, lo atre Edoma ka thupëne la itre hlue i Saulo. Matre öni angeic: “Hnenge hna öhne la nekö i Iese a traqa e Nob, thei Ahimelek nekö i Ahituba. 10 Hnei Ahimelek hna thele Iehova koi Dravita, me thue a i angeic, me hamë angeic la taua i Goliatha lo atre Filisiti.” 11 Qa ngöne lai, Saulo a canga hë Ahimelek jë, nekö i Ahituba lo atre huuj, me nöjei atre huuj e Nob ne la fami i keme i angeic. Angatr asë a tro ju kowe la joxu.
12 Nge öni Saulo jë hi: “Pane dreng nekö i Ahituba!” Sa jë hi angeic ka hape: “Eni a drei nyipë joxung.” 13 Öni Saulo jë hi: “Hnauëne la eö a cile koi ni, eö me nekö i Iese? Hnei eö hna thue falawa i angeic, me taua, nge hnei eö fe hna thele Akötresie koi angeic, ngo atre icilekeu pe me eni. Angeic a zae me treqe ijin troa isi me eni, tune enehila.” 14 Ngo öni Ahimelek jë hi: “Hetre xa hlue i nyipëti kö ka nyipici* tui Dravita? Tresi i nyipëti lai, nge tane la itre soc ka thupë nyipë. Ketre atre lai hna metrötrëne hnyawa hnine la hnalapa i nyipë. 15 Aija thele Iehova ha ni koi Dravita, ngo tha ase kö ni hane mekune troa icilekeu me nyipë. Matre joxu, the jelengazo huni kö, eni me fami i kaka, ke thatre kö ni la jole celë.”
16 Ngo sa jë hi joxu ka hape: “Tro eö me fami keme i eö a ce mec.” 17 Thupene lai, önine la joxu kowe la itre soc* ka cile xötreithi angeic ka hape: “Öi! humuthe pi la itre atre huuj i Iehova pine angatr ce xöl me Dravita! Atre hi angatr laka, angeic a kötre ni, nge öhnyi Dravita hi angatr, ngo tha qajaqaja kö!” Ngo xele kö itre soc ma akötrëne la itre atre huuj i Iehova. 18 Matre önine la joxu koi Doega ka hape: “Eö, humuthe pi la itre atre huuj!” Ame hnei Doega hna canga sesë troa humuthe la itre atre huuj, nge ngöne la drai cili, ala 85 lao trahmany ka feni iefoda lino, hna humuth hnei angeic. 19 Ase jë hi, angeic a lepe jë hnei taua la traon ne Nob, traon ne la itre atre huuj. Nge angeic a humuthe pi la itre trahmany, me föe, me ha nekönatr, me medreng, me itro kau, me itro boliko, me mamoe.
20 Ngo hnei Abiathara, nekö i Ahimelek, lo nekö i Ahituba, hna kötre mel. Hnei angeic hna kötre koi Dravita. 21 Nge Abiathara a qaja jë koi Dravita ka hape, ase hë Saulo humuthe la itre atre huuj i Iehova. 22 Nge öni Dravita koi Abiathara ka hape: “Ame lo eni thei keme i eö, Doega fe e cili, atre ju hi ni laka, tro angeic a iqejiqej koi Saulo. Matre eni hi la atrekë zöne la meci* ne la fami i keme i eö. 23 Haawe, lapa ju me eni, nge the xou kö. E traqa jë ketre thele troa humuthi eö, tro ni a isigöli eö tune la eni a isigöline la meleng.* Tro kö ni a thupë eö.”