Hnaaluene Tusi Itre Joxu

4 Ngöne la ketre drai, hnene la sine föe ne la ketre nekö i perofeta, hna acilë Elisaia me hape: “Meci hë lo föeng hlue i nyipë, nge atre hi nyipëti laka, hnei nyidrëti pala hi hna xoue Iehova. Ngo hna traqa la ketre atre hle gufa, troa xome la lue neköng, matre tro nyidro a hlue i angeic.” 2 Matre öni Elisaia: “Nemene la nyine tro ni a kuca koi nyipo? Pane qaja jë koi ni la hnei nyipoti hna hetreny.” Nge öni eahlo: “Pë fe kö ca ewekëng, ngo ca trengenë oel.” 3 Öni Elisaia jë hi: “Tro jë nyipo kowe la itre atre ka lapa easenyi nyipo, nge sipo angatre jë la itre trengen, itre trengen ka pë alien. Eöth atrune jë la itre trengen. 4 Ase jë hi, lö jë hë kowe la hnalapa i nyipo, nge thinge ju la qëhnelö thupei nyipo me lue nekö i nyipo. Nyialiene jë la itre trengen, nge amë acone ju la itre trengen ka tiqa.” 5 Ame hnene la föe hna tro ju, me thinge la qëhnelö thupei eahlo me lue nekö i eahlo. Nge nyidroti a hamë eahlo la itre trengen, nge eahlo a nyialien. 6 Matre ame hë la kola tiqa la itre trengen, öni eahlo kowe la ketre nekö i eahlo: “Awe jë la ketre trengen.” Ngo öni angeic: “Pëhë.” Nge e cili, tha neni ju hi la oel. 7 Eahlo a canga tro ju kowe la atre ne la nyipi Akötresie. Nge öni Elisaia: “Tro ja salemëne la oel, nge të jë la gufa i nyipo. Thupene lai, tro pë hë nyipo me lue nekö i nyipo a melëne lai munëne mani.”

8 Ngöne la ketre drai, Elisaia a tro ju e Sunema, nge hetre ketre föe e cili ka hlemu. Eahlo a iele Elisaia jë troa pane traqa troa xeni ngöne la hnalapa i eahlo. Nge qaane la ijine cili, ame la Elisaia a traqa e Sunema, angeice pala hi a cile thei eahlo troa xen. 9 Öni eahlo jë hi kowe la föi eahlo ka hape: “Atre hi ni laka, atre ka hmitrötre i Akötresie, la atre ka traqa lapa koi nyiso. 10 Ka loi e tro nyiso a pane kuca la ca hnahag koi nyidrë e koho, me amë la ca ili, me ca laulau, me ca icea, me ca laame cil. Matre e traqa mina ha nyidrë, tro nyidrëti a lapa e cili.”

11 Ame ngöne la ketre drai ne Elisaia e Sunema, hnei angeic hna elë kowe la hnahag ne la hune uma, matre troa nango saju. 12 Thupene lai, öni angeic koi Gehazi hlue i angeic: “Hëne jë la föe ne Sunema.” Matre Gehazi a tro ju troa hën, nge eahlo a lö jë koi Elisaia. 13 Ame hnei Elisaia hna qaja koi Gehazi ka hape: “Pane qaja jë koi eahlo ka hape, ‘Nyipoti la ka akötrehni nyio, matre nemene la aja i nyipo? Aja i nyipoti kö tro ni a qeje nyipo koi joxu, maine kowe la tane isi?’” Ngo öni eahlo: “Waea, tha nyipiewekë, ke ka tingetinge hi la meleng nyipine la nöjeng.” 14 Öni Elisaia jë hi: “Tro nyiso a kuci nemene koi eahlo?” Sa jë hi Gehazi ka hape: “Pëkö nekö i eahlo trahmany, nge qatre hë la föi eahlo.” 15 Matre canga öni Elisaia koi Gehazi ka hape: “Hë eahlo jë.” Ame hnei Gehazi hna hë eahlo, nge eahlo a cile ngöne la hnë lö. 16 Nge öni Elisaia koi eahlo ka hape: “Ngöne la macatre ka troa xulu, hmekune la ijine celë, tro nyipoti a xepe la ca nekönatr trahmany.” Ngo öni eahlo jë hi: “Waea masetang! Atre ne la nyipi Akötresie, the hamë mejiune menu kö koi ni!”

17 E thupen, upune pi hi lai föe. Nge ca macatre thupene lo Elisaia a ithanata koi eahlo, eahlo a hnahone pi la ketre nekönatr trahmany, tune lo hna qaja hnei Elisaia. 18 Kola tru trootro la nekönatr, matre ngöne la ketre drai, nyën a tro ju koi kem, nge ce nyidrë me itre ka menuë hlapa. 19 Nge nyëne pala hi a qaja koi kem ka hape: “Kola akötr la heng! Kola akötr la heng!” Matre önine la kem kowe la ketre hlu ka hape: “Xepi nyëne jë koi thin.” 20 Matre hnene lai hlu hna bëeke sai nyën koi thin, nge hnene la nekönatr hna mekölene la iwatingöneca ne la thine i nyën uti hë e midi, nge meci pi hi nyën. 21 Eahlo a elë sai nyëne jë, me ameköle nyën hune la ili ne la atre ne la nyipi Akötresie. Nge eahlo a thinge ju la qëhnelö, me tro. 22 Thupene lai, hnei eahlo hna hëne la föi eahlo me hape: “Pane upe jë koi ni la ketre hlu, me ca boliko föe. Tro ni a canga wange la atre ne la nyipi Akötresie, nge qanyinge hmaca ha.” 23 Ngo öni nyidrë: “Nyipoti a wai nyidrëti fë nemen? Tha treu ka hnyipixe kö la, maine drai sabath.” Matre öni eahlo: “The seuseu kö, pëkö, ka loi hi.” 24 Ame hnei eahlo hna atë la sadrel hune la boliko, nge öni eahlo kowe la hlu: “Engëne nyimenyimëne jë lai boliko. The meku ni kö, ngo tro hmidra ju e sipone jë ni.”

25 Haawe, eahlo a tro ju e Karemela troa wange la atre ne la nyipi Akötresie. Nge qa gaa nany, hnene la atre ne la nyipi Akötresie hna canga öhnyi eahlo. Matre öni angeic koi Gehazi hlue i angeic ka hape: “Goeën! Hana cahmijë lo föe ne Sunema. 26 Pane nyinyape pi troa ixelë me eahlo, nge hape jë, ‘Ka loi hi nyipo? Nge tune kaa föi nyipo? Me nekö i nyipo?’” Sa jë hi lai föe ka hape: “Ka loi hi.” 27 Ngo ame hë la eahlo a traqa kowe la atre ne la nyipi Akötresie hune la wetr, eahlo a thipine ju la lue ca i angeic. Ame hnei Gehazi hna easeny troa huli eahlo, ngo önine la atre ne la nyipi Akötresie ka hape: “Nue eahlo pi! Ke atraqatre la hleuhleu* i eahlo, ngo thatre pe ni la kepin, ke tha hnei Iehova kö hna amamane koi ni.” 28 Matre öni eahlo: “Eni lo ka sipo nekönatr koi nyipë? Tha hnenge kö lo hna qaja koi nyipë ka hape, the tro kö nyipë a hamë mejiune menu koi ni?”

29 Matre öni Elisaia jë hi koi Gehazi ka hape: “Sili göne ju la iheetre i ö, nge xome jë la sine töng, nge tro jë hë. E traqa jë eö ixelë me ketre, the ibozu kö me angeic. Nge e traqa jë ketre ibozu me eö, the sa kö. Ngo tro jë pe troa atë la sine töng hune la qëmeke ne la nekönatr.” 30 Ngo önine la thin ne la nekönatr ka hape: “Qëmeke i Iehova Akötresie ka mel, nge qëmeke i nyipë, tha tro kö ni a tro qa la, e tha ce nyipëti kö me eni.” Matre Elisaia a mejë jë, me ce tro me eahlo. 31 Nge Gehazi la ka tro pa, ngo ame ju hi la angeic a atë la sine tö hune la iqëmeke ne lai nekönatr, pëkö ca meje i nyën, nge goi tha enije fe nyën. Matre hnei Gehazi hna bëeke koi Elisaia me hape: “Tha hlë kö la nekönatr.”

32 Nge ame hë la Elisaia a traqa kowe la uma, hna amekölen hune la ili i angeic, la ngönetrei ne la nekönatr ka mec. 33 Angeic a lö ju kowe la hnahag me thinge la qëhnelö. Nge Elisaia casi hi memine la nekönatr, matre angeic a nyiqaane thithi jë koi Iehova. 34 Thupene lai, angeic a elë jë hune la ili, me meköle hui nyën. Angeic a amë ju la që i angeic hmekune la që ne la nekönatr, me alameke i angeic hmekune la alameke i nyën, me hnatrapaime i angeic hmekune la hnatrapaime i nyën, nge hnei angeic hna saath aqean hune la nekönatr. Ame hna nyiqane keukawa pi la ngönetrei i nyën. 35 Nge Elisaia a tro ju hnine la uma, ase jë koië matre kuë. Thupene lai, angeic a elë hmaca ju hune la ili, me saathi aqean hui nyën, ame hnei nyën hna a 7 lao hatrinyö, me goe. 36 Nge hnei Elisaia hna hë Gehazi me hape: “Hëne jë la thine i nyën.” Matre Gehazi a hëne jë, matre eahlo a traqa pi, nge öni Elisaia: “Xome jë hë la nekö i nyipo.” 37 Matre eahlo a lö ju me canga kei kowe la lue ca i Elisaia, me thil. Nge eahlo a xome jë la nekö i eahlo, me tro.

38 Nge ame hë la Elisaia a bëek a tro Gilegala, kola jiinë xen ngöne la nöj. Nge kola ilapanyi la itre nekö i perofeta qëmeke i angeic, matre öni angeic kowe la hlue i angeic ka hape: “Atë jë la öle ka tru hune la eë, nge supi jë kowe la itre nekö i perofeta.” 39 Matre hnene la ketre nekö i perofeta hna tro ngöne itre hlapa troa sili dröne sil. Nge öhne ju hi angeic la ketre feja ka xötr, nge angeic a huje pi la itre fuo ne hnitr, me nyialien la iheetre i angeic. Thupene lai, angeic a bëeke hmaca jë, me thupathupa acon hnine la öl, ngo thatre pe angeic ka hape, nemen. 40 E thupene hë, hna jöe sup kowe la itre trahmany, ngo ame hë la angatr a tupath, angatr a isuenyi jë me hape: “Atre ne la nyipi Akötresie, hna apoizinëne la öle celë.” Nge thatreine kö angatr iji la sup. 41 Matre öni Elisaia ka hape: “Pane awe jë la farin.” Nge angeic a kuiëne pi hnine lai öl, me hape: “Jöe jë hë.” Matre pëhë ewekë ka ngazo hnine lai öl.

42 Ame hnene la ketre atr hna traqa qa Baala-salisa, nge hnei angeic hna traqa fë kowe la atre ne la nyipi Akötresie, la 20 lao falawa bali, hna san me itre pane wen hna menuën, me ca trengë bali hna nyipi ukekëth. Öni Elisaia jë hi: “Hamëne pi kowe la itre trahmany, matre tro angatr a xen.” 43 Nge sa jë hi la hlue i angeic ka hape: “Tha ijije kö troa thuane la ala 100.” Ngo Elisaia a qaja hmaca jë ka hape: “Hamëne pi kowe la itre trahmany, matre tro angatr a xen, ke hane hi la hna qaja hnei Iehova, ‘Tro angatr a xen, nge tro pala kö a hetre munën.’” 44 Ame hnene lai hlu hna hamë xen kowe la itre trahmany, nge angatr a xeni ju, nge munë ju pe kö, tune lo aqane qaja i Iehova.