Ezekiela

37 Hnene la mene i Iehova hna huliwa* theng, nge hnei Iehova hna xomi ni jëne la ua i nyidrë, me ami ni nyipine la gaa paapa; lo gaa tiqa hnei jun. 2 Hnei nyidrë hna tro sai ni xötreithe la itre jun, nge öhne ju hi ni laka, ase hë haöth la götrane cili hnei trapa jun, nge ka qaqacil asë hi itre ej. 3 Öni nyidrëti koi ni: “Nekö i atr, ijije kö troa mele hmaca la itre trapa june celë?” Öninge jë hi: “Iehova fe Joxu Ka Sisitria, nyipëti kö la ka atre.” 4 Matre öni nyidrëti jë hi: “Perofetane jë göne la itre june cili, nge hape jë: ‘Itre june ka qaqacil, drenge ju la hna qaja hnei Iehova:

5 “‘Hane hi la hna qaja hnei Iehova Joxu Ka Sisitria kowe la itre june cili: “Tro ni a hamë epuni la hnamano, nge tro hmaca epuni a mel. 6 Tro ni a amë hui epuni la itre none me ijön, me heetrë epun hnei kupein, me hamëne la hnamano koi epun, nge tro hmaca epuni a mel. Nge tro hë epuni a atre e cili laka, Iehova ni.”’”

7 Matre hnenge hna perofetane tune lo aqane upi ni. Ame hë la eni a nyiqaane perofetan, ke drenge ju hi ni la kola kuqakuqa, ame hna nyiqaane ifedrekeu la itre jun, ketre koi ketre. 8 Thupene lai, hnenge hna öhne la itre none me ijön a fedr hune la itre itrapa jun, ame hna heetrën hnei kupein. Ngo pë pala kö hnamano itre ej.

9 Thupene lai, öni nyidrë: “Perofetane jë kowe la eny. Nekö i atr, perofetane jë, nge hape jë kowe la eny: ‘Hane hi la hna qaja hnei Iehova Joxu Ka Sisitria: “Enyi fe,* traqa pi qa ngöne la 4 lao cane* la fen, nge ufe jë la itre atr hna humuth matre mele hmaca jë angatr.”’”

10 Matre hnenge hna perofetane tune lo aqane upi ni. Ame hna traqa la hnamano koi itre ej, matre mele hmaca jë hi angatr, me mejë: kösë ketre trongene isi ka tru angatr.

11 Thupene lai, öni nyidrë koi ni: “Nekö i atr, angetre Isaraela hi la itre trapa june cili. Angatr a qaja ka hape: ‘Qaqacile hë la itre june hun nge pëhë mejiune hun. Luzi hë hun.’ 12 Celë hi matre, perofetane jë nge hape jë koi angatr: ‘Hane hi la hna qaja hnei Iehova Joxu Ka Sisitria: “Nöjenge fe, tro ni a fe la itre hua i epun me xomi epuni qa lai, nge tro ni a bëeke sai epuni a tro Isaraela. 13 Tro hë epun nöjeng a atre laka, Iehova ni, ngöne la eni a troa fe la itre hua i epun, me xomi epuni qa lai!”’ 14 ‘Tro ni a amë thei epun la uang matre mele pi epun, nge tro ni a ami epuni ngöne la nöje i epun. Nge tro epuni a atre e cili laka, eni Iehova la ka qaja, nge eni hi la ka kuca,’ öni Iehova.”

15 Ame hnei Iehova hmaca hna ewekë koi ni, me hape: 16 “Eö nekö i atr, xome jë la ketre sine sinöe nge cinyanyine ju ka hape: ‘Thatraqai Iudra me angetre Isaraela ka ceme angeic.*’ Thupene lai, xome hmaca jë la ketre sine sinöe nge cinyanyine ju ka hape: ‘Thatraqai Iosefa memine la angetre Isaraela ka ceme angeic, la sine sinöe i Eferaima.’ 17 Nge ase jë hi, iasenyi nyidroti jë matre casi ju pe hi la sine sinöe ngöne la ime i ö. 18 Ame hë la itre atren* la nöje i ö a qaja ka hape: ‘Pane qejepengöne jë koi hun,’ 19 qa i ö troa sa koi angatr ka hape: ‘Hane hi la hna qaja hnei Iehova Joxu Ka Sisitria: “Tro ni a xome la sine sinöe i Iosefa, lo hna ea hnei Eferaima memine la itre tribu i Isaraela ka ceme angeic, thupene lai, tro ni a acasin ej memine la sine sinöe i Iudra. Tro ni a acasi nyidro matre casi ju pe hi ngöne la imeng.”’ 20 Loi e tro eö a ea la lue sine sinöe hnei ö hna cinyanyin, matre tro angatr a öhn.

21 “Thupene lai, hape jë koi angatr: ‘Hane hi la hna qaja hnei Iehova Joxu Ka Sisitria: “Tro ni a xome la angetre Isaraela qa ngöne la itre nöj hnei angatr hna tro kow, me acasi angatr qa ngöne la nöjei götran, me bëeke sai angatr kowe la nöje i angatr. 22 Tro ni a kuca matre casi ju pe hi la nöje i angatr, hune la itre wetr ne Isaraela, nge tro pe hi a ca joxu i angatr. Tha tro hmaca kö nyidro a lue nöj, nge tha tro hmaca kö a thawaluë nyidro koi lue baselaia. 23 Tha tro hmaca kö angatr a pui ngazo hnene la itre idrola i angatr ka sis,* me itre huliwa i angatr hna methinën, memine la nöjei tria i angatr. Tro ni a thepe angatr qa ngöne la itre tria i angatr lo angatr a tha mele nyipici, nge tro hë ni a ahmitrötrë angatr. Tro hë angatr a nöjeng, nge tro ni a Akötresi angatr.

24 “‘“Tro Dravita hlueng a joxu i angatr, nge casi hi la atre thupë mamoe i angatr. Tro angatr a trongëne la itre hnenge hna amekötin, me drengethenge hnyawa la itre wathebong. 25 Tro angatr a lapane la nöj hnenge hna hamëne koi Iakobo hlueng, lo nöj hna mele ngön hnene la itre qaaqaa i angatr, me lapa palua e cili, angatr, me itre nekö i angatr,* me itre api i angatr. Nge tro Dravita hlueng a joxu* i angatr uti hë epine palua.

26 “‘“Tro ni a kuca la ketre isisinyikeu ne tingeting me angatr; ketre isisinyikeu ka epine palua. Tro ni a alapa angatr ngöne la nöje i angatr, me kuca matre ala nyimu jë angatr, nge tro ni acile hutine la hnë hmi koi ni nyipi angatr. 27 Tro ha acile la itateng* thei angatr;* tro ni a Akötresi angatr, nge tro angatr a nöjeng. 28 Ame hë la kola acile hutine la hnë hmi koi ni nyipi angatr, tro hë la itre nöj a atre laka, eni Iehova la ka ahmitrötrë Isaraela.”’”