Hnaaluene Tus i Aqane Lapa Itre Joxu
19 Nge hna bëeke hmaca hnei Iehosafata joxu ne Iudra kowe la hnalapa i nyidrë e Ierusalema, nge ka egöcatre* nyidrë. 2 Ame hnei Iehu nekö i Hanani atre qeje pu hna tro koi nyidrë, me hape: “Hapeu, tro nyipëti a isigöline la atre ka ngazo? Itre ka methinë Iehova la nyine tro nyipëti a hnim? Pine lai, ka wesitr Iehova koi nyipë. 3 Ngo hetre ewekë ka loi thei nyipë, ke hnei nyipëti hna apatren qa ngöne la nöj, la itre ipoto ka hmitrötr, nge hnei nyipëti hna hnëkëne la hni nyipë,* troa thele la nyipi Akötresie.”
4 Nge Iehosafata pala hi a lapa e Ierusalema, nge hnei nyidrëti hna wange trongëne hmaca la nöj, qane Bereseba uti hë la itre wetr ne Eferaima, matre abëekë angatr koi Iehova, Akötresi ne la itre qaaqaa i angatr. 5 Nyidrëti a acile ju fe la itre atre iameköti ngöne la nöj, ngöne la nöjei traon hna eköhagen ne Iudra, ketre traon thupene la ketre traon. 6 Nge öni nyidrë kowe la itre atre iameköti: “Wange hnyawa kö la huliwa i epun, ke tha epuni kö a iameköti göi atr, ngo göi Iehova. Nge ce nyidrë me epun la epuni a ameköti ewekë. 7 Haawe, loi e tro pala hi epuni a xoue Iehova, me thupëne la huliwa i epun. Ke ame Iehova Akötresi së, ka meköti pala hi nyidrë, nge tha ka ië hna hnimi kö, nge tha nyine itöne kö.”
8 Nge e Ierusalema fe, hnei Iehosafata hna acile la itre xa angetre Levi, me itre xa atre huuj, me itre tixe ne lapa e Isaraela, matre tro angatr a iameköti ngöne la ëje i Iehova, me senge la itre jol ne la itre ka lapa e Ierusalema. 9 Nge öni nyidrë koi angatr: “Hane hi la nyine tro epuni a kuca matre ujë thenge la xoue Iehova, me nyipici pala hi hnene la hni ka pexej: 10 E nöjei ijine kola traqa koi epun hnene la itre trejin me epun ka lapa ngöne itre xa traon, nge angatr a wai epun pine aneni madra, maine hnying göne la ketre wathebo, maine hna amekötin, maine hna isenyin, maine hna acil, qa i epun troa hmekë angatr, wanga hetre ngazo i angatre jë qëmeke i Iehova, ke tro hë nyidrëti a elëhni koi epun me itre trejin me epun. Celë hi aqane tro epuni a ujë, matre tha tro kö a hetre ngazo i epun. 11 Hane hi lae Amaria, tane la itre atre huuj, hna acili angeic hui epun göne la nöjei ewekë i Iehova. Nge ame Zabedia nekö i Isamaela, angeice hi la ka elemekene la tribu ne Iudra göne la nöjei jole i joxu. Nge ame la angetre Levi, tro angatr a xatua epun. Haawe, catre pi nge huliwa jë, nge epi tro Iehova a ce memine la itre ka kuca la loi.”*