Numera
21 Ame hë la kola dreng hnene la joxu ne Arada qa Kanana, lo ka lapa e Negeb ka hape, hnene la angetre Isaraela hna fetra qa ngöne la gojenyi ne Atharima, nyidrëti a tro jë troa isi me angatr, me akalabusi itre xan. 2 Matre hnene la angetre Isaraela hna sisinyi koi Iehova me hape: “Maine tro nyipëti a nue kowe la ime hun la nöje celë, tro fe huni a apatrene la itre traone i angatr.” 3 Iehova a drenge ju la aqane ewekë ne la angetre Isaraela, me nue la angetre Kanana koi angatr; ame hna lep apatren la angetre Kanana me itre traone i angatr. Celë hi matre hna ati ëjen la götrane cili, Horema.*
4 Ame hë la angetre Isaraela a tro qa ngöne la Wetre Hora, me trongëne la gojenyi ne la hnagejë ka palulu, matre kanothe la nöje Edroma, hnene la nöj hna nyiqane kucakuca e kuhu gojeny. 5 Nge hnene la nöj hna eetr* koi Akötresie me Mose me hape: “Hnauëne laka, hnei epon hna tro sai hun qa Aigupito, matre troa meci ngöne la hnapapa? Goi pë fe xeni me tim, nge cane methi hun la falawa celë.” 6 Ame hnei Iehova hna upe la itre un hna mecin* kowe la nöj, matre hej la angetre Isaraela, nge nyimutre pi hë la ka mec.
7 Matre hnene la nöj hna tro koi Mose me hape: “Hne huni hna ngazo koi Iehova me koi ö, lo eahuni a eetr. Pane thithi sai huni jë koi Iehova, matre tro nyidrëti a ananyine qaathe hun la itre un.” Ame hnei Mose hna thithi sai angatr. 8 Nge öni Iehova jë hi koi Mose: “Kuca jë la ketre un hna mecin, nge atë jë hune la sinöe. Nge e traqa hej la ketre atr, tro hi angeic a goeëne la un hna kuca, matre tro angeic a mel.” 9 Ame hnei Mose hna canga kuca la ketre une kopa, me atë hune la sinöe; maine kola hej la ketre atr hnei un, nge angeic a goeëne la une kopa, ke tro kö angeic a mel.
10 Thupene lai, angetre Isaraela a tro pi me lapa e Oboth. 11 Nge angatr a tro pi qa Oboth, me lapa e Ieabarima, ngöne la hnapapa ka qëmeke koi Moaba götrane koië. 12 Nge angatr a tro pi qa lai, me lapa ezine la hnathup ne Zareda. 13 Angatr a tro hmaca pi qa lai me lapa e Arenona, ngöne la hnapapa ka tro uti hë la ifego ne la nöje Amora. Ke ame la nöje Arenona, celë hi ifego ne la nöje Moaba, me nöje Amora; 14 Celë hi kepin matre kola qaja hnene la tusi ne la itre isi i Iehova ka hape: “Vaeba e Sufa me itre hnathup* ne Arenona, 15 me gaa utiut ne la itre hnathup, ka tro qa Aro uti hë la ifego ne Moaba.”
16 Thupene lai, hnei angatr hna tro Bere, lo hnë tha tim hnei Iehova hna qaja koi Mose ka hape: “Icasinekeune jë la nöj, matre tro ni a thue ime i angatre tim.”
17 Ngöne la ijine cili, hnene la angetre Isaraela hna thinge la nyima celë:
“Epi cua pi la hnë tha tim! Nyima jë kow ej!
18 Lo hnë tha tim hna sin hnene la itre nekö i joxu, me itre he ne nöj,
Cememine la sine tö ne mus, me itre sipu tö i angatr.”
Thupene lai, angatr a tro pi qa ngöne la hnapapa a tro Matana, 19 nge qa Matana a tro Nahaliela, nge qa Nahaliela a tro Bamoth, 20 nge qa Bamoth, angatr a tro jë kowe la hnathup ngöne la nöje Moaba,* kowe la hene wetre Pisega, ke mama cile hi Iesimona* qa cili.
21 Ame hnene la angetre Isaraela hna upe la itre ka tro fë maca, troa qaja koi Sihona joxu i angetre Amora ka hape: 22 “Nue huni pi troa tro nyipine la nöje i nyipë! Tha tro kö huni a trongëne la itre hlapa, maine itre hlapa vin, nge tha tro kö huni a iji tim qa ngöne la itre hnë tha tim i epun. Tro kö huni a trongëne la gojenyi ne la joxu, uti hë la troa sasaithe la nöje i nyipë.” 23 Ngo tha hnei Sihona kö hna nue la angetre Isaraela troa tro nyipine la nöje i nyidrë. Hnei nyidrëti pe hna icasinekeun asë la trongene isi i nyidrë, me tro troa isi me angetre Isaraela ngöne la hnapapa; ame hnei nyidrëti hna traqa e Iahaza troa isi me angatr. 24 Ngo hnene la angetre Isaraela hna ngaa nyidrëti hnei taua, me thapa la nöje i nyidrë qane Arerona uti hë Iaboka ezine la angetre Amona; ke lue nöje ka easenyi la nöje i Iazera memine la nöj ne la angetre Amona.
25 Matre hnene la angetre Isaraela hna thapa asë la itre traone cili, me lapan asë la itre traone i angetre Amora e Hesebona, me itre götran ej asë.* 26 Ke Hesebona hi lo traone i Sihona joxu i angetre Amora, lo ka isi memine la joxu ne Moaba, me thapa la nöje i nyidrë uti hë e Arenona. 27 Nge qa cili hi la kola eköthe la edromë celë nyine ithaipië:
“Tro jë a tro Hesebona!
Nge epi troa xupe la traone i Sihona, me acile hutin ej!
28 Ke hna fetra la ketre eë qa Hesebona, memine la ukahlokine qa ngöne la lapa i Sihona.
Nge hnen ej hna dreuthetriji Aro ne Moaba, me itre joxu ne la itre gaa draië ne Arenona.
29 Ekölöhini ö Moaba! Tro ha lep apatrenyi ö, nöje Kemosa!
Hnei ö hna nue la itre nekö i ö trahmanyi troa kötre mel, me itre nekö i ö jajiny troa akalabusin hnei Sihona, joxu ne Amora.
30 Tro sa isi me angatr;
Tro ha lep apatrenyi Hesebona uti hë e Dibona;
Tro sa lep apatrenyi angatr uti hë e Nofa;
Tro ha mel la eë uti hë e Medeba.”
31 Ame hnene la angetre Isaraela hna lapane la nöje i angetre Amora. 32 Matre hnei Mose hna upe la itre trahmanyi troa waipengöne la nöje Iazera, nge hnene la angetre Isaraela hna thapa la itre götran ej, me helëne la angetre Amora qa cili. 33 Thupene lai, hnei angatr hna kano me elë kowe la gojenyi ne tro kowe la nöje Basana. Nge hnei Oga joxu ne Basana, hna ce uti memine la trongene isi i nyidrë troa isi me angatr e Ederei. 34 Matre öni Iehova jë hi koi Mose: “The xoue angeice kö, ke tro ni a nue angeic kowe la ime i ö, me trongene isi i angeic asë, me nöje i angeic. Nge tro hë eö a kuca koi angeic, tune lo hnei ö hna kuca koi Sihona joxu i angetre Amora, ka lapa e Hesebona.” 35 Ame hnene la angetre Isaraela hna lepi nyidrë, me itre nekö i nyidrë, me trongene isi i nyidrë, uti hnyawa la kola pë atr ka mel; nge hnene la angetre Isaraela hna thapa la nöje i nyidrë.