Levitiko

15 Öni Iehova hmaca jë hi koi Mose me Arona: 2 “Hape jë kowe la angetre Isaraela: ‘Maine hetre zane ka neni qa ngöne la kahmitrötre ne la trahmany, haawe pui ngazo hë angeic. 3 Pui ngazo hë angeice lai hnene la trenge zan; ngacama kola neni la zan qa ngöne la kahmitrötre i angeic, maine eje pena a axetin, ngo ka pui ngazo pala hi angeic.

4 “‘Nge ame asë hi la itre göhnë hna mekölen, me nöjei ewekë asë hna lapan hnene la atr ka hetre zane ka neni, tro hë itre ej a pui ngazo. 5 Nge ame la atre ketr la göhnë ne la atre cili, qa i angeic troa wasin la itre iheetre i angeic, me sië tim, nge tro hë angeic a pui ngazo uti hë e hej. 6 Nge ame la atre lapa hune la ketre ewekë hna lapan hnene la atr ka hetre zane ka neni, qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 7 Nge ame la atre ketr la atr ka hetre zane ka neni, qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 8 Nge maine ame la atr ka hetre zane ka neni, angeic a hnyijuën la ketre atr ka pui loi, qa ne la atre cili troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 9 Nge ame la nöjei sadrel hna tith hnene la atr ka hetre zane ka neni, tro hë itre ej a pui ngazo. 10 Nge ame la atre ketr la nöjei pengöne ewekë hna lapan hnene la atre cili, tro hë angeic a pui ngazo uti hë e hej. Nge ame la atre ajöne la itre ewekë cili, qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 11 Nge maine ame la atr ka hetre zane ka neni, tha hnei angeice kö hna wasine la lue ime i angeic hnei tim, nge kola ketr la ketre atr, qa ne la atre cili troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 12 Nge ame la trengen hna xup hnei dro hna ketr hnene la atr ka hetre zane ka neni, ke troa thëtrij. Nge ame la nöjei trengen hna kuca hnei sinöe, ke troa wasin hnei tim.

13 “‘Nge maine tha neni hë la zan ne la trahmany, lo ka apuingazo angeic, tro hë angeic a treqene la 7 lao drai matre pui loi hmaca jë angeic. Qa i angeic troa wasin la itre iheetre i angeic, me sië angeic ngöne la tim ka neni, nge tro hë angeic a pui loi. 14 Nge ame ngöne la hna 8 ne drai, qa i angeic troa tro fë qëmekei Iehova la lue meketrë, maine lue neköi piny ngöne la hnë lö ne la itat ne icasikeu. Nge tro hë angeic a hamën kowe la atre huuj. 15 Nge tro pë hë la atre huuj a huujën la lue waco: ca nyine huuj ne ngazo, nge cas nyine huuj ne dreuth asë. Nge tro la atre huuj a apuiloinyi angeic qëmekei Iehova, ke ka pui ngazo angeic, hnene la hna neni la zane i angeic.

16 “‘Nge maine hna neni la zane ngönetrei ne la ketre trahmany, qa i angeic troa siën asë la ngönetrei angeic hnei tim, nge tro hë angeic a pui ngazo uti hë e hej. 17 Nge ame la itre iheetr me itre kupeine öni ka hetre zane ngönetrei, tro hë angeic a wasin asë itre ej ngöne la tim, nge tro hë itre ej a pui ngazo uti hë e hej.

18 “‘Nge ame la trahmanyi ka neni zane ngönetrei, ngöne la kola ce meköl memine la ketre föe, tro hë nyidroti a sië tim, me pui ngazo uti hë e hej.

19 “‘Nge maine kola neni la madra ne la föe, tro hë eahlo a lapa fë la pui ngazo i eahlo koi 7 lao drai, hnene la hna traqa la meci föe. Nge ame la atre ketri eahlo, tro hë angeic a pui ngazo uti hë e hej. 20 Nge ame la nöjei ewekë hnei eahlo hna mekölen, me lapan ngöne la ijine eahlo a pui ngazo hnene la hna traqa la meci föe, ke tro ha pui ngazo. 21 Nge ame la atre ketr la göhnë hna mekölen hnei eahlo, qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 22 Nge ame la atre ketr la nöjei pengöne ewekë hna lapan hnei eahlo, qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej. 23 Nge ame la atre ketr la nöjei pengöne ewekë hnei eahlo hna mekölen maine lapan, tro hë angeic a pui ngazo uti hë e hej. 24 Nge maine tro la ketre trahmanyi a ce meköl me eahlo, nge si madra hë nyidrë qaathei eahlo, tro hë la trahmanyi a pui ngazo koi 7 lao drai. Nge ame la nöjei göhnë hnei nyidrëti hna troa mekölen, tro hë itre ej a pui ngazo.

25 “‘Nge maine kola neni la madra ne la ketre föe koi nyimu drai, ngo tha ijine traqa pala kö la meci föe, maine hna sasaith la ijine cili, tro hë eahlo a pui ngazo e nöjei drai ne kola neni la madra i eahlo, tune lo ijine eahlo a pui ngazo hnene lo meci föe. 26 Nge ame la nöjei göhnë hnei eahlo hna mekölen lo ijine kola neni la madra i eahlo, ke tro ha tune la göhnë hnei eahlo hna mekölen lo eahlo a pui ngazo hnene la meci föe. Nge ame la nöjei ewekë hnei eahlo hna troa lapa ngön, tro hë itre ej a pui ngazo tune lo ijine eahlo a pui ngazo hnene la meci föe. 27 Nge ame la atre ketr itre ej, tro hë angeic a pui ngazo, nge qa i angeic troa wasin la itre iheetre i angeic, me sië angeic hnei tim, nge tro hë angeic a pui ngazo uti hë e hej.

28 “‘Nge maine tha neni hë la madra i eahlo, tro hë eahlo a treqene la 7 lao drai, matre pui loi jë eahlo. 29 Nge ame ngöne la hna 8 ne drai, qa i eahlo troa xome la lue meketrë maine lue neköi piny, nge tro hë eahlo a tro fë kowe la atre huuj ngöne la hnë lö ne la itat ne icasikeu. 30 Nge tro pë hë la atre huuj a huujëne la ca waco nyine huuj ne ngazo, me cas nyine huuj ne dreuth asë. Qa ne la atre huuj troa apuiloinyi eahlo qëmekei Iehova, pine eahlo pui ngazo* qa ngöne la hna neni la madra i eahlo.

31 “‘Haawe, qa i epun troa thupëne* la angetre Isaraela qa ngöne la pui ngazo i angatr, matre tha tro kö angatr a mec hnene la pui ngazo i angatr, pine angatr tha metrötrëne la uma maanong ka ej nyipi angatr.

32 “‘Celë hi wathebo kowe la trahmany ka hetre zane ka neni, me göne la trahmany ka pui ngazo hnene la hna neni la zane ngönetrei, 33 me göne la föe ka pui ngazo ngöne la ijine ne traqa la meci föe, me göne la trahmany maine föe ka hetre zane ka neni, me göne la trahmany ka ce meköl memine la föe ka pui ngazo.’”