Esodro

36 “Nge tro Bezaleli a ce huliwa me Aholiaba, me nöjei atr ka maca,* lo hnei Iehova hna hamë inamacane kow, me wangatrehmekun troa kuca la nöjei huliwa ka hmitrötr, thenge la hna amekötin hnei Iehova.”

2 Ame hnei Mose hna hë Bezaleli me Aholiaba, memine la nöjei atre ka atrein, lo hnei Iehova hna hamë inamacane kow me wangatrehmekun, nöjei trahmany ka hetre hni ka ajan troa kuca la huliwa. 3 Matre angatr a xome jë la nöjei ahnahna hna traqa fë hnei angetre Isaraela koi Mose, thatraqane la huliwa ka hmitrötr. Nge angetre Isaraela pala hi a traqa fë ahnahna e nöjei hmakany.

4 Thupene la hna nyiqane la huliwa ka hmitrötr, hna isa traqa hnene la nöjei atre ka atreine kuca la nöjei pengöne huliwa. 5 Nge öni angatr koi Mose: “Tru catre pala ha la hna traqa fë hnene la nöj kowe la huliwa hna amekötin hnei Iehova.” 6 Matre Mose a iupi jë troa qaja trongën ngöne la lapa ka hape: “Itre trahmanyi me itre föe, the traqa fë hmaca kö la itre ahnahna kowe la ahnahna ka hmitrötr.” Qa ngöne lai, hna acilëne la nöj matre tha tro hmaca kö a traqa fë la ketre ewekë. 7 Ke ijije hë la nöjei ewekë hna traqa fë kowe la huliwa, nge munë ju pe kö.

8 Matre hnene la nöjei atr ka atreine kuca la nöjei pengöne huliwa, hna acile la uma maano, memine la 10 lao imaano hna kuca hnei nyipi lino hna el, me theny ka bulu, me drela ka madra, me theiny ka madra palulu. Nge hune la itre imaano, hnei angeic* hna sile la itre kerubi. 9 Ame la itre imaano, isa 28 kubit* la eqeane itr’ ej, nge 4 kubit la eisaisan. Nge casi hi la tulu ne la itre imaano. 10 Nge angeic a isilikeune ju la 5 lao imaano, me ce isilikeune hmaca ju la 5 lao imaano. 11 Nge angeic a kuca jë la itre otru hnene la theny ka bulu ngöne la xötr ezin ne la imaano, hmekune lo hna pane isilekeun. Nge angeic a kuca tune ju fe ngöne la ketre götran hna isilikeun, ngöne la hna itö. 12 Nge angeic a kuca ju la 50 lao otru ngöne la ketre imaano, me 50 ngöne la pune la ketre imaano. Matre ame la itre otru, itre ej a iqëmekekeu. 13 Thupene lai, hnei angeic hna kuca la 50 lao nyine acatrene gool, me acatrene la itre imaano hnene la itre nyine acatren, matre casi hë la uma maano.

14 Nge hnei angeic hna kuca la itre imaano hnei pene nani, göi troa petrëne la uma maano. Hnei angeic hna kuca la 11 lao imaano. 15 Ame la itre imaano, ke 30 lao kubit la eqean, nge 4 kubit la eisaisan. Nge ame la 11 lao imaano, casi hi la tulu ne itre ej. 16 Nge angeic a iacatrenekeune jë la 5 lao imaano, me iacatrenekeune hmaca kö la 6 lao imaano. 17 Thupene lai, hnei angeic hna kuca la 50 lao otru ngöne la pun ne lai imaano, hmekune lo hna iacatrenekeun, ngöne la hna itö. Nge hnei angeic hna kuca la 50 lao otru ngöne la pune la imaano ne la ketre götrane hna iacatrenekeun, ngöne la hna itö. 18 Nge angeic a kuca jë fe la 50 lao nyine acatrene kopa, matre acasine la itat, matre casi hë ej.

19 Angeic a kuca jë la ketre isitr hnei kupeine mamoe hna amadran, me ketre isitr hnei kupeine fok* matre hetrëne la uma maano.

20 Angeic a kuca jë la itre inehe hnei sinöe akasia, nge hna acilën itre ej. 21 Ame la itre inehe, tre, 10 kubit la edraiën, nge ca kubit nge sin la eisaisan. 22 Nge ame la itre inehe, isa hetre lue can ej,* nge itre ej a cile ihmeku. Celë hi aqane kuca i angeic kowe la itre inehe ne la uma maano asë. 23 Hnei angeice fe hna kuca la 20 lao inehe ngöne la götrane kolojë ne la uma maano. 24 Nge hnei angeice fe hna kuca la 40 lao trepene sileva hna kuj, me amë fene la 20 lao inehe: lue trepene hna kuj fene la pane inehe ngöne la lue can ej, nge lue trepene hna kuj fene la itre xa inehe ngöne la lue can ej. 25 Nge ame la ketre götrane lai uma maano e kolopi, angeic a kuca jë la 20 lao inehe, 26 memine fe la 40 lao trepene sileva hna kuj: lue trepen hna kuj fene la pane inehe, nge lue trepene hna kuj fene la itre xa inehe e thupen.

27 Nge ngöne la götrane kuë tröne la uma maano, angeic a kuca jë la 6 lao inehe. 28 Nge angeic a kuca jë la lue inehe nyine sine feni ne la lue kona, hutrö ne la uma maano. 29 Ame la itre sine feni, tre, lue ej a ce tro qa kuhu, a tro draië kowe lo pane otru. Nge angeic a kuca tune fe kowe la lue sine feni ne kona. 30 Ame la etrune itre ej, ke traqa koi 8 lao inehe, nge 16 lao trepene sileva hna kuj: lue trepene ka xulu fene la isa ca inehe.

31 Nge hnei angeic hna kuca la itre agö hnei sinöe akasia: 5 lao agö göne la itre inehe ne la ketre götrane ne la uma maano, 32 nge 5 lao agö göne la itre inehe ne la ketre götran ne la uma maano. Nge 5 fe lao agö göne la itre inehe ne la götrane kuë tröne la uma maano. 33 Nge angeic a kuca jë la ketre agö ka troa lapa nyipin ne la itre inehe, nge tro ej a tro qa ngöne la ketre pun kowe la ketre pun. 34 Nge angeic a pele goolëne jë la itre inehe, me kuca la itre otru ne ej hnei gool, nyine tane la itre agö. Nge angeic a pele goolëne jë la itre agö.

35 Angeic a kuca jë la imaano ne thewe hnahag hnei theny ka bulu, me drela ka madra, me theny ka madra palulu, me nyipi lino hna el. Nge angeic a sile jë la itre kerubi hune la imaano ne thewe hnahag. 36 Angeic a kuca jë fe la 4 lao sine feni akasia hna pele goolën, me itre nyine jele gool, nge hnei angeic hna dreu sileva nyine kuca la 4 lao trepene sileva hna kuj. 37 Nge ame ngöne la hnë lö ne la itat, angeic a kuca jë la irido ka hmelele hnei theny ka bulu, me drela ka madra, me theny ka madra palulu, me nyipi lino hna ielekeun, 38 memine fe la 5 lao sine feni ne ej, me itre nyine jel. Nge angeic a pelethe jë hnei gool la itre nyine itönekeun memine la itre nyine acatren.* Ngo ame pë hë la 5 lao trepene hna kuj, ke hna kuca hnei kopa.