Ezekiela
21 Hnei Iehova hmaca hna ewekë koi ni, me hape: 2 “Nekö i atr, xei jë a tro Ierusalema. Tro fë jë la maca celë kowe la itre götrane gaa hmitrötr, nge perofetane jë göi Isaraela. 3 Hape jë koi Isaraela: ‘Hane hi la hna qaja hnei Iehova: “Tro ni a lepi ö. Eje hi, tro ni a uthe la tauang qa ngöne la trengen, me apatrene la itre atr ka meköt me ka ngazo qaathei ö. 4 Pine laka tro ni a apatren qaathei ö la itre atr ka meköt me ka ngazo, haawe tro hë ni a uthe la tauang qa ngöne la trengen, matre lepe la nöjei atr* asë qa kolojë uti hë kolopi. 5 Nge e cili, tro hë la nöjei atr a atre laka, ase hë ni Iehova uthe la tauang. Tha tro hmaca kö ej a bëek kowe la trengen ej.”’
6 “Nge ame eö nekö i atr, loi e tro eö a awe me hmengöhmengön.* Eje hi, awe catre jë qëmekei angatr. 7 Nge e tro angatr a hnyingë eö ka hape: ‘Hnauëne la eö a awe?’, Sa jë ka hape: ‘Pine la ketre maca.’ Ke tro kö ej a eatr, nge tro pë hë a meci hnei xou hnene la nöjei hni asë, nge tro ha thipe la itre ime i angatr, me kucakuca la itre mekuna i angatr, nge tro ha neni la tim hune la lue iwatingöneca i angatr.* ‘Dreng! Tro kö lai a traqa, nge tro kö lai a eatr,’ öni Iehova Joxu Ka Sisitria.”
8 Ame hnei Iehova hmaca hna ewekë koi ni me hape: 9 “Nekö i atr, perofetane jë ka hape: ‘Hane hi la hna qaja hnei Iehova: “Hape jë: ‘Ketre taua! Kola xöle la taua me jie alolon ej. 10 Kola xöl ej matre nyimutre la hna troa humuth, me jie alolon ej matre melemel tune la samek.’”’”
“Hapeu, tha tro kö sa madrin?”
“‘Tro kö ej* a thipetrij la sine tö ne la neköng, tune la aqane kuca ej kowe la nöjei sinöe?
11 “‘Kola nue troa xöle la taua matre tro la ketre atr a huliwan. Hna xöle me djafine la taua cili, matre hamën kowe la atre ihumuth.
12 “‘Nekö i atr, sue jë nge treije jë, ke traqa ha ej troa lepe la nöjeng; hna hna la taua kowe la nöjei tan ne Isaraela. Tro hë angatr a meci hnei taua, angatr me nöjeng, celë hi matre, xexe jë la itrepë i ö hnei hleuhleu. 13 Ke ase hë waipengöne la nöjeng. Nge nemene ju hë la ka troa traqa e tro la taua a thipetrij la sine tö ne mus? Tro hë eje* lai a patr,’ öni Iehova Joxu Ka Sisitria.
14 “Nge ame eö nekö i atr, perofetane jë, xexe jë, nge akönia qaja jë ka hape: ‘Ketre taua!’ Ene la taua ne la itre hna humuth, taua ka humuth la ka ala nyim, me taua ka tro kanothi angatr. 15 Tro la itre hni i angatr a hnö hnei xou, nge ala nyimu la itre ka troa kei ngöne la itre qëhnelö ne la traon; tro ni a humuth la ka ala nyimu hnei taua. Eje hi, ej a melemel tune la samek, nge hna djafin eje hnyawa thatraqane la ihumuth ka tru! 16 Thupa pi ngöne la götrane maca! Lepe jë ngöne la götrane mi! Tro jë ngöne la nöjei götran hna hnan la taua i ö! 17 Nge tro fe ni a hane xexe me apujene la elëhning. Eni Iehova la ka qaja lai.”
18 Nge hnei Iehova hmaca hna ewekë koi ni me hape: 19 “Ame eö nekö i atr, köjane jë la lue gojeny matre tro la taua ne la joxu ne Babulona a traqa. Tro la lue gojenyi cili a tro qa ngöne la nöj ka cas. Nge tro ha acil la ketre ipoto* ngöne la hna ijejea kowe la lue traon. 20 Qa i ö troa köjan la gojeny, matre tro la taua a traqa troa lepi Raba ne la angetre Amona, me köjane la ketre gojeny matre tro ej a lepi Ierusalema e Iudra, lo traon hna eköhagen. 21 Ke kola cil la joxu ne Babulona ngöne la hna ijejea troa kuci haze e cili. Angeic a jumejum la itre ane pehna, me hnying kowe la itre idrola,* me waipengöne la idre, 22 matre mama pi Ierusalema ngöne la ime maca i angeic, göi troa amë la itre nyine jei qëhnelö, me iupi troa ihumuth, me sue ne isi, me amë la itre agö matre thë la itre qëhnelö, me acile la ketre ija ne isi, me xupe la ketre ihage ne isi. 23 Ame kowe la itre* ka sisinyi koi angatr, ke ka thoi lai. Ngo mekun pala kö nyidrëti la ngazo i angatr, matre tro kö nyidrëti a xolouthi angatr.
24 “Haawe, hane hi la hna qaja hnei Iehova Joxu Ka Sisitria: ‘Maine easë pala kö a mekun la ngazo i epun, ke hnene laka, hnei epuni hna qaja la itre tria i epun, me amamane la itre ngazo i epun ngöne la nöjei huliwa i epuni asë. Nge pine laka, kolo ha meku epun, tro ha kötre sai epun.’*
25 “Ngo traqa ha la drai i ö, eö atr hna lepe humuth, nge tan ka iakötrë ne Isaraela. Traqa ha la ijine troa amekötin palua eö. 26 Hane hi la hna qaja hnei Iehova Joxu Ka Sisitria: ‘Una pi la nyine atu he memine la korona. Tro ha saze la itre ewekë. Adraiëne jë la ka ipië nge aipiëne ju la ka draië. 27 Tro ni a kuca matre tro pë hë ej a itraetë, itraetë, itraetë. Nge tha tro hmaca kö la ketre atr a musi kowe ej* uti hë la kola traqa la atr ka ijij, nge tro ni a hamën ej koi angeic.’
28 “Nge ame eö nekö i atr, perofetane jë ka hape: ‘Hane hi la hna qaja hnei Iehova Joxu Ka Sisitria göi angetre Amona me itre iqaqa i angatr.’ Hape jë: ‘Ketre taua! Kola uthe la taua matre humuth la ka ala nyim; hna djafin ej matre ulum me melemel tune la samek. 29 Ngacama hetre hna meköle goeën ka tria me itre hna perofetan ka thoi göi ö, ngo tro ha iatëkeun la itre ngönetrei ka mec hune la itre hna humuth,* ene lo itre atr ka ngazo, ke traqa ha la drai i angatr, lo ijin ne lepi angatre palua. 30 Amë hmaca ju la taua ngöne la trengen. Tro ni a ameköti ö ngöne la götran hna xupi ö, lo nöj hna xupi ö ngön. 31 Tro ni a nenge la elëhning hui ö. Tro ni a ufi ö memine la eë ne la trengehning, me nue eö kowe la itre atr ka iaxösisi, lo itre ka huliwa thatraqane la iapatreny. 32 Tro hë eö a tune la nyine athi een. Tro ha neni la madra i ö ngöne la nöj. Tha tro hmaca kö a meku eö, ke ase hë ni Iehova ithanata.’”