Esodro

30 “Tro eö a kuca la ca ita ne huuj nyine dreu ka pui loi, nge tro eö a kuca hnei sinöe akasia. 2 Nge tro hi a cas la eqeane la 4 lao götrane la ita ne huuj. Nge troa ca kubit la eqean, me ca kubit la eisaisan, me lue kubit la edraiën. Nge ame la ita ne huuj memine la itre jian, hna ce xup itre ej asë. 3 Tro eö a heetrën asë hnei nyipi gool: la götran ka he hun, me itre götran xötreith, me itre jian. Nge tro eö a kuca la itre öline gool xötreith. 4 Nge fene la ölin, ngöne la lue götran ka iqëmekekeu, acatrene ju la lue otru gool ngöne la lue götran, nge tro ha alöne la itre tan göi troa kapa trongën. 5 Kuca jë la itre tan hnei sinöe akasia, nge pele goolëne jë. 6 Tro eö a amë la ita ne huuj qëmekene la imaano ne thewe hnahag, ezine la pua ne Anyipicin, qëmekene la thingen ka he hune la nyine Anyipicin, ngöne la götran tro ni a mama koi eö.

7 “E nöjei hmakany, tro Arona a dreuth hune la ita ne huuj la nyine dreu ka pui loi, ngöne la angeic a hnëkëne la itre laam. 8 Nge tro fe Arona a dreuth la nyine dreu ka pui loi, ngöne la angeic a amelene la itre laame cil e kola lö la jö. Ketre huuj ne dreu ka pui loi, nyine kuca lapan hnene la nöjei xötr atr qëmeke i Iehova. 9 Hmitrötre tro epuni a huujëne menun hune la ita ne huuj, la ketre nyine dreu ka pui loi hna wathebon, maine ketre huuj ne dreuth asë, maine ketre huuj ne la itre wene feja. Nge tha tro kö epuni a neng e koho hun ej, la waina nyine fii huuj. 10 Qa i Arona troa nenge hune la itre jiane la ita ne huuj, la sine la madra ne la öni hna huujën thatraqane la ngazo, matre ahmitrötrën ej. Tro angeic a aca kuca ngöne la macatre, matre troa ahmitrötrëne la ita ne huuj ngöne la nöjei xötr atr. Ka nyipi hmitrötre la ita ne huuj koi Iehova.”

11 Öni Iehova hmaca jë hi koi Mose: 12 “Ame la eö a troa sija la ëjene la nöj, me e la etrune la itre nekö i Isaraela, tro angatr a isa hamë thupene mel koi Iehova, la kola sija la itre ëje i angatr. Troa kuca tun, matre tha tro kö a lepi angatr hnei akötr, la kola e la etru i angatr. 13 Hane hi la nyine troa hamën hnene la itre hna siji ëjen: ca sine sekel, thenge la tulu ne sekel ngöne la götrane gaa hmitrötr. Ame la 20 gera, ke ca sekel. Nge ame la sine la ca sekel, tre thatraqai Iehova. 14 Hnëqa ne la nöjei trahmany hna siji ëjen troa hamë ahnahna koi Iehova, qaane la ka 20 lao macatre a tro draië. 15 Tha tro kö la trenamo a hamën atrun, nge tha tro kö a co la hna hamën hnene la ka pë ewekë, ngo tro hi a hamëne la sine la ca sekel nyine ahnahna koi Iehova, matre itö mele i epun. 16 Qa i eö troa xome la mani hna kuiën hnei angetre Isaraela nyine itö mel, nge tro eö a hamën thatraqane la huliwa ne la itat ne icasikeu, matre nyine amekunëne kowe la angetre Isaraela qëmeke i Iehova, matre nyine thupene mel thatraqai epun.”

17 Öni Iehova hmaca jë hi koi Mose ka hape: 18 “Ame göi troa si, xupe jë la ketre trepene tim kopa me itrepen ej, nge amë ju nyipine la itat ne icasikeu memine la ita ne huuj, nge nyialiene jë hnei tim. 19 E cili, tro Arona me itre nekö i angeic a wasi wanakoim me waca. 20 Ame la angatr a lö kowe la itat ne icasikeu, maine easenyine la ita ne huuj troa kuca la huliwa, me huuj ngöne eë koi Iehova, me huhajine la itre huuje i angatr, tro angatr a pane sië tim, matre tha tro kö angatr a mec. 21 Tro angatr a wasine la itre wanakoim me waca i angatr, matre tha tro kö angatr a mec. Nge wathebo lai ka cile hut koi Arona me itre matra i angeic, me kowe la nöjei xötr atr i angatr.”

22 Öni Iehova hmaca jë hi koi Mose ka hape: 23 “Xome jë la itre senitr ka sisitria catr: 500 lao sekele muro ka catr, nge sine la etrune cili, me 250 lao sekele kanel ka pui lolo, me 250 lao sekele hainy ka pui lolo, 24 me 500 lao sekele kanel ka ketre pengön,* thenge la tulu ne sekel ngöne la götrane gaa hmitrötr, me ca hin ne oel elaio. 25 Nge kuca jë la oel ne iën ka hmitrötr; nge troa lone hnyawan ej. Celë hi oel ka hmitrötr nyine iën.

26 “Nge tro eö a nei oel hune la itat ne icasikeu, memine la pua ne Anyipicin, 27 memine la laulau me itre ewekë ka ce tro memin, memine la ita ne laam me itre ewekë ka ce tro memin, memine la ita ne dreu ka pui loi, 28 memine la ita ne huuj thatraqane la itre huuj ne dreuth asë, me itre ewekë ka ce tro memin, memine la trepene tim me trepen ej. 29 Qa i eö troa ahmitrötrën itre ej, matre tro itre ej a nyipi hmitrötr. Nge ame la ka troa ketr itre ej, loi e troa pane ahmitrötrë angeic. 30 Qa i eö troa ië Arona me itre nekö i angeic, me ahmitrötrë angatr, matre tro angatr a itre atre huuj koi ni.

31 “Tro eö a qaja kowe la itre nekö i Isaraela ka hape: ‘Tro pala hi la oel cili, a oele ne iën ka hmitrötre koi ni, ngöne la nöjei xötr atre i epun. 32 Tha tro kö a köle la oele cili ngöne la ngönetrei ne atr, nge tha tro kö epuni a nyitipune la aqane kuca la oele cili, ke ewekë ka hmitrötre lai. Tro pala hi la oele cili a ewekë ka hmitrötre koi epun. 33 Ame la atre ka troa nyitipune la aqane kuca la oele cili, me köl hune la ketre atr nge tha hna aijijëne kö, tro ha apatrenyi angeic qa ngöne la nöje i angeic.’”

34 Nge öni Iehova koi Mose ka hape: “Xome jë la itre senitre celë, nge troa ceitu la etrun itre ej: siane natafa, me sekeletha, me kelibena ka pui lolo, me libanu ka za. 35 Xome jë troa kuci nyine dreu ka pui loi. Troa tuluth me kuca hnyawane la ka pui loi celë. Nge troa sotrën, me pë engazon, me hmitrötr. 36 Xome jë la ca neköi sin nge ahmudrohmudrone jë, nge tro eö a nango amë qëmekene la nyine Anyipicin, ngöne la itat ne icasikeu, ngöne la götrane tro ni a mama koi eö. Tro ej a nyipi hmitrötre koi epun. 37 Tha tro kö epuni a nyitipune la aqane kuca la nyine dreu ka pui loi celë thatraqai epun. Tro ej a hmitrötre koi epun, ke thatraqai Iehova lai. 38 Ame la atre nyitipune la nyine dreu ka pui loi celë, matre punepun ej, tro ha apatrenyi angeic qa ngöne la nöje i angeic.”