Hnaaluene Tus i Aqane Lapa Itre Joxu
13 Ngöne la kola 18 lao macatre ne mus i Ieroboama, hna acili Abia troa joxu ne Iudra. 2 Hnei nyidrë hna musi koi köni macatre e Ierusalema. Maakaia la ëjene la thine i nyidrë, eahlo la nekö i Uriela qa Gibea. Hnei Abia me Ieroboama hna hane isi.
3 Hnei Abia hna tro troa isi me 400 000 lao sooc, itre ka atreine isi nge hna hnëkën. Nge ame Ieroboama, hnei angeic hna acile xötrën qëmeke i angeic la itre sooc, 800000 lao sooc hna hnëkën nge ka catr. 4 Ame hnei Abia hna cil hune la wetr Zemari, hmekune la itre wetr e Eferaima. Nge öni nyidrë: “Drei ni ju Ieroboama me Isaraela asë. 5 Thatre kö epuni laka, hnei Iehova Akötresi Isaraela, hna hamëne la mus ka cile hut koi Dravita me itre nekö i nyidrë, jëne la isisinyikeu ne sotr?* 6 Ngo hnei Ieroboama nekö i Nebata, hlue i Solomona nekö i Dravita, hna mejë me icilekeu memine la joxu i angeic. 7 Nge hnene la itre xa ka pë jol hna nyixöle i angeic, itre ka pë hnënyöngön, nge hnei angatr hna ngaa Reoboama nekö i Solomona. Ke thupëtresij pala kö Reoboama, matre kola cile hnö nge tha ijiji nyidrëti kö troa cile koi angatr.
8 “Nge enehila, epuni a mekun ka hape, ijiji epun troa cile kowe la baselaia i Iehova, lo hna nue koi itre nekö i Dravita, ke ala nyimu epun, nge thei epuni la itre kau gool hnei Ieroboama hna kuca nyine haze i epun. 9 Hnei epuni hna helëne la itre atre huuje i Iehova, lo itre matra i Arona, me angetre Levi. Nge hnei epuni hna sipu acile la itre atre huuje i epun, tune la aqane kuca ne la itre nöje trenyiwa. Ame la nöjei atre menu ka traqa* fë neköi kau, me 7 lao nani trahmany, ijiji angeice fe troa atre huuj ne la itre haze cili, itre haze thoi. 10 Ngo ame eahun, Iehova la Akötresi hun, nge tha hne huni kö hna trotriji nyidrë. Nge itre atre huuj, itre matra i Arona, a nyihlue i Iehova. Nge angetre Levi a xatua angatr ngöne la huliwa i angatr. 11 E nöjei hmakanyi me hej, angatr a huhajin koi Iehova la itre huuj ne dreuth asë, me itre ka pui lolo. Angatr a atë hune la laulau hna kuca hnei nyipi gool, la itre falawa ne iatëkeun.* Nge e nöjei hej, angatr a amelene la itre lam, hune la ita ne lam gool. Eahuni a kuca la huliwa hun koi Iehova Akötresi hun, ngo hnei epuni pe hna triji nyidrë. 12 Ngo goeëne jë enehila! The huni la nyipi Akötresie, nge nyidrëti la ka iuji hun, jëne la itre atre huuje i nyidrë, me itre trutru i angatr, ka nyihatrene troa isi me epun. Haawe angetre Isaraela, the isi kö me Iehova Akötresi ne la itre qaaqaa i epun, ke tha tro kö epuni lai a hun.”
13 Ngo hnei Ieroboama hna upe la itre xa sooc troa zae, matre lep la angetre Iudra qa hutrö. Matre hetre itre sooc i angeic qëmekene la angetre Iudra, nge hetre itre xan ka zae hutrö i angatr. 14 Nge ame hë la angetre Iudra a goe hutrö, öhne ju hi angatr ka hape, tro angatr a isi e qëmek me hutrö. Matre angatr a nyiqaane hë Iehova jë troa xatua angatr, nge itre atre huuj a ufe catrëne la trutru. 15 Ame hnene la angetre Iudra hna sue ne isi, nge Iehova a kuca pi matre tro Abia me Iudra, a ngaa Ieroboama me Isaraela asë. 16 Matre hnei angetre Isaraela hna kötre qëmekei angetre Iudra, nge Akötresie a nue angatre pi koi angetre Iudra. 17 Abia me trongene isi i nyidrë asë, a lepi angatre hnyawa jë, matre thene la angetre Isaraela, hna humuthe la 500 000 lao trahmanyi ka atreine isi. 18 Qa ngöne lai, hna ahmahmanyi angetre Isaraela, ngo hna hun hnei angetre Iudra, ke hnei angatr hna mejiune* koi Iehova, Akötresi ne la itre qaaqaa i angatr. 19 Abia a weje huzu Ieroboama jë, me thapa la itre traon: Bethela me itre traon ezin, me Iesana me itre traon ezin, me Eferona me itre traon ezin. 20 Qane ju hi lai, tha catre hmaca kö Ieroboama lo ijine i Abia. Nge Iehova a lepi angeice ju, matre meci ju hi Ieroboama.
21 Ngo ame kö Abia, nyidrëti pala hi a catr. Matre e thupen, hnei nyidrë hna xome la 14 lao föe, nge hnei angatr hna hnahone la 22 lao nekö trahmany, me 16 lao jajiny. 22 Nge ame la mele i Abia, me itre huliwa me itre trengewekë i nyidrë, hna fejan asë hnine la itre itusi* Ido perofeta.