Hnaaluene Tus i Aqane Lapa Itre Joxu

28 Traqa koi 20 lao macatre i Ahaza lo kola acili joxu nyidrë. Hnei nyidrëti hna mus koi 16 lao macatre e Ierusalema. Tha hnei Ahaza kö hna kuca la loi qëmeke i Iehova, tui Dravita qaaqaa i nyidrë. 2 Hnei nyidrë hna nyitipune la tulu ka ngazo ne la itre joxu ne Isaraela, me xupe fe la itre Baala fao.* 3 Nge hnei nyidrëti fe hna huhajine la itre huuj ngöne la hnathup ne la Nekö i Hinom,* me dreuthe la itre nekö i nyidrë trahmany, me nyitipune la itre thiina ka sis ne la itre nöj, lo hnei Iehova hna helën qëmeke i angetre Isaraela. 4 Hune la itre hnë hmi gaa hmitrötr, me hune la itre sasala, me fene la itre sinöe ka cia lolo, hnei nyidrëti hna tro fë huuj, me huhajine la itre huuje i nyidrë.

5 Celë hi matre, hnei Iehova Akötresi nyidrë hna nuaxöji nyidrë kowe la joxu ne Suria, matre hna ngaa nyidrë hnene la angetre Suria. Hnei angatr hna xolouthe la ka ala nyim, me tro fë la itre hna oth a tro Damaseko. Nge ame Ahaza, hna nue nyidrë kowe la joxu ne Isaraela, matre ngazo pi hë la aqane ngaa Ahaza. 6 Eje hi, hnei Peka nekö i Remalia hna humuth ngöne la ca drai, la 120 000 lao trahmanyi ka catr e Iudra. Hna traqa tun, ke hnei angetre Iudra hna nuetriji Iehova Akötresi ne la itre qaaqaa i angatr. 7 Hnei Zikeri ketre sooc ne Eferaima, hna humuthi Maseia nekö ne la joxu, me Azerikam lo atre thupëne la hnalapa i joxu, me Elekana, lo hnaaluene fei joxu. 8 Ketre, hnei angetre Isaraela hna othe la 200 000 lao föe, me itre nekö trahmanyi me jajiny qa Iudra. Nge nyimutre fe la itre mo hnei angatre hna hlem, me eöth a tro Samaria.

9 Ngo hetrenyi e cili la ketre perofeta i Iehova, Oded la ëjen. Angeic a tro ju troa ixelë me itre sooc ka traqa e Samaria, nge öni angeic: “Dreng! Hnei Iehova Akötresi ne la itre qaaqaa i epun, hna nue Iudra koi epun, ke nyidrë a elëhni koi angatr. Nge hnei epuni hna humuthi angatr cememine la trenge hni atraqatr, trenge hni ka elë uti hë hnengödrai. 10 Nge enehila, epuni a pi xomi angetre Iudra me Ierusalema troa itre hlue i epun trahmanyi me föe. Ngo hapeu, pë fe kö ngazo i epun qëmeke i Iehova Akötresi epun? 11 Haawe, pane drei ni ju! Ame la itre atr hnei epuni hna oth qaathene itre trejin me epun qa Iudra, nue angatre hmaca pi, ke mele hë la trengehni Iehova koi epun.”

12 Ame hnene la itre xa tan thei angetre Eferaima, ene Azaria nekö i Iohanana, me Berekia nekö i Mesilemoth, me Iezikia nekö i Saluma, me Amasa nekö i Hadelai, hna cil kowe la itre ka bëek qa hna isi. 13 Nge öni angatr: “The lö fë kö la itre hna oth, wanga tro sa ngazo qëmeke i Iehova. Ame la hnei epuni hna pi kuca, ke kola nyixane la itre ngazo së, nge tro ha tru la zö së. Ke tru hë la itre ngazo së, nge tru hë la elëhni koi Isaraela.” 14 Ame hnene la itre sooc ka cile fë jia ne isi, hna nue la itre hna oth me itre mo kowe la itre he ne nöj, me kowe la icasikeu asë. 15 Nge hnene la itre trahmany hna hë ëjen hna xome la itre hna oth, me xome qa ngöne la trengamo la itre iheetr, me hamën kowe la itre ka tro xöe. Angatr a heetrëne jë la itre hna oth, me hamë ibutr, me nyine xeni me ij, me oel kowe la ngönetrei angatr. Ketre, angatr a atë jë hune boliko la itre ka kucakuca, me trosai angatr kowe la itre trejin me angatr e Ieriko, lo zi ne la itre pama. Thupene lai, hnei angatr hna bëeke hmaca a tro Samaria.

16 Nge ngöne la ijine cili, hnei Ahaza joxu hna sipo ixatua kowe la itre joxu ne Asuria. 17 Matre hnene hmaca la angetre Edoma hna isi me Iudra, me lö hnine la nöj, me othe la itre xa atr. 18 Nge hnene fe la angetre Filisiti hna tro troa isi ngöne la itre traon ne la Sefela, me ngöne la Negeb e Iudra. Angatr a thepe Bethe-semes, me Aialona, me Gederoth, me Soko me itre neköi traon ezin, me Timena me itre neköi traon ezin, me Gimezo me itre neköi traon ezin. Nge angatr a lapan asë jë la itre götrane cili. 19 Nge hnei Iehova hna thaipië Iudra pi Ahaza joxu ne Isaraela, ke hnei nyidrëti hna nue Iudra troa huliwa menu, celë hi matre tha mele nyipici hë angatre koi Iehova.

20 Nge ngöne la ketre ijin, hnei Tigelathe-pilesera joxu ne Asuria, hna traqa troa lepi Ahaza. Matre akötre ka tru la hna kapa hnei Ahaza, ngo pëkö ixatua. 21 Eje hi, hnei Ahaza lo hna eöth asë la itre mo hnine la uma ne hmi Iehova, me hnine la hnalapa i joxu, me hnine la hnalapa ne la itre he ne nöj, troa nyi ahnahna kowe la joxu ne Asuria. Ngo ka gufa asë la hnei angeic hna kuca. 22 Nge ngöne la ijine traqa la jole cili, kolo jë pe a elë la aqane mele hnihni i Ahaza joxu koi Iehova. 23 Nyidrëti a tro fë huuj kowe la itre haze ne Damaseko ka ngaa nyidrë. Ke öni nyidrë: “Itre haze ne la itre joxu ne Suria a xatua angatr, matre tro fe ni a huuj kowe itre haze cili, nge tro itre ej a xatua ni.” Ngo ame pe, itre haze cili la kepin matre kei pi nyidrë me Isaraela asë. 24 Ketre, hnei Ahaza hna acasine la itre ewekë ne la uma ne hmi ne la nyipi Akötresie, me thë anyilanyilane la itre ewekë ne la uma ne hmi ne la nyipi Akötresie. Thupene lai, nyidrëti a thinge ju la itre qëhnelö ne la uma ne hmi Iehova, me acili ita ne huuj ngöne la nöjei götrane Ierusalema. 25 Nge ngöne la nöjei traon e Iudra, hnei nyidrëti hna acil la itre hnë hmi gaa hmitrötr, matre huhajine la itre huuj kowe la itre xa haze. Qa ngöne lai, hnei nyidrëti hna amejëne la trenge hni Iehova, Akötresi ne la itre qaaqaa i nyidrë.

26 Nge ame la mele i Ahaza me nöjei huliwa i nyidrë, hna fejan asë qane la qan uti hë la pun, hnine la Itusi ne la mele ne la itre joxu ne Iudra me Isaraela. 27 Ame hnei Ahaza hna meköl me itre qaaqaa i nyidrë ngöne la mec, nge hna kelemi nyidrë ngöne la traon ne Ierusalema. Eje hi, tha hna kelemi nyidrëti kö hnine la hua ne la itre joxu ne Isaraela. Nge hna acili joxu Hezekia nekö i nyidrë, troa nyihna i nyidrë.