Hnaaluene Tus i Aqane Lapa Itre Joxu

35 Hnei Iosea hna feetëne la Paseka koi Iehova e Ierusalema. Hna huujëne la itre öni ne Paseka ngöne la hna 14 ne drai ne la pane treu. 2 Hnei nyidrëti hna acile la itre atre huuj ngöne la isa hnëqa i angatr, me thuecatre i angatr troa eatrëne la huliwa i angatr hnine la uma ne hmi Iehova. 3 Thupene lai, öni nyidrë koi angetre Levi, lo itre ka hamë ini e Isaraela, ene lo itre hna ahmitrötrën thatraqai Iehova, ka hape: “Amë ju la pua ka hmitrötr hnine la uma hna xup hnei Solomona joxu ne Isaraela, lo nekö i Dravita. Tha tro hmaca kö epuni a ajön ej hune la itre iape i epun. Nge enehila, huliwa jë koi Iehova Akötresi epun, me koi Isaraela nöje i nyidrë. 4 Nge hnëkë jë thenge la isa gurup ne fami i epun, me thenge la itre lapa i epun, tune lo hna cinyihan hnei Dravita joxu ne Isaraela, me Solomona nekö i nyidrë. 5 Tro jë kowe la götrane gaa hmitrötr, nge cile ju thenge la isa gurup i epun, matre tro epuni a huliwa kowe la nöj, lo itre trejin me epun, me kuca la huliwa hna athip koi angetre Levi ngöne la isa lapa i angatr. 6 Huujëne jë la itre öni thatraqane la Paseka, nge ahmitrötrë epuni jë. Hnëkë ewekë jë kowe la itre trejin me epun, matre eatre jë la trengewekë i Iehova hna tro fë jëne Mose.”

7 Ame hnei Iosea hna xome qa ngöne la itre si nyidrë la itre öni, itre neköi mamoe me itre neköi nani, matre nyi huuj kowe la Paseka thatraqane la nöj, me thatraqane la nöjei atr ka traqa. Matre hna e la 30 000 lao neköi mamoe me neköi nani, me 3000 lao kau. Itre ewekë lai hnei joxu hna xome qa ngöne la itre ewekë i nyidrë. 8 Nge hnene fe la itre he ne nöj hna hamë ahnahna nyine huuj thatraqane la nöj, me itre atre huuj me angetre Levi. Hnei Hilekia, me Zakaria, me Iehiela, itre ka amamai gojeny ngöne la uma ne hmi ne la nyipi Akötresie, hna hamën kowe la itre atre huuj la 2 600 lao neköi mamoe me neköi nani kowe la Paseka, mee 300 lao kau. 9 Nge hnei Konania, me lue trejin me angeic, Semaia, me Nathaneela, me Hasabia, me Iehiela, me Iozabada, lo itre tane i angetre Levi, hna hamën kowe la angetre Levi la 5 000 lao neköi mamoe me neköi nani thatraqane la Paseka, me 500 lao kau.

10 Matre ame hë la kola ase hnëkën asë, hnene la itre atre huuj hna cil ngöne la isa göhnë i angatr. Nge angetre Levi a cil thenge la isa lapa i angatr, tune lo hna amekötin hnene la joxu. 11 Hnei angatr hna humuthe la itre öni ne la Paseka, nge itre atre huuj a xome la madra hna hamën hnei angetre Levi, me thathane la ita ne huuj. Nge ame pena angetre Levi, angatr a ule kupeine öni. 12 Thupene lai, hnei angatr hna hnëkën la itre huuj ne dreuth asë, me thawa kowe la itre atrene la nöj hna icasikeun, thenge la isa lapa i angatr, matre mama sai angatr koi Iehova, tune lo hna cinyihan hnine la tus i Mose. Nge angatr a kuca tune ju fe kowe la itre kau. 13 Thupene lai, angatr a atrone* jë la itre öni ne la Paseka, thenge lo hna majemine kuca. Nge angatr a ölene jë la itre ahnahna ka hmitrötr hnine la itre öl, me itre iöle ka tru, me itre falaipen. Nge angatr a canga tro fë jë kowe la itre atrene la nöj. 14 Ame hnei angatr hna hnëkëne la Paseka koi angatr, me kowe la itre atre huuj. Ke ame lo itre atre huuj, itre matra i Arona, angatr a huujëne la itre huuj ne dreuth asë, me itre sine giris uti hë e jidr. Celë hi aqane hnëkën angetre Levi la Paseka koi angatr, me kowe la itre atre huuj, itre matra i Arona.

15 Nge ame la itre ka nyima, lo itre matra* i Asafa, angatr a isa cilë hnëqan, tune lo hna amekötin hnei Dravita, me Asafa, me Heman, me Ieduthun, lo atre qeje pu ne la joxu. Nge ame la itre ka thupë qëhnelö, angatr fe a cilëne la isa qa i angatr. Tha nyipiewekë kö tro angatr a tro qa ngöne la hnë huliwa i angatr, ke angetre Levi itre trejin me angatr, a hnëkën asë koi angatr. 16 Haawe, ngöne la drai cili, hna hnëkën la nöjei ewekë hna ahnith hnei Iehova matre feetëne la Paseka, me tro fë huuj hune ita ne huuje i Iehova, thenge lo hna amekötin hnei Iosea.

17 Nge ame la angetre Isaraela ka traqa la ijine cili, hnei angatr hna feetëne la Paseka, me Itre Falawa Ka Pë Levenen koi 7 lao drai. 18 Kolo petre hi a hane feetë Paseka tune lai e Isaraela, thupene lo ijine i Samuela perofeta. Nge pëkö xa joxu ne Isaraela ka hane feetëne la Paseka tune la aqane kuca i Iosea, me itre atre huuj, me angetre Levi, me nöjei atre Iudra me Isaraela ka traqa troa sin, me itre atrene Ierusalema. 19 Nge hna feetëne la Paseka cili la kola 18 lao macatre ne mus i Iosea.

20 Thupene lai, ame hë lo Iosea a ase ahnyipixene hmaca la uma ne hmi, hnei Neko joxu ne Aigupito hna elë troa isi e Kakemis, hmekune la Euferate. Matre hnei Iosea hna tro koi angeic troa isi. 21 Nge hnei Neko hna iupi fë la maca celë koi Iosea me hape: “Hnauëne la eö a cile koi ni joxu ne Iudra? Tha eni kö a traqa troa isi me eö, ngo eni kö a isi memine la ketre nöj. Nge Akötresie a upi ni troa nyimenyim, matre the cile kö kowe la Akötresie ka ce me eni, wanga meci pi ö hnei nyidrë.” 22 Ngazo pe, xele kö Iosea ma dreng, matre hnei nyidrëti hna nyiha troa isi me Neko. Eje hi, xele kö nyidrëti ma drenge la kola hmekë nyidrë hnei Neko, ngacama maca i Akötresieti lai. Celë hi matre hnei Iosea hna tro troa isi ngöne la gaa papa e Megido.

23 Ame hnene la itre ka huji pehna hna pehna Iosea, nge öni nyidrëti jë hi kowe la itre atre i nyidrë: “Xomi ni pi qa la, ke eatre hnyawa ha ni.” 24 Nge hnene la itre hlue i nyidrë hna autinyi nyidrë qa ngöne la ikatr, me ati nyidrë hune la hnaaluene ikatr i nyidrë a tro Ierusalema. Celë hi aqane mec i Iosea, nge hna kelemi nyidrë ngöne la hua ne la itre qaaqaa i nyidrë. Hnene la nöjei atrene Iudra, me Ierusalema hna treije pi nyidrë. 25 Ame hnei Ieremia hna nyimane la nyima nyine treije pi Iosea. Nge uti hë enehila, kolo pala hi a qeje Iosea ngöne la itre nyima ne la nöjei trahmanyi me föe ka sili nyima ne treij.* Matre hna mekune troa nyimane la itre nyima cili e Isaraela, nge hna fejan itre ej hnine la itusi ne itreijepi.

26 Nge ame la mele i Iosea, me aqane mama la ihnimi nyipici i nyidrë, me aqane trongëne nyidrë la hna qaja hnene la Wathebo i Iehova, 27 me nöjei huliwa i nyidrë, hna fejan asë qane la qan uti hë la pun, hnine la Itus ne la mele ne la itre joxu ne Isaraela me Iudra.