Pane Tus i Aqane Lapa Itre Joxu

26 Hane hi la itre lapa ka thupë qëhnelö: Thene la angetre Kora, Meselemia nekö i Kore, ketre matra i Asafa. 2 Hnei Meselemia hna hnaho trahmany: Zakaria la ka tru, me Iediaela la hnaaluen, me Zebadia la hnaakönin, me Iatheniela la hna 4, 3 me Elama la hna 5, me Iohanana la hna 6, me Elioenai la hna 7. 4 Hnei Obed-edoma hna hnaho trahmany: Semaia la ka tru, me Iehozabada la hnaaluen, me Ioa la hnaakönin, me Sakari la hna 4, me Nathaniela la hna 5, 5 me Amiela la hna 6, me Isakara la hna 7, me Peulethai la hna 8, ke hnei Akötresie hna amanathithi Obed-edoma.

6 Nge hnene la nekö i nyidrë Semaia, hna hnaho trahmany, itre tixe ne lapa, ke itre atre ka catr, nge ka atrein. 7 Itre nekö i Semaia: Otheni, me Refaela, me Obeda, me Elezabad, me itre trejine me angeic, Elihu me Semakia, lue atre ka atrein. 8 Itre matra i Obed-edoma asë hi angatr. Angatr me itre nekö i angatr trahmany, me itre trejin me angatr, itre atre lai ka atrein, nge ka ijije troa huliwa: 62 lao matra i Obed-edoma. 9 Nge hetre itre nekö i Meselemia me itre trejin me angeic: 18 lao atre ka atrein. 10 Ame Hosa matra i Merari, hnei angeic hna hnaho trahmany, nge Simeri la tixen. Nge ngacama, tha angeice kö la hna pane hnahon, ngo hna acili angeic hnei keme i angeic troa tixen. 11 Hilekia la hnaaluen, me Tebalia la hnaakönin, me Zakaria la hna 4. Matre ala 13 la itre nekö i Hosa trahmany, me itre trejin me angeic.

12 Thene la itre lapa ka thupë qëhnelö, hetre hnëqa ne la itre tixen, tune lo itre trejin me angatr ka huliwa hnine la uma i Iehova. 13 Hna uthi trikitr* troa thewe qëhnelö kowe la itre lapa, lapa ka co me ka tru. 14 Hna pane eatre la hna uthi trikitr* koi Selemia, troa thupëne la qëhnelö e koië. Nge ame koi Zakaria nekö i angeic, atresi ka inamacan, hna uthi trikitr, nge hna köjane la qëhnelö e kolopi. 15 Nge e kolojë hna uthi trikitrë Obed-edoma, nge hna ahnithe la itre hnë ami ewekë koi itre nekö i angeic. 16 Nge hna eatr koi Supima me Hosa la hna uthi trikitr* göne la qëhnelö e kuë, ezine la qëhnelö ne Saleketh, memine la gojeny atraqatr ka elë. Hna acile la ketre gurup ne thup ezine la ketre. 17 Haawe, kola e la 6 lao atre Levi e koië, me 4 e kolopi e nöjei drai, me 4 e kolojë e nöjei drai, memine la ala lu ngöne la hnë ami ewekë, nyidroti a cil ezine la lue xan. 18 Nge ame kowe la poretiko* e kuë, ala 4 la ka thupën ezine la gojenyi atraqatr, nge ala lu ngöne la poretiko. 19 Angatre hi la itre lapa ka thupë qëhnelö, lo itre matra i Kora me Merari.

20 Nge ame thene la angetre Levi, Ahia la atrekë hnëqane la itre hnahagë trengamo ne la uma ne la nyipi Akötresie, me itre hnahagë ewekë göi hmi.* 21 Nge hane hi la itre matra i Laadan: itre nekö i Geresoma ka xulu qaathei Laadan, itre tixe ne lapa ka fetra qaathei Laadan atre Geresoma, ene Iehiela, 22 me lue nekö i Iehiela: Zetham me Ioela trejine me angeic, lue atrekë hnëqane la itre hnahagë trengamo ne la uma i Iehova. 23 Nge ame thene la angetre Amerama, me Izara, me Heberona, me Uziela, 24 Sebuela nekö i Geresoma, lo nekö i Mose, la ketre tixen ka thupëne la itre hnë ami ewekë. 25 Nge ame lo itre trejin me angeic, lo itre matra i Eliezera, ke Rehabia, me Isaia, me Iorama, me Zikeri, me Selomith. 26 Ame Selomith me itre trejin me angeic, angatr a thupëne la itre hnahagë ewekë göi hmi. Hetre hnahag hna amë pe thatraqane la hmi hnei Dravita, me itre tixe ne lapa, me itre tane la ala 1000 me ala 100, me itre tane soc. 27 Hnei angatre fe hna amë acone la itre xa trengamo hna thapa ngöne la isi, matre nyihnyawane la uma i Iehova. 28 Nge hetrenyi fe la nöjei ewekë hnei Samuela lo atre qeje pu,* me Saulo nekö i Kiso, me Abinera nekö i Neri, me Ioaba nekö i Zeruia hna amë acon göi hmi. Ame la nöjei ewekë hnei ketre hna amë acon göi hmi, hna hamëne koi Selomith me itre trejin me angeic.

29 Nge thene la angetre Izara, hna acili Kenania me itre nekö i angeic troa kuca la itre xa jol e tröne la uma i Akötresie, tune la troa itre tan, me itre atre iameköti e Isaraela.

30 Nge thene la angetre Heberona, hna upi Hasabia me itre trejine me angeic, ala 1700 lao trahmanyi ka atrein, troa itre tan e Isaraela, ngöne la götrane kuë ne la Ioridrano. Qa i angatr troa thupëne la itre huliwa göi Iehova, me göi joxu. 31 Thei angetre Heberona, Ieria la tixe i angatr, thenge la itre itusi ne la itre xötr atr. Ngöne la kola 40 lao macatre ne mus i Dravita, hna ithel me öhne thei angatr e Iazera e Gileada, la itre trahmanyi ka catr nge ka atrein. 32 Ala 2700 la itre trejin me angeic, itre trahmanyi ka atrein, itre tixe ne lapa. Matre hnei Dravita hna acili angatr hune la angetre Reubena, me Gada, memine la sine la tribu i Manase, troa thupëne la nöjei huliwa ne la nyipi Akötresie, me itre huliwa i joxu.