Iobu
41 “Atreine kö eö ea la Leviathana* hnei ge
Me othe la thineme i nyën hnene la ketre eno?
2 Atreine kö eö troa sile la eno ngöne la hnafiji nyën
Maine kuje la që i nyën hnene la ketre aletr?*
3 Nge tro kö nyën a anyimua xëwe koi ö
Me ithanata amenyikene koi ö?
4 Tro kö nyën a isisinyikeu me eö
Matre tro eö a xomi nyën nyine hlu uti hë epin?
5 Tro kö eö a elo me nyën tune la ketre waco
Me hnöthi nyën matre ce elo memine la itre nekö i ö jajiny?
6 Tro kö la itre ka nyi ie a salemën ej?
Tro kö la itre ka salem a thawa la Leviathana?
7 Atreine kö eö thine la ikupeine i nyën
Me jaqa la he i nyën hnei xoza?
8 Pane atë jë la ime i ö hui nyën;
Nge tha tro kö eö a thëthëhmine la isi cili, me isi hmaca me nyën!
9 Nanyi pala ha e tro eö a mekune troa xolouthi nyën.
Ke ame hi la tro eö a goeë nyën, tro fe hë eö lai a xou.*
10 Pëkö ka atreine enijë nyën.
Matre drei la ka atreine cile koi ni?
11 Drei la ka pane hamë ni matre tro ni a të la gufang?
Ame la nöjei ewekë asë e celë fen, ke itre ewekëng asë hi.
12 Tha tro kö ni a lapa thaup göne la itre hnepe ngönetrei nyën,
Memine la trengecatre i nyën, me emingömingöne la ngönetrei nyën.
13 Nge drei la ka unatrije la iheetre i nyën?
Drei la ka troa lö hnine la që i nyën, la nyën a fe angangan?
14 Drei la ka atreine fe la qëhnelö ne la që i nyën?
Hna xouene la itre nyö i nyën.
15 Ame ngöne la ju i nyën
Kola lapa xötrë la itre enienin* hna iacatrenekeun.
16 Nge itre ej a ifedrekeu
Matre pëkö jë i eny.
17 Itre ej a ilöth me ifedrekeu;
Nge thatreine kö troa feje la cas.
18 Ame la nyën a hatrinyö, ke kola melemel,
Nge ceitune la luemeke i nyën memine la kaqa ne lai.
19 Kola tro la samek qa ngöne la që i nyën;
Nge itre ej a melemel.
20 Kola xulu la eë qa ngöne la hnafiji i nyën,
Tune la hna eë hna ipicon hnei rozo.
21 Kola mel la itre wanalep hnene la hnamano i nyën,
Nge kola xulu la ukahlokin qa ngöne la që i nyën.
22 Eje ngöne la nyinawa i nyën la trengecatr,
Nge kola ikötreny qëmeke i nyën.
23 Kola catrehnine la kupeine i nyën;
Tune la fao hna thatreine fejetrij.
24 Ka catre la wenethëhmi nyën tune la etë,
Tune la etë nyine amudromudron.
25 Ame la nyën a mejë, kolo fe a xou la itre atre ka catr;
Kola nyinyape hmohmo hnei angatr ke nyën a jipajipa.
26 Thatreine kö la taua, me jo;
Me xoza, me ane pehna troa humuthi nyën.
27 Ke ame koi nyën, ame la fao ke kösë jez,
Nge ame la kopa, ke kösë sinöe ka hnyiqetr.
28 Tha nyëne kö a kötrene la ane pehna;
Nge ame la itre etë hna thatrehlen, ke kolo pena a nyi jez.
29 Nge ame koi nyën, ame la hama ke kösë jez,
Nge nyën a hnyima fë la mejene jo.
30 Nge ame la hni nyën, ke tune la itre mutine trengene tim ka idrei;
Nge nyën a wewë ngöne la trëtr tune la nyine lepelepe qitr.*
31 Nyën a aboelene la itre gaa jui kösë iöl;
Me lone la hnagejë tune la öle ne senitr.
32 Nge ngöne la itre jë i nyën, kola mel hutrö i nyën.
Matre kösë hetre penehe ka qia ngöne la gaa jui.
33 Pëkö öni ka tui nyën e celë fen,
Hna xupi nyën troa tha xou.
34 Nyën a goeën amenyine la nöjei öni ka pi tru.
Nge nyëne la joxu ne la nöjei öni wael ka catr.”