Iobu
40 Nge Iehova pala hi a sa koi Iobu me hape:
2 “Ame la atre ixöjetrij, tro kö angeic a isi memine la Ka Tru Trenge Men?
Epi troa sa, hnene la atre ka pi ameköti Akötresie.”
3 Nge hnei Iobu hna sa koi Iehova ka hape:
4 “Nemene ni?
Tro ni a sa tune kaa koi nyipë?
Tro ni a atë la iwanakoimeng hune la qëng.
5 Aca ithanata hi ni, ngo tha tro hmaca kö ni a sa;
Nge alu, ngo tha tro kö ni a nyixan.”
6 Ame hnei Iehova hna sa koi Iobu qa ngöne la wene me hape:
7 “Pane hnëkë jë, nge hni ne trahmanyi jë;
Tro ni a hnyinge koi ö, nge tro hë eö a qejepengöne koi ni.
8 Hapeu, tro kö eö a lueluëne la emeköting?
Tro kö eö a jelengazo ni matre nyipici jë eö?
9 Ka catre kö la ime i ö tune la nyipi Akötresie,
Nge atreine kö la nine i ö troa keciqa catr tune la nine i nyidrë?
10 Eni a sipo eö, pane thaipi ö jë hnene la iatrunyi me lolo;
Nge heetrë eö jë hnene la lolo me esisitrian.
11 Nue asë pi la trenge elëhni ö;
Goeëne ju la itre atr ka pi tru nge aipië angatre ju.
12 Goeëne asë jë la itre ka pi tru nge thaipiëne ju,
Me wajafica la itre atr ka ngazo ngöne la göhne i angatr.
13 Juetrë angatr asë ju ngöne la xaxau;
Nge ceinë angatr* asë ju ngöne la gaa sihngödr,
14 Nge tro fe hë ni a jelenyipicine* laka
Atreine hi la ime maca i ö troa amele eö.
15 Hane hi la Behemoth,* lo hnenge hna xup tune lo hnenge hna xupi ö.
Nyën a xeni haö tune la kau.
16 Ngo goeëne la trengecatrene la itrepë i nyën
Memine la trengecatrene la itre non ne la hni nyën!
17 Nyën a amekötine la pune i nyën tune la sinöe arasi;
Nge ame la itre none ne la lue inaeane i nyën, itre ej a ewaewa.
18 Nge kösë kopa la itre june i nyën;
Nge ame la itre igötranene la ngöne i nyën, ke kösë itre sine fao hna lepelep.
19 Nyën la pane öni qa ngöne la itre ewekë hnei Akötresieti hna xup;
Nge tro hmekuje hi a easenyi nyën memine la taua hnene la Atre Xupi nyën.
20 Ke kola cia la itre a i nyën hune la itre wetr,
Nge e cili hi la hnë elo ne la itre öni ne hnitr.
21 Nyën a meköl fene la itre engen ka cia ngöne tim,
Me zae fen la itre rozo.
22 Itre engen ne tim a nyi titaxapo i nyën,
Nge itre sinöe ka tru ne la hnathup* a cile xötreithi nyën.
23 Maine kola kaca la hneopegejë, tha nyëne kö a xou.
Nge maine tro la hneopegejë Ioridrano a kaca hui nyën, goi tha enije fe nyën.
24 Drei la ka atreine othi nyën, nge ka hlë pe nyën,
Maine kuje* hnei aletr la hnafiji nyën?