Atre Cainöj
3 Hetre ijin thatraqane la nöjei ewekë asë,
Me ijin thatraqane la nöjei huliwa fene la hnengödrai:
2 Hetre ijine hnaho me ijine mec;
Hetre ijine traan me ijine fejetrije la hna traan;
3 Hetre ijine ihumuth me ijin ameun;
Hetre ijine thëtrij me ijine xup;
4 Hetre ijine treij me ijine hnyima;
Hetre ijine hokötr me ijine fiafia;*
5 Hetre ijine trije me ijine xawan la itre etë;
Hetre ijine ihaluth me ijine tha tro kö a ihaluth;
6 Hetre ijine ithel me ijine mekun la ka patre hë;
Hetre ijine amë acon me ijine trij;
7 Hetre ijine tha zezen me ijine can;
Hetre ijine lapa thaup me ijine ithanata;
8 Hetre ijine ihnim me ijine imethinë;
Hetre ijine isi me ijine tingeting.
9 Nemene la hna kapa hnene la atr qa ngöne la hnei angeic hna catre huliwa? 10 Öhne hë ni la huliwa hnei Akötresieti hna hamën kowe la itre nekö i atr, nge ka xome la traeme i angatr. 11 Hnei nyidrëti hna amingömingöne* la nöjei ewekë ngöne la nyipi ijin. Nge goi amë fe nyidrë e kuhu hni ne la itre atr la mel ka pë pun; ngo ame pe, tha tro jë kö angatr a atre la qaan, memine la pune la huliwa ne la nyipi Akötresie.
12 Nge trotrohnine hë ni laka, pëkö xaa ewekë ka loi koi angatr hune la troa madrin me kuca la loi ngöne la mele i angatr, 13 me xeni me ij, me öhnyi madrin qa ngöne la hnei angatr hna catre huliwa. Ke celë hi ahnahna qaathei Akötresie.
14 Trotrohnine hë ni laka, troa cile hut epine palua la nöjei ewekë hnei Akötresie hna kuca. Nge pëkö nyine troa nyixan e koho hun, maine xometrije pena. Ke hnene la nyipi Akötresie hna kuca tune la itre ewekë cili, matre tro la itre atr a xoue nyidrë.
15 Ame la ewekë ka traqa, ke ka traqa ha, nge ame la ewekë ka troa traqa, ke ka traqa ha; ngo kola thel hnene la nyipi Akötresie la ewekë hna nyinyape thel* hnene la itre atr.
16 Hnenge fe hna öhne la, fene la jö: Hna nyihnane la thiina ka meköt hnene la iangazo; nge hna nyihnane la meköt hnene la iangazo. 17 Matre öninge jë hi e kuhu hning: “Tro kö la nyipi Akötresie a amekötine la atr ka meköt me ka ngazo, ke hetre ijin thatraqane la nöjei huliwa me nöjei aqane ujë.”
18 Nge hnenge fe hna mekun e kuhu hning ka hape, kola tupathe la itre nekö i atr hnene la nyipi Akötresie matre amamane laka, ceitui angatre hi me itre öni, 19 ke hetre pun kowe la itre atr me itre öni; ceitune hi la pun koi angatr asë. Ame la aqane meci la ketre, ke ceitune hi me ketre; nge casi hi la trengecatr hna hamën koi angatr hnei Akötresie. Haawe, tha sisitria kö la atr hune la itre öni, ke ka gufa asë hi. 20 Casi hi la götran hnei angatr hna tro kow. Hna xomi angatr asë qa ngöne la xaxau, nge tro hmaca kö angatr asë a bëek kowe la xaxau. 21 Drei la ka atre ka hape, tro la ecatrene la mel hnei Akötresie hna hamën kowe la itre atr a elë e koho, nge tro la ecatrene la mele ne la itre öni a ut e kuhu hnadro? 22 Nge öhne hë ni laka, pëkö xaa ewekë ka loi kowe la atr, hune la troa öhnyi madrin qa ngöne la huliwa i angeic, ke celë hi thupe* i angeic; ke drei la ka ijij troa amamai angeic la ka troa traqa e patre hë angeic?