Iobu
37 “Nge ame la eni a goeëne la itre ewekë cili, kola manomano la wenethëhming
Me enienij qa ngöne la göhnen ej.
2 Drenge hnyawa ju la mejene la aqane ewekë i nyidrë
Memine la hedreng ka tro pi qa ngöne la që i nyidrë.
3 Nyidrëti a upe ej ngöne la nöjei götrane la hnengödrai
Me upe la samek uti hë la itre cane la fene hnengödrai.
4 Ame hna ulili pi e thupen;
Nge hna mexem la aqane ewekë i Akötresie,
Tha nyidrëti kö a cipane la hedreng ngöne la kola drenge la nine i nyidrë.
5 Nyine haine la kola ulil la nine i Akötresie;
Ke nyidrëti a kuca la itre ewekë atraqatr hne së hna thatreine trotrohnin.
6 Nyidrëti a qaja kowe la kiona ka hape: ‘Mala pi hune la ihnadro,’
Me kowe la mani: ‘Trotro pi eö.’
7 Akötresieti a acilën* asë la itre huliwa ne la itre atr
Matre tro angatr asë a atrepengöne la nöjei huliwa i nyidrë.
8 Itre öni ne hnitr a lö kowe la itre hnaope i angatr
Me lapa hnine la itre hnë zae i angatr.
9 Kola fetra la udreli qa ngöne la göhnen ej,
Nge kola xulu la hnötr qa ngöne la enyi ne kolopi.
10 Catre hë la tim hnene la hnamano i Akötresie,
Nge kola catre la itre tim atraqatr.
11 Eje hi, nyidrëti a atiqane la itre iaw hnei menyik;
Me isa ijene la sameke i nyidrë ngöne la itre iaw;
12 Itre ej a emo kano agö kowe la götran hnei nyidrëti hna mekun;
Itre ej a eatrëne la hnei nyidrëti hna amekötine kowe la ihnadro.*
13 Nyidrëti a huliwan itre ej troa ahnëjinën,* maine ahmuhmune la ihnadro
Maine pena troa amamane la ihnimi nyipici i nyidrë.
14 Haawe Iobu, pane drenge ju la;
Pane xomi ijine jë troa mekune la itre huliwa i Akötresie nyine hain.
15 Atre fe hi nyipë la aqane iujine* nyidrë la itre iaw
Me axulune la samek qa ngöne la iaw i nyidrë?
16 Atre fe hi nyipë la aqane trongene la itre iaw?
Itre huliwa lai nyine hain hna kuca hnene la Atre ka hetre nyipi inamacan.
17 Hnauëne laka, kola keukawa la itre iheetre i nyipë
La kola haodrai la ihnadro pine la enyi ne kolojë?
18 Hapeu, atreine kö nyipë troa ce seluth* me nyidrë la hnengödrai
Me acatren ej tune la ketre thulu hna kuca hnei fao?
19 Ini huni jë la nyine tro huni a qaja koi nyidrë;
Ke thatreine kö huni troa sa ke eahuni ngöne la jidr.
20 Hapeu, tro kö a thuemacanyi nyidrë laka, eni a pi ithanata?
Nge tro kö a thuemacanyi nyidrë la hna qaja hnene la ketre atr?
21 Thatreine kö troa öhne la lai* hnene la itre atr,
Ngacama ej a hudrum e koho hnengödrai,
Uti hë la kola hnahna la eny me ufetrije la itre iaw.
22 Kola tro la lolo qa kolopi kösë gool;
Nge nyine haine la esisitria i Akötresie.
23 Thatreine kö së troa trotrohnine la etrune la Trenge Men i nyidrë;
Ke ka sisitria la mene i nyidrë,
Nge tha tro kö nyidrëti a ajeane la meköt memine la thiina ka meköt.
24 Celë hi matre, loi e tro la itre atr a xoue nyidrë.
Ke tha nyidrëti kö a wangatrune la itre atr ka mekun laka, ka inamacan* angatr.”