Nehemia
2 Ngöne la treu Nisan,* hmekune la kola 20 lao macatre ne mus i Aretaseta joxu, hna atë la waina qëmeke i nyidrë. Nge tune lo hna majemin, hnenge hna xome la waina, me nei ime i joxu. Eni petre hi a hane cile hleuhleu qëmeke i nyidrë. 2 Matre hnene la joxu hna hnyinge koi ni ka hape: “Hnauëne la eö a hleuhleu nge tha wezipo kö eö? Ma kolo jë a hace la hni ö.” Ame la eni a drenge lai, xou pi kö ni.
3 Öninge jë hi kowe la joxu: “Epi mel aqeanyi la joxu! Ngo tro ni a tha hleuhleu tune kaa, nge kei hë lo traon hna keleme la itre qaaqaang, nge ase hë manithe la itre qëhnelön?” 4 Ame hnene la joxu hna hnyinge koi ni ka hape: “Nemene la aja i ö? Qaja jë koi ni.” Eni a canga thithi ju kowe la Akötresie ne hnengödrai. 5 Nge öning jë hi koi joxu: “Maine ka loi koi joxu, nge hna kepe ni hnei nyipë, upi ni jë a tro Iudra ngöne la traon hna keleme la itre qaaqaang, matre tro ni a acil eje hmaca.” 6 Matre hnene la joxu ka lapa ezine la isola hna hnyinge koi ni ka hape: “Eö a tro koi ije drai? Nge eö hmaca a bëek eu?” Ame hnene la joxu hna nue ni troa tro, nge eni a qaja jë koi nyidrë la etrune la itre drai ne tro ni a pane patr.
7 Ame hnenge hna sipon kowe la joxu ka hape: “Maine ka loi koi joxu, epi troa hamë tusing nyine thuemacane la itre gavena Tröne La Hneopegejë, matre tro angatr a nue ni troa tro Iudra. 8 Nge epi tro fe a hamë tusing göi Asafa atre thupëne la hnaxulu i joxu, matre tro angeic a hamë sinöeng. Tro ni a huliwane la itre sinöe cili, nyine kuci agö thatraqane la itre qëhnelö ne la Batima Ne La Itre Sooc, ezine la Uma ne hmi,* me kowe la ihagene la traon, me kowe la uma hnenge hna troa lapan.” Matre hnene la joxu hna hamë ni la itre tusi cili, ke hna ce* me eni hnene la Akötresing, atre thupë ni.
9 Nge ame hë la eni a traqa kowe la itre gavena Tröne La Hneopegejë, eni a hamë angatre jë la itre tusi ne la joxu. Nge hnene la joxu hna upe la itre tane sooc me itre ka ti hos troa ce tro me eni. 10 Nge ame hë la kola drenge lai hnei Sanebalata qa Horono, me Tobia lo tane* qa Amona, tha madrine kö nyidro tro la ketre atr a traqa troa xatua angetre Isaraela.
11 Ame hnenge hna traqa e Ierusalema. Nge thupene la köni drai, 12 hnenge hna mejë e hnenyipajidr me itre xan, nge tha qaja pi kö ni la huliwa hna upi* ni troa kuca hnene la Akötresing e Ierusalema. Nge pëkö xa öni hnenge hna traqa fë, ngo kolo hmekuje hi lo hnenge hna tith. 13 Ame hnenge hna tro e jidr qa ngöne la Qëhnelö Ne La Hnathup, me qëmekene la tim ne la Un Atraqatr, kowe la Qëhnelö Ne La Ita Hnatresij. Nge hnenge hna goëene hnyawane la itre ihag ne Ierusalema ka kei, me itre qëhnelö hna manith. 14 Nge eni a tro ju kowe la Qëhnelö Ne La Qeqe Ne Tim, me kowe la Pisine i joxu. Ngo ilitrë hë la gojeny kowe la öni hnenge hna tith. 15 Matre hnenge hna tro pala hi e jidr, troa goeëne la ihag me elëne la hnathup. Thupene lai, hnenge hna bëeke hmaca kowe la traon qa ngöne la Qëhnelö Ne La Hnathup, me bëeke kowe la hnalapang.
16 Thatre kö la itre atre isenyine ka hape, qang ekaa, nge nemene la joleng, ke pëkö hnenge hna qaja koi angetre Iudra, me itre atre huuj, me itre atre ka tru, me angetre isenyin, me itre ka huliwa. 17 Ame hnenge hna qaja koi angatre ka hape: “Öhne hi epuni la jole ka traqa koi së, kei hë Ierusalema, nge ase hë manithe la itre qëhnelön. Jë fe matre tro sa xupe hmaca la ihag ne Ierusalema, nge matre nyipune pi la hmahma së.” 18 Nge eni a qaja jë koi angatre la aqane xatua ni hnene la Akötresing ka lolo, memine la hna qaja koi ni hnei joxu. Matre öni angatre jë hi: “Cile jë matre tro sa huliwa!” Nge angatr a itö ithuecatre* jë troa eatrëne la huliwa cili.
19 Ngo ame hë la kola drenge lai hnei Sanebalata qa Horono, me Tobia lo tane qa Amona, me Gesem qa Arabia, hnei angatr hna hnyimasai hun, me methinë hun. Öni angatr: “Epuni a u? Epuni a pi icilekeu me joxu?” 20 Ngo sa jë hi ni koi angatre ka hape: “Akötresie ne hnengödrai la ka troa eatrëne la huliwa hun, nge ame koi eahun itre hlue i nyidrë, xecie hnyawa koi huni troa xupe la uma. Ngo ame epun, pëkö ewekë i epuni e celë e Ierusalema, nge pëkö ca hnei epuni hna kuca, matre tha ijiji epuni kö troa hamë mekun e ce.”