Ezera
1 Ngöne la pane macatre ne mus i Koreso joxu ne Peresi, hnei Iehova hna uku* Koreso joxu ne Peresi, troa tro fë trongëne la ketre maca ngöne la baselaia i nyidrëti asë, matre eatre jë la hna qaja hnei Iehova jëne Ieremia. Nge ame la maca cili, hnei nyidrëti fe hna fejan, kola hape:
2 “Hane hi la maca i Koreso joxu ne Peresi: ‘Hnei Iehova Akötresie ne hnengödrai hna hamë ni la nöjei baselaia ne fen. Nge hnei nyidrëti hna upi ni troa xupe la uma i nyidrë e Ierusalema e Iudra. 3 Drei thei epuni la itre atrene la nöje i nyidrë? Epi tro la Akötresi angatr a ce me angatr, nge epi tro angatr a elë a tro Ierusalema e Iudra. Nge tro angatr a xupe hmaca la uma i Iehova Akötresi Isaraela, lo nyipi Akötresie, ene lo* uma i nyidrëti e Ierusalema. 4 Ame la atre mele trenyiwa ngöne la nöjei götran, epi tro la itre ka lapa ezi angeic* a xatua angeic, me hamë sileva me gool, me itre mo me itre öni, me itre huuj hna hamëne xanën* kowe la uma ne la nyipi Akötresie, lo uma ka cil e Ierusalema.’”
5 Ame hnene la itre tixe ne lapa ne Iudra me Beniamina, me itre atre huuj, me angetre Levi—nöjei atr hna ukun hnene la nyipi Akötresie—hna hnëkë troa tro Ierusalema, matre troa xupe hmaca la uma ne hmi Iehova. 6 Nge hnene la itre atre ka lapa ezi angatr hna xatua* angatr, me hamë angatr la itre ewekë sileva me gool, me itre mo, me itre öni, me itre ewekë ka tru thupen. Nge tha nyine qaja kö la itre huuj hna hamën xanën.*
7 Nge hnei Koreso joxu hna hamëne hmaca lo itre ewekë ne la uma ne hmi Iehova, lo hna eöth hnei Nebukaneza e Ierusalema, troa amë hnine la uma ne hmi ne la haze i angeic. 8 Hnei Koreso joxu ne Peresi hna hamëne koi Mitheredath, atre thupë mo. Nge angeic a e jë la etrun me hamën koi Sesebaza,* lo tan ne Iudra.
9 Hane hi la etrune hna e: 30 lao trap gool kösë treng, me 1 000 lao trap sileva kösë treng, me 29 lao trap nyine trem, 10 me 30 lao neköi kape gool, me 410 lao neköi kape sileva, nge 1000 lao ewekë. 11 Haawe, hna e la 5 400 lao ewekë sileva me gool. Matre hnei Sesebaza hna xom asë la itre ewekë cili, lo kola bëek a tro Ierusalema hnene la nöj hna kötre fë e Babulona.