Pane Tus i Aqane Lapa Itre Joxu
17 Ame ju hi la Dravita a nyiqane lapane la uma i nyidrë, öni nyidrëti jë hi koi Nathana perofeta: “Eni a lapa hnine la uma hna kuca hnei aseri, ngo ame la Pua ne isisinyikeu i Iehova, eje pe hi fene la uma maano.” 2 Nge Nathana a sa jë koi Dravita ka hape: “Kuca jë la aja i nyipë, ke ce nyipëti memine la nyipi Akötresie.”
3 Ngo ngöne la jidri cili, öni Akötresie koi Nathana ka hape: 4 “Tro ja qaja koi Dravita hlueng ka hape, ‘Hane hi la hna qaja hnei Iehova: “Tha tro kö eö a xupe la uma nyine tro ni a lapan, 5 ke qaane lo eni a thepe angetre Isaraela qa Aigupito, nge uti hë enehila, tha hnenge kö hna lapa hnine la ketre uma, ngo hnenge pala hi hna feke trootro qa ketre itat* koi ketre, nge qa ketre uma maano koi ketre. 6 Nge ame ngöne lo ijin eni a ce tro me Isaraela, hapeu, hnenge kö hna qaja kowe la ketre atre iameköti e Isaraela, lo hnenge hna acil nyine thupëne la nöjeng ka hape, ‘Hnauëne laka, tha xupe kö eö la ketre uma aseri koi ni?’”’
7 “Haawe, tro ja qaja koi Dravita hlueng ka hape, ‘Hane hi la hna qaja hnei Iehova, joxu ne la itre trongene isi e hnengödrai: “Eni la ka xomi ö qa ngöne la hnei ö hna thupë mamoe, matre acili ö troa joxu i Isaraela nöjeng. 8 Nge tro pala hi ni a ce me eö ngöne la nöjei jë i ö, nge tro ni a apatrene la nöjei ithupëjia me eö, me ahlemune la ëje i ö, tune lo ëjene la itre xa atre ka tru ne la fen. 9 Tro ni a hamë götran kowe la nöjeng Isaraela, nge tro ej a mel e cili, nge pëkö ka troa ajolëne la nöjeng. Tha tro hmaca kö la itre atre ka ngazo a qanangazone* la nöjeng, tune lo hnei angatr hna majemin, 10 qane lo eni a acile la itre atre iameköti hune la nöjeng Isaraela. Tro ni a thaipiëne la itre ithupëjia me eö fene la musi ö. Nge ketre mina fe, eni Iehova a qaja koi ö ka hape, ‘Tro ni a xomi ö nyine trepene la ketre xötre joxu.’*
11 “‘“Nge e traqa ha la ijine tro eö a mec, me tro kowe la itre qaaqaa i ö, tro hë ni a acili joxun la matra* i eö, ene la ketre nekö i eö. Nge tro ni a acatrene la mus i angeic. 12 Angeice hi la ka troa xupe la uma koi ni, nge tro ni a acatrene la musi* angeic uti hë epin. 13 Nge tro ni a keme i angeic, nge tro angeic a neköng. Tha tro kö ni a nuaxöji* angeic, tune lo aqane kuca ni kowe la joxu ka musi pa. 14 Tro ni a acili angeic hune la hnalapang, nge tro ni a ahnithe koi angeic la mus* uti hë epin. Tro ha cil uti hë epin la therone i angeic.”’”
15 Ame hnei Nathana hna tro fë koi Dravita la itre trengewekë cili, me itre hnei angeic hna meköle goeën.
16 Nge hnei Dravita joxu hna mejë, me lapa e kuhu hnadro qëmeke i Iehova, nge öni nyidrë: “Iehova Akötresieti fe, drei ni, nge drei la faming, matre kapa la itre hnei nyipëti hna kuca koi ni uti hë enehila? 17 Nge ka tune lo tha ijije kö, nyipëti fe Akötresie a qaja ka hape, tro la faming a cil uti hë epine palua. Nge Iehova fe, hnei nyipë hna goeë ni kösë ketre atre nyine atrun.* 18 Nge ame göne la manathith hnenge hna kapa, tro hmaca kö ni a qeje nemen, eni Dravita hlue i nyipë, nge atre ni hnyawa hi hnei nyipë? 19 Iehova fe, pine la hlue i nyipë, nge pine laka, aja i nyipëti kö lai, hnei nyipëti hna kuca la itre ewekë nyine haine celë, me amamane la edraië i nyipë. 20 Iehova fe, pëkö xa Akötresie, ngo nyipëti hi. Kola anyipicine lai hnene la nöjei ewekë hne huni hna dreng. 21 Nge hune la ihnadro, drei la nöj ka tune la nöje i nyipë Isaraela? Akötresieti fe, hnei nyipëti hna itöne la nöje ce, troa nöje i nyipë. Hnei nyipëti hna ahlemune la ëje i nyipë, ke hnei nyipë hna kuca la itre huliwa ka tru, nge nyine hain. Hnei nyipëti hna helëne la itre nöj, matre hamë ihnadro kowe la nöje i nyipë, lo hnei nyipëti hna itön qa Aigupito. 22 Hnei nyipë hna kuca matre tro Isaraela a nöje i nyipë uti hë epin. Nge ame nyipë Iehova, nyipëti hë la Akötresi angatr. 23 Nge enehila Iehova fe, epi troa ej epine palua la hnei nyipëti hna sisiny kowe la hlue i nyipë, me fami angeic. Nge epi tro nyipë a eatrëne la hnei nyipëti hna sisiny. 24 Nge epi troa atre* me atrun epine palua la ëje i nyipë, nge epi tro la itre atr a qaja ka hape, ‘Iehova, joxu ne la itre trongene isi e hnengödrai, la Akötresi Isaraela!’ Nge epi tro la xötre joxu i Dravita hlue i nyipë, a cile catr qëmeke i nyipë. 25 Ke nyipëti hi Akötresinge fe, la ka qaja kowe la hlue i nyipë ka hape, tro nyipë a xomi angeic nyine trepene la ketre xötre joxu.* Celë hi matre, ka mejiune ni* troa hamëne la thithi celë koi nyipë. 26 Haawe Iehova fe, nyipëti hi la nyipi Akötresie, nge hnei nyipëti hna sisinyi fë la itre ewekë ka lolo kowe la hlue i nyipë. 27 Epi madrine nyipë troa amanathithine la fami ne la hlue i nyipë. Nge epi tro pala hi ej a mel uti hë epine palua qëmeke i nyipë! Ke hnei nyipë Iehova fe, hna amanathithi angatr matre tro pala hi angatr a kapa la itre loi.”