Angetre Amekötin

7 Ame hnei Ierubaala, ene Gideona hna canga ilë. Hnei angeic memine la itre atre i angeic hna acil la lapa ne soce i angatr ezine la qeqe ne tim e Harod. Nge ame la trongene isi i Midiana, angatr a lapa e kolopi, ezine la sasala e More, ngöne la hnathup. 2 Ame hnei Iehova hna qaja koi Gideona ka hape: “Ala nyimu pala ha la itre soce i ö. Ke eje hi, maine tro ni a nue la angetre Midiana koi angatr, tro hë la angetre Isaraela a selën ka hape: ‘Hne huni hna ngaa angatr hnene la sipu trengecatre* hun.’ 3 Ngo enehila, pane qaja jë koi angatr ka hape: ‘Ame la atr ka xou me hmengöhmengön, ke loi e tro angeic a bëeke hmaca kowe la hnalapa i angeic.’” Matre hnei Gideona hna qaja la itre trengewekë cili göi troa tupathi angatr. Qa ngöne lai, traqa jë kö koi 22 000 lao trahmanyi ka bëek kowe la itre hnalapa i angatr, nge lapa ju pe hi la ala 10 000.

4 Ngo öni Iehova jë hi koi Gideona: “Ala nyimu pala kö epuni lai. Pane tro sai angatre jë ngöne la tim, matre tro ni a tupathi angatr koi ö. Maine tro ni a qaja koi ö ka hape: ‘Tro angeic a ce tro me eö,’ ke tro hë angeic a tro; ngo e tro pena ni a qaja: ‘Tha tro kö angeic a ce tro me eö,’ ke tro pë hë angeic a lapa.” 5 Ame hnei Gideona hna uti fë la trongene isi i angeic kowe la tim.

Nge öni Iehova jë hi koi angeic: “Tro eö a isa amë la itre atr ka timetimëne la tim tune la itre kuli, me itre ka sa iwatingöneca troa ij.” 6 Matre traqa koi 300 lao atr ka kapa la tim kowe la që i angatr me timetimën. Ngo ame pë hë la munën, hnei angatr hna sa iwatingöneca troa ij.

7 Matre öni Iehova jë hi koi Gideona: “Tro hë ni a amele epun jëne la 300 lao trahmanyi ka timetimëne la tim. Eje hi, tro ni a nue koi ö la angetre Midiana. Ngo loi e tro la itre xaa soc a isa bëeke koi hnalapan.” 8 Matre hnene la ala 300 hna xome la itre kemej me itre trutru ne la itre soce cili, me xötrethenge Gideona. Nge hnei Gideona pë hë hna upe la itre xaa soc troa bëeke hmaca koi hnalapa. Nge ame la trongene isi i Midiana, ke ej a lapa e kuhu ngöne la hnathup.

9 Ngöne la jidri cili, hnei Iehova hna upi Gideona ka hape: “Mejë jë, nge tro jë troa lep la lapa i angatr, ke ase hë ni nue angatr koi ö. 10 Ngo maine xou i ö, ke ce uti pi me Fura hlue i ö kowe la lapa i angatr. 11 Nge drenge ju la itre hnei angatr hna qaja, matre troa hetre trengecatre* i ö troa lepi angatr.” Ame hnei Gideona hna ce uti me Fura hlue i angeic, ezine la lapa ne la angetre Midiana.

12 Ngo ame la angetre Midiana, me Amaleka, me angetre Koië, ke ase hë angatr haöth asë la hnathup tune la hnënge sipa. Nge nyimutre catr la itre kamela i angatr, kösë itre wene ngöni ne hnagejë. 13 Matre ame hë la kola traqa hnei Gideona, hetre soc ka porotrikën la pu i angeic kowe la sinee i angeic, me hape: “Hnenge hna puj la ketre falawa bali ka raon ka ujëujë kowe la lapa ne soce i Midiana. Nge hnen ej hna jeng amalane la ketre itat. Eje hi, hnene lai falawa hna qene ipiën la itat, matre kei pi ej kuhu hnadro.” 14 Ame hna sa hnene la sinee i angeic ka hape: “Huliwa ne la taua i Gideona hi lai, lo nekö i Ioasa qa Isaraela. Ase hë Akötresieti nue koi angeic la angetre Midiana, me trongene isi i angatr asë.”

15 Thupene ju hi la Gideona a ase drenge la pu memine la hna qejepengön, hnei angeic hna sa iwatingöneca me thith, me bëeke hmaca kowe la angetre Isaraela, me hape: “Cile jë, ke ase hë Iehova nue la angetre Midiana koi epun!” 16 Ame hnei angeic hna thawa koi köni gurup la ala 300, me isa hamë angatr la itre trutru, me itre trengen ka pë alien me ca uke jina e kuhu hnin. 17 Thupene lai, öni angeice jë hi: “Tro epuni a goeë ni, me nyitipu ni. E easenyi hë ni kowe la lapa i angatr, ke tro hë epuni a kuca tung. 18 Ame hë la eni me itre ka ce tro me eni a ufi trutru, tro fe epuni a hane ufi trutru xötreith la lapa, me suen ka hape: ‘Koi Iehova me Gideona!’”

19 Ame hë la kola troa easenyi koi minui,* lo kola nyiqaane cil hnene la itre ka thup, hnei Gideona memine la 100 lao soc, hna easenyine la trongene isi i Midiana, me ufi trutru, me thë la itre trengen ka tru ngöne la itre wanakoime i angatr. 20 Hnene la itre soc ne la köni gurup hna ufi trutru, me thë la itre trengene ka tru. Hnei angatr hna ea la itre uke jina hnene la wanakoime mi angatr, me ufi trutru hnene la wanakoim maca, me suen ka hape: “Taua i Iehova me Gideona!” 21 Ngöne la ijine cili, hnei angatr hna isa lapa göhnen xötreith la trongene isi i Midiana. Matre hnene la trongene isi i Midiana hna ikötreny, me hokötr. 22 Tha cile kö la ala 300 troa ufi trutru, nge hnei Iehova hna ujën la taua i ketre koi ketre, matre hnene la trongene isi i Midiana hna ikötrenyi uti hë e Bethe-Sita, me Zererath, nge uti fe hë la itre ifego e Abela-Mehola ezin e Tabath.

23 Ame hna hëne la itre trahmanyi ne Isaraela qa ngöne la itre tribu i Nafatali, me Asera, me Manase asë, matre troa wej la angetre Midiana. 24 Nge hnei Gideona hna iupi fë maca kowe la itre atrene la itre wetr e Eferaima asë ka hape: “Uti pi troa lep la angetre Midiana, nge thingi jë i angatre jë matre tha tro kö angatr a traqa kowe la itre tim e Bethe-Bara me kowe la hneopegejë Ioridrano.” Matre hna ce traqa itronyi hnene la itre trahmanyi ne Eferaima troa thinge la jë ne tro kowe la itre tim e Bethe-Bara uti hë la hneopegejë Ioridrano. 25 Nge hnei angatr fe hna ee Oreba me Zeba, lue nekö i joxu ne Midiana. Hnei angatr hna humuthi Oreba hune la git i Oreba, me humuthi Zeba ngöne la hna weje wene vin i Zeba. Ame hnei angatr hna tro fë la he i nyidro koi Gideona hmekun e Ioridrano, nge tha cile kö angatr weje la angetre Midiana.