Pane Tusi Itre Joxu

16 Hane hi la aqane eji Baasa hnei Iehova, jëne Iehu nekö i Hanani: 2 “Hnenge hna amejë eö qa ngöne la xaxau, me acili eö troa joxu ne la nöjeng Isaraela. Ngo hnei eö pala hi hna nyitipu Ieroboama, me ukune la nöjeng Isaraela troa ngazo koi ni, me amejëne la trenge hning pine la itre ngazo i angatr. 3 Celë hi matre, tro ni a burumë Baasa hnyawa, me fami angeic. Nge tro ni a kuca kowe la fami angeic, la hnenge hna kuca kowe la fami Ieroboama, nekö i Nebata. 4 Ame la nöjei atrene la fami Baasa ka mec ngöne la traon, tro itre kuli a öni. Nge ame la itre ka mec ngöne la itre hlapa, tro la itre waco a öni.”

5 Ame la mele i Baasa, me nöjei huliwa i nyidrë, me catre i nyidrë, hna fejan asë hnine la itre itus ne la mele ne la itre joxu ne Isaraela. 6 Baasa a meköle ju me itre qaaqaa i nyidrë ngöne la mec, nge hna kelemi nyidrë e Tireza. Ame hna acili joxu Ela nekö i nyidrë, troa nyihna i nyidrë. 7 Hane hi la kepin matre Iehova a eji Baasa me fami nyidrë, jëne Iehu nekö i Hanani. Hna traqa tun, pine la etrune la itre ngazo hnei Baasa hna kuca koi Iehova. Itre huliwa i Baasa a amejëne la trenge hni i nyidrë, matre ceitui Baasa me fami i Ieroboama. Ketre, hnei Baasa fe hna humuthi Nadaba.

8 Ngöne la kola 26 lao macatre ne mus i Asa joxu ne Iudra, hna acili Ela nekö i Baasa troa joxu ne Isaraela. Hnei nyidrë hna mus koi lue macatre e Tireza. 9 Hnei Zimeri hlue i nyidrë, lo tane la sine la itre ka ti ikatr, hna tra thethi nyidrë. Ngöne la ijine cili, Ela e Tireza, ngöne la hnalapa i Areza, lo atre thupëne la hnalapa i joxu.* Nge ka hnaitö hnyawa Ela. 10 Matre hnei Zimeri hna lö, me humuthi nyidrë. Hna traqa lai, hmekune la kola 27 lao macatre ne mus i Asa joxu ne Iudra. Thupene lai, hna acili joxu Zimeri troa nyihna i Ela. 11 Ame hë la Zimeri a joxu me lapa hune la theron, nyidrëti a humuth asë pi la fami i Baasa, nge pëkö ca trahmanyi* ka mel, pëkö atrene la fami* i Baasa, me itre sinee i Baasa. 12 Celë hi aqane apatrene Zimeri la fami i Baasa, thenge lo aqane qaja i Iehova, jëne Iehu perofeta. 13 Hna traqa tun, pine la nöjei ngazo hnei Baasa me Ela nekö i nyidrë hna kuca, nge pine la nöjei ngazo hna kuca hnei Isaraela fene la musi nyidro, lo angatr a amejëne la trenge hni i Iehova Akötresi Isaraela, hnene la itre idrola i angatr ka pë hnënyöngön. 14 Ame la mele i Ela, me nöjei huliwa i nyidrë, hna fejan asë hnine la itre itusi ne la mele ne la itre joxu ne Isaraela.

15 Ngöne la kola 27 lao macatre ne mus i Asa joxu ne Iudra, hna acili Zimeri troa joxu. Hnei nyidrëti hna mus koi 7 lao drai e Tireza. Nge ngöne la ijine cili, hnene la trongene isi Isaraela hna tro troa isi, me cile xötreithi Gibethon, traone i angetre Filisiti. 16 Ame hnene la itre sooc hna drei mejen laka, hnei Zimeri hna tra thethine la joxu, me humuthi nyidrë. Matre ngöne la drai cili, hnene la itre sooc hnine la lapa i angatr hna ië Omeri, tane la trongene isi,* me acili angeic troa joxu ne Isaraela. 17 Nge hnei Omeri me trongene isi* i nyidrë hna tro e Gibethon, me cile xötreithe Tireza. 18 Matre ame hë la Zimeri a öhne laka, kei hë la traon, nyidrëti a lö ju hnine la hnahag ka draië ne la hnalapa i joxu, me manith ej, nge meci pi hi nyidrë hnine la eë. 19 Hna traqa tun, pine nyidrë kuca la ngazo koi Iehova, me nyitipu Ieroboama, me akeinyi Isaraela kowe la ngazo. 20 Ame la mele i Zimeri me aqane tra thethine la joxu, hna fejan asë hnine la itre itusi ne la mele ne la itre joxu ne Isaraela.

21 E cili hi la kola thawaluëne la nöje Isaraela. Hnene la ketre lapa hna ce xöle me Tibeni nekö i Ginath troa joxu, nge ketre lapa a ce xöle me Omeri. 22 Ngo hune kö la itre ka ce xöle me Omeri, hune la itre ka ce xöle me Tibeni nekö i Ginath. Ame hna meci hnei Tibeni, nge hnei Omeri hna joxu thupei angeic.

23 Ngöne la kola 31 lao macatre ne mus i Asa joxu ne Iudra, hna acili joxu Omeri hui Isaraela. Hnei nyidrëti hna mus koi 12 lao macatre, me mus e Tireza koi 6 lao macatre. 24 Hnei nyidrëti hna itöne la wetre Samaria koi lue talane* sileva, hna itön qaathei Semeri. Thupene lai, nyidrëti a acili traone ju hune la wetr, me ati ëjen Samaria,* ke Semeri la ëjene lo atrekë zin.* 25 Nge ka ngazo la hna kuca hnei Omeri koi Iehova, nge tru catre kö la ngazo i nyidrë hune la itre ka tro pa. 26 Hnei nyidrëti hna nyitipu Ieroboama nekö i Nebata, me kuca la ngazo hna kuca hnei Isaraela fene la musi Ieroboama, lo angatr a amejëne la trenge hni Iehova Akötresi Isaraela, hnene la itre idrola i angatr ka pë hnënyöngön. 27 Ame la mele i Omeri, me nöjei huliwa i nyidrë, me itre huliwa nyine haine i nyidrë, hna fejan asë hnine la itre itusi ne la mele ne la itre joxu ne Isaraela. 28 Nge Omeri a meköle ju me itre qaaqaa i nyidrë ngöne la mec, nge hna kelemi nyidrë e Samaria. Ame hna acili joxu Ahaba nekö i nyidrë, troa nyihna i nyidrë.

29 Hna acili joxu Ahaba nekö i Omeri hui Isaraela, ngöne la kola 38 lao macatre ne mus i Asa joxu ne Iudra. Hnei nyidrëti hna musi e Samaria koi 22 lao macatre.

30 Ngazo catre kö la thiina i Ahaba koi Iehova, hune la itre ka tro pa. 31 Hnei nyidrëti hna ngazo tui Ieroboama nekö i Nebata, me faipoipo me Iezebela nekö i Ethebaala, joxu ne Zidona. Matre hnei Ahaba hna nyihlue i Baala me thili kow. 32 Ketre, hnei nyidrëti hna acili ita ne huuj koi Baala, hnine la uma ne hmi hnei nyidrëti hna xup thatraqai Baala e Samaria. 33 Nge Ahaba a acile ju la ketre sine feni ka hmitrötr. Matre tru catre kö hnei huliwa i nyidrë ka aelëhni Iehova Akötresi Isaraela, hune lo itre joxu ka tro pa.

34 Ngöne la ijine mus i Ahaba, hnei Hiel atre Bethela, hna xupe hmaca e Ieriko. Hnei angeic hna ami trepene la traon, celë hi matre meci pi hi Abirama pane nekö i angeic. Nge ame hë la angeic a acile la lue qëhnelö ne la traon, ketre meci pi hi Seguba, lo nekö i angeic ka co. Qa ngöne lai, hna eatre lo hnei Iehova hna qaja jëne Iosua nekö i Nuna.