Hnaaluene Tus i Aqane Lapa Itre Joxu
23 Ngo ame ngöne la hna 7 ne macatre, hnei Iehoiada hna catr, me isisinyikeu memine la itre tane la ala 100, ene Azaria nekö i Ierohama, me Isamaela nekö i Iohanana, me Azaria nekö i Obeda, me Maseia nekö i Adaia, me Elisafata nekö i Zikeri. 2 Thupene lai, angatr a trongëne jë la nöje Iudra, me acasine la angetre Levi qa ngöne la nöjei traon ne Iudra, me itre tixe ne lapa ne Isaraela. Matre ame hë la angatr a traqa e Ierusalema, 3 hnene la ekalesia asë hna isisinyikeu me joxu hnine la uma ne hmi ne la nyipi Akötresie. Matre öni Iehoiada:
“Goeën! Tro la nekö i joxu a mus thenge la hna sisinyi hnei Iehova göi itre nekö i Dravita. 4 Hane hi la nyine tro epuni a kuca: Ame la itre atre huuj me angetre Levi ka troa huliwa la Sabath, tro la hnepe sin a thupë qëhnelö. 5 Troa xome la ketre hnepe sin troa thupëne la uma i joxu. Nge tro la ketre hnepe sin a cile ngöne la Hnë Lö hna hape, Trepen. Nge ame pë hë la munëne la nöj, tro angatr a cil hnine la götrane gaa pë ihakun ne la uma ne hmi Iehova. 6 The nue ketre kö troa lö hnine la uma i Iehova, ngo tro hi la itre atre huuj, me angetre Levi ka huliwa. Tro hi angatr a lö, ke lapa ka hmitrötr angatr. Nge tro la nöj asë a metrötrëne la hnëqa i angatr koi Iehova. 7 Tro la angetre Levi a cile xötreithe la joxu, me cile fë jia ne isi. Tro epun a humuth la itre ka thele troa lö hnine la uma. Ce tro jë memine la joxu ngöne la nöjei jë* i nyidrë.”
8 Ame hnene la angetre Levi me Iudra, hna kuca asë la hna amekötin hnei Iehoiada atre huuj. Nge hnei angatr hna isa xome la itre atre i angatr, ene la itre ka huliwa la drai Sabath, me itre ka mano la drai cili. Ke pëkö ca lapa hnei Iehoiada atre huuj hna nue troa mano. 9 Matre, hnene la atre huuj hna isa hamëne kowe la itre tane la ala 100, la itre jo, me itre neköi ipetr,* me itre ipetre ka raon i Dravita joxu, lo ka lapa hnine la uma ne hmi ne la nyipi Akötresie. 10 Thupene lai, hnei angeic hna upi angatr kowe la isa hna thup i angatr, nge angatr a isa cile fë jia ne isi. Ame hnei angatr hna isa cile xötrë qaane la götrane maca ne la uma ne hmi, uti hë la götrane mi, nge ezine la ita ne huuj, me ezine la uma ne hmi, xötreithe la joxu. 11 Nge hnei angatr hna tro fë la neköne la joxu, me amë hune la he i nyën la korona, memine la Nyine Anyipicin.* Matre angatr a acili joxu nyidrëti ju, nge Iehoiada me itre nekö i angeic trahmanyi la ka sië* nyidrë. Ame hnei angatr hna suene ka hape: “Epi manathithe la joxu!”
12 Ame hë la Athalia a dreng la kola nyinyape la itre atr me kapa madrine la joxu, eahlo a canga tro ju kowe la ka ala nyimu ngöne la uma ne hmi Iehova. 13 Öhne ju hi eahlo e cili la joxu, kola cil ezine la ipoto ngöne la hnë lö. Nge itre he ne nöj, me itre ka ufi trutru a ce cile me joxu. Nge kola madrin me ufi trutru hnene la itre atrene la nöj. Nge ame la itre ka nyima me cile fë nyine elo miuzik, angatre hi la itre ka wejein la itre nyima ne atrun. Ame hnei Athalia hna tha zezene la iheetre i eahlo, me sue ka hape: “Ka pi joxu! Ka pi joxu!” 14 Matre, hnei Iehoiada atre huuj, hna upe la itre tane la ala 100 troa tro qa lai, itre ka elemekene la trongene isi. Nge öni angeic: “Xome pi la föe celë qa la. Maine hetre ka xötrethenge eahlo, humuthe pi hnei taua!” Eje hi, hnei angeice lo hna qaja ka hape, tha tro kö a humuthi eahlo hnine la uma ne hmi Iehova. 15 Angatr a xolouthi eahlo ju, me tro sai eahlo kowe la hnë lö ne la itre hos ngöne la uma i joxu. E cili, hnei angatr hna humuthi eahlo.
16 Celë hi matre jëne Iehoiada, hetre isisinyikeu hna kuca hnei angeic memine la nöj me joxu, matre tro pala hi angatr a nöje i Iehova. 17 Thupene lai, hnene la itre atre ne la nöj hna tro me thëtrij la uma ne hmi Baala, me apatrene la itre ita ne huuj, me itre idrola i Baala. Angatr a humuthi Mathana jë, lo atre huuje i Baala qëmekene la itre ita ne huuj. 18 Thupene lai, hnei Iehoiada hna upe la itre atre huuj me angetre Levi, troa thupëne la uma ne hmi Iehova. Angatre hi lo itre lapa hna acil hnei Dravita thatraqane la uma ne hmi Iehova, troa huujëne la itre huuj ne dreuth asë koi Iehova, thenge lo hna cinyihan ngöne la wathebo i Mose. Nge kola sue madrin me nyima, tune lo hna amekötin* hnei Dravita. 19 Angeic a acile ju fe la itre ka thupë qëhnelö, ngöne la itre hnë lö ne la uma ne hmi Iehova. Hna kuca lai, matre tha tro kö a lö hnene la atre ka tha ahmitrötrë angeice kö. 20 Angeic a xome ju fe la itre tane la ala 100, me itre atre ka tru, me itre xa tane la nöj, me itre atrene la nöj troa xötrethenge joxu, qane la uma ne hmi Iehova, uti hë la uma i joxu. Angatr a lö jë qa ngöne la hnë lö e koho. Matre ame ju hi la angatr a traqa, angatr a alapane ju la joxu, hune la theron ne la baselaia. 21 Ame hnene la itre atre ne la nöj asë hna madrin, nge tha gomegome hë la nöj, ke ase hë humuthi Athalia.