Levitiko

5 “‘Maine tro la ketre atr a drenge maine öhn la ketre ewekë, ngo tha qaja amamane kö angeic, nge atre hi angeic laka, kola thel* la itre ka öhne la ewekë cili, angeic hi lai a kuca la ngazo, nge tro hë angeic a xeni pun.

2 “‘Maine tro la ketre atr a ketr la ewekë ka pui ngazo, maine ngönetrei ne la öni wael ka pui ngazo, maine ngönetrei ne la öni ka mem ka pui ngazo, maine ngönetrei ne la itre neköi öni ka co ka pui ngazo, tro hë angeic a pui ngazo me hetre tria, ngacama tha hnei angeice kö hna thë. 3 Maine tro la ketre atr a ketr la atr ka pui ngazo, nge thatre kö angeic — ene la nöjei ewekë ka troa apuingazonyi angeic — nge kola atre e thupen, angeice hi la ka tria.

4 “‘Maine tro la ketre atr a sisinyi troa kuca la ketre ewekë nge hna qaja nyimenyimën — göi loi maine ngazo — nge kola atre e thupen laka, hnei angeic hna sisinyi ngo tha hna pane mekune kö, angeice hi la ka tria.*

5 “‘Maine tro angeic a tria me kuca la ketre ewekë cili, loi e tro angeic a qaja amamane la tria i angeic. 6 Nge tro angeic a tro fë la huuj ne ngazo koi Iehova pine la ngazo hnei angeic hna kuca, ene la öni föe hna xom qa ngöne la itre öni ka co (ca neköi mamoe föe maine ca neköi nani föe) nyine huuj ne ngazo. Thupene lai, tro la atre huuj a kuca lo hna majemin, ene la huuj ne ialoinekeun nyine he la ngazo i angeic.

7 “‘Maine tha ijiji angeice kö troa traqa fë la mamoe nyine huuj ne ngazo, loi e tro angeic a tro fë koi Iehova la lue meketrë maine lue neköi piny, matre ca nyine huuj ne ngazo, me ca nyine huuj ne dreuth asë. 8 Tro angeic a tro fë lue ej kowe la atre huuj, nge qa ne la atre huuj troa pane huujëne la huuj thatraqane ngazo, me ela la hen ej ngo tha tro kö a thupa. 9 Nge qa i angeic troa thathane* la ketre götran ne la ita ne huuj hnei wamine madra ne la öni hna huujën, me nenge pë hë la munën fene la ita ne huuj. Celë hi huuj ne ngazo. 10 Nge tro angeic a huujën la hnaaluene waco, tune la hna amekötin kowe la itre huuj ne dreuth asë. Thupene lai, tro la atre huuj a kuca lo hna majemin, ene la huuj ne ialoinekeun nyine he la ngazo i angeic, ame hna troa nue la ngazo i angeic.

11 “‘Maine tha ijiji angeice kö troa traqa fë la lue meketrë, maine lue neköi piny nyine huuj ne ngazo, loi e tro angeic a tro fë la ca omera* ne farin ka lolo nyine huuj ne ngazo. Nge tha tro kö angeic a nyixan hnei oel me libanu,* ke celë hi huuj ne ngazo. 12 Tro pë hë angeic a tro fë kowe la atre huuj, nge tro la atre huuj a jeköthe la ca hnatrapaimë farin, nyine nyihatren la huuj. Nge tro angeic a atë la farin ka lolo hune la itre huuj ne eë koi Iehova, me huhajin ej hune la ita ne huuj. Celë hi huuj ne ngazo. 13 Nge tune lo hna majemine kuca, tro la atre huuj a kuca la huuj ne ialoinekeun nyine he la ngazo i angeic, ene la nöjei ngazo hna qaja ha, ame hna troa nue la ngazo i angeic. Nge ame pë hë la munëne la huuj, ke thatraqane la atre huuj, tune lo hna kuca kowe la itre huuj ne la itre wene feja.’”

14 Ame hnei Iehova hna ithanata hmaca koi Mose. Öni nyidrë: 15 “Maine tha mele nyipici kö la ketre atr koi Iehova, nge tha hnei angeic kö hna thë me tha metrötrëne la itre ewekë ka hmitrötr, loi e tro angeic a tro fë koi Iehova la huuj ne ngazo, ene la mamoe trahmanyi ka pë engazon hna xom qa ngöne la itre öni ka co; ame la thupene la öni, tro ej a ihmeku memine la tulu ne sekel* ngöne la götrane gaa hmitrötr.* 16 Tro angeic a nyithupene la ngazo hnei angeic hna kuca ngöne la götrane gaa hmitrötr, me nyixane hmaca hnene la sine* la thupene la öni. Thupene lai, tro angeic a tro fë kowe la atre huuj, nge tro la atre huuj a kuca lo hna majemin, ene la huuj ne ialoinekeun nyine he la ngazo i angeic. Nge tro la atre huuj a huujëne la mamoe trahmanyi nyine huuj ne ngazo, ame hna troa nue la ngazo i angeic.

17 Maine tro la ketre atr a kuca la ngazo me ena la wathebo i Iehova, angeice hi la atrekë zön, ngacama tha hnei angeice kö hna thë, ngo tro kö angeic a xeni pune la ngazo i angeic. 18 Nge qa i angeice troa tro fë kowe la atre huuj la ketre mamoe trahmanyi qa ngöne la itre öni ka co, thenge la thupene hna athip hnene la atre huuj. Celë hi huuj ne ngazo. Nge tro la atre huuj a kuca lo hna majemin, ene la huuj ne ialoinekeun nyine he la ngazo i angeic, ngacama tha hnei angeic kö hna thë, nge tro ha nue la ngazo i angeic. 19 Celë hi huuj ne ngazo. Nge angeice hnyawa hi la atrekë zön la ngazo hna kuca koi Iehova.