Daniela

4 “Qaathei Nebukaneza joxu kowe la nöjei atr, me nöjei nöj, me nöjei qene hlapa e cailo fen: Epi troa mana la tingetinge i epun! 2 Ame koi ni, ka loi la tro epuni a atre la itre hatren me itre iamamanyikeu, hna kuca koi ni hnene la Akötresie ka draië catr. 3 Ka draië catr la itre hatren qaathei nyidrë, nge the qaja pala ha la ecatren ne la itre iamamanyikeu i nyidrë! Ka epine palua la baselaia i nyidrë, nge uti hë la nöjei xötr la mus i nyidrë.

4 “Hnenge lo Nebukaneza, hna mele tingeting ngöne la umang, me madrine fë la itre trengamo ne la hnanyijoxu. 5 Ngo hna axouenyi ni hnene la ketre ewekë hnenge hna puj. Ame lo eni e hune la iling, ke hna axouenyi ni hnene la itre mekun, me itre ewekë hnenge hna meköle goeën. 6 Matre hnenge hna iup troa theng la nöjei ka inamacan e Babulona, matre tro angatr a qejepengöne la pung.

7 “Ame hna traqa hnene la itre atre huuj ka kuci iöni, itre ka ithanata me itre u, me angetre Kaledaia,* me itre ka goeëne la itre wëtresij. Nge hnenge hna qaja la pung koi angatr, ngazo pe, thatreine kö angatre qejepengön. 8 Ame hna traqa hnei Daniela, lo hna ati ëjen, Beletisaza, thenge la ëjene lo hazeng; thei angeic la ua ne la itre haze ka hmitrötr. Matre hnenge hna qaja la pung koi angeic:

9 “‘Beletisaza fe, tane la itre atre huuj ka kuci iöni, atre hnyawa hi ni laka, thei ö la ua ne la itre haze ka hmitrötr, nge pëkö ewekë hna juetrën hnei ö hna thatreine amaman. Matre qaja jë la itre hnenge hna meköle goeën, nge qejepengöne jë.

10 “‘Hune la iling, hnenge hna meköle goeën la ketre isinöe nyipine la ihnadro; ketre isinöe atraqatr. 11 Hnene lai sinöe hna tru trootro uti hë la kola traqa e hnengödrai la itre hon ej; ej a mama cil qa ngöne la itre cane la fen. 12 Mingöminge catre la itre drön ne ej, nge ej a wa wen atruny; ala nyimu la itre hna thuan hnene la sinöe cili. Itre öni ne la itre hlapa a zae fene la gaa xapon ej, nge itre waco ne hnengödrai a lapane la itre picin ne ej; itre ka mel asë* a traqa troa xeni wen qa ngön.

13 “‘Ame lo eni a kapa la hna meköle goeën, öhne ju hi ni la ketre atre thup, ketre atr ka hmitrötr a kola uti qa hnengödrai. 14 Angeic a sue jë ka hape: “Sa pi lai sinöe, thupa pi la itre picin, hul amalane pi la itre drön ej, nge trije pi la itre wen e cahu. Loi e tro la nöjei öni a ananyin ej, nge tro la itre waco ne hnengödrai a sesëtrij la itre picin ej. 15 Ngo nue ju pe kö la ngön me itre iwaan nyipine la itre hnitr ne la hlapa, nge othe ju ej hnei fao me kopa. Epi troa ahmuhmun ej hnene la xaxapo ka uti qa hnengödrai, nge epi tro la edrön ej a eje thene la itre feja ne la ihnadro, me itre öni. 16 Epi troa saze la hni i angeic, matre tha hni ne atr hmaca kö ngo hni ne öni pë hë, nge tro ha traqa la 7 lao ijin hui angeic. 17 Hna qaja amamane la hna axeciëne celë hnene la itre atre thup, nge hna ithuemacanyine lai* hnene la itre atr ka hmitrötr, matre tro la nöjei ka mel a atre laka, musi kö la Ka Draië Catr hune la baselaia ne la itre atr. Nge qanyi nyidrëti kö iën la hnei nyidrëti hna troa hamën eje kow, me acile hun ej la atr hna wangacone catrën.”*

18 “‘Celë hi la hnenge hna puj, eni Nebukaneza joxu; nge enehila Beletisaza, qa i ö pë hë troa qejepengön, ke thatreine kö la itre xaa atr ka inamacan ngöne la baselaiang troa qejepengön. Ngo ijiji ö hi, ke thei ö la ua ne la itre haze ka hmitrötr.’

19 “Ame hnei Daniela lo hna hën ka hape, Beletisaza hna pane lapa thaup; kola axouenyi angeic hnene la itre mekuna i angeic.

“Ngo önine jë hi la joxu: ‘Beletisaza, the xouene kö la pu memine la alien ej.’

“Matre sa jë hi Beletisaza ka hape: ‘Joxu, epi tro la pu a eatr kowe la itre ka methinë nyipë, nge epi tro la alien ej a qaja la pun kowe la itre ithupëjia me nyipë.

20 “‘Ame lo isinöe hnei nyipë hna öhn, lo ka tru trootro uti hë la kola catr me ketr la hnengödrai, me mama cil e cailo fen, 21 lo ka hetre drön ka mingöming, nge ka ham atrun koi nöjei atr, lo hnë zae ne la itre öni ne hlapa, me hnë të ne la itre waco ne hnengödrai, 22 ke nyipëti hi joxu la sinöe cili. Ke hnei nyipëti hna kökötre me catr, matre draië catre hë nyipë, nge goi ketre fe nyipë la hnengödrai, nge traqa ha la mus i nyipë kowe la itre cane la fen.

23 “‘Ame hnene la joxu hna öhne la ketre atre thup, ketre atr ka hmitrötr a kola uti qa hnengödrai, me hape: “Sa pi lai isinöe nge apatrene ju, ngo nue ju pe kö la ngön me itre iwaan nyipine la itre hnitr ne la hlapa, nge othe ju ej hnei fao me kopa. Epi tro ej a hmuhmu hnene la xaxapo ka uti qa hnengödrai, nge epi tro la edrön ej a eje thene la itre öni, uti hë la kola traqa hun ej la 7 lao ijin.” 24 Joxu, hane hi la alien; celë hi ka troa traqa kowe la joxung, thenge la hna amekötin hnene la Ka Draië Catr: 25 Tro ha helë nyipë qaathene la itre atr, nge tro pë hë nyipëti a ce lapa me itre öni ne hlapa; nge tro ha ithua i nyipë haö tune la itre kau trahmany; tro hë nyipëti a hmuhmu hnene la xaxapo ka uti qa hnengödrai; nge tro ha traqa la 7 lao ijin hui nyipë, uti hë la tro nyipëti a trotrohnin laka, musi kö la Ka Draië Catr hune la baselaia ne la itre atr, nge qanyi nyidrëti kö hamën ej kowe la hnei nyidrëti hna ajan.

26 “‘Ngo pine laka, hna nue pe kö la ngön me itre iwaan ej, kolo lai a hape, tro hmaca a nue la mus koi nyipë, e trotrohnine hë nyipë laka, musi kö la hnengödrai. 27 Haawe joxu, epi tro nyipëti a kapa la ixatuang. Nuetrije pi la itre ngazo i nyipë nge kuca jë la loi, nuetrije pi la itre ngazo i nyipë nge utipine ju la itre ka pë ewekë. Nge maine jë, tro pala kö a pane nue nyipë troa madrine fë la itre lolo i nyipë.’”

28 Celë hi ka traqa koi Nebukaneza joxu.

29 Thupene la 12 lao treu, lo nyidrëti a ngenu hune la uma i nyidrë e Babulona, 30 önine la joxu: “Hapeu, tha kolo kö lo Babulona Atraqatre la, lo hnanyijoxu hnenge hna xup hnene la sipu trengecatreng me meneng, matre thaipine la elolong?”

31 Kolo pala kö a ithanata hnei joxu, nge mexeme pi hi la ketre nin qa hnengödrai, kola hape: “Hane hi la ketre maca koi ö Nebukaneza joxu: ‘Kolo ha xome la mus qaathei ö, 32 nge tro ha helë eö qaathene la itre atr. Tro pë hë eö a mel thene la itre öni ne hlapa, nge tro ha ithua i ö haö tune la itre kau trahmany, nge tro ha traqa hui ö la 7 lao ijin, uti hë la tro eö a trotrohnin laka, musi kö la Ka Draië Catr hune la baselaia ne la itre atr, nge qanyi nyidrëti kö hamën ej kowe la hnei nyidrëti hna ajan.’”

33 Ame hna aca tro eatre lai koi Nebukaneza. Hna helë angeic qaathene la itre atr, nge hna ithua i angeice haö tune la itre kau trahmany; hna hmuhmu la ngönetrei i angeic hnene la xaxapo ka uti qa hnengödrai, nge qeadridri catre hë la itre penehe i angeic tune la itre pene aeto, me itre itaime i angeic tune la itre itaime ne waco.

34 “Ngöne la pune la ijine cili, hneng Nebukaneza, hna gala draië, nge inamacane hmaca ha ni. Ame hnenge hna atrune la Ka Draië Catr me atrune la elolo i nyidrë, lo atre mel epine palua, ke ka pë pune la mus i nyidrë, nge uti hë la nöjei xötr la baselaia i nyidrë. 35 Ka pë pengöne la itre atrene la fen qëmekei nyidrë, nge nyidrëti a kuci mekun memine la itre trongene isi e hnengödrai, me itre atr e celë fen. Pëkö ala cas ka atreine acilë* nyidrë, maine qaja koi nyidrë ka hape: ‘Nemene la hnei nyipëti hna kuca?’

36 “Ngöne la ijine cili, inamacane hmaca ju hi ni. Nge hna hamën hmaca koi ni la elolon ne la musing, memine la emingömingöne la lolong. Nge hnene hmaca lo itre he ne nöj, me itre atr ka tru hna isin troa iöhnyi me eni; hnenge hmaca hna kapa la mus, nge tru catre hmaca kö la aqane atrunyi ni enehila hun ekö.

37 “Qa ngöne lai, eni hë Nebukaneza a atrun, me qaja draiën, me qaja aloine la Joxu ne hnengödrai, ke ka nyipici asë hi la itre huliwa i nyidrë, nge ka meköti la itre aqane ujë i nyidrë. Nge atreine kö nyidrë thaipiëne la itre ka pi tru.”